Read Khumi Chin JEREMIA 30 Bible Online

JEREMIA 30 - Khumi Chin bible

JEREMIA 30

¹Hini ly Jeremia teng y ARENG my leu pei nai ne.

²Israela chengchi i ARENG Tameuh my, “Nang teng y kai my kang thui pi nai leuchi ly cha-iu theung y tajiu typ ba.

³Ati mana nai mo nabaly kai i khumi Israela chengchi hawi Juda chengchi ai, kaimy palum teang ai nai neng tym ai nai deaungkho y ne. Kai ly nichi ai, mychi i amsi pajochi teng y pei nai pri y pahawi ali teang ai i, nichi ly huni pri amtym u ali teang ai. Hini ly kai, ARENG i thui nai leu ne,” napi.

⁴Israela khumichi hawi Juda khumichi teng y, ARENG my hina nai kamta leu pei nai ne.

⁵ARENG my, “Kai ly jei naimy aeu nai raawi thai; huni raawi ly tlamsa nai raawi ny y; jei iy aeu nai raawi ne.

⁶Adeng ahui iy adawn pasym u! Neampacho ly deaungdi tapen thai a? Huna lawh teu baly, neampacho nai iy deaungdi tapen nai kamtang avum nai neampachy kamta, ati mana nai y mychi i kajeu y kiu hawi panem nai kaniu lawh mo? Khumi luteng ly ati mana nai y, meimai kadaupa lawh mo?

⁷Ka-jei awm nai neng kani ly ang tym dudu bo; takhra mani kani py, huni kani hawi ly pata pajau y. Huni kani ly Jakob cheng ngari kamtang avum ai nai kani ne. Na i py nichi ly dei y naimy heng u ai,” napi.

⁸Ati cheaungkhang sa thai nai keung ARENG my, “Huni neng kani tym nai khala y kai ly huni khumichi i kaneaungra i tamtleang khei vui iy, nichi ai kawm nai tamo vuinawnchi su pi vui ai. Nichi ly pri takhrachi teng y miseaung achei ai ny y.

⁹Ti y naimy nangmychi i Tameuh kai, ARENG i kalop ai py, nichi i samrang y kaimy khai nai samrang Davida i kangpreangchi i kalop ai py, sa u ai nai tla ai.

¹⁰“Kai i khumichi awi, jei u moh; Israela khumichi awi, jei nai kaso theu u moh. Langheng y hawi iy nangchi awm u nai pri, huni pri kamlo dengdairei, nangchi ai kaimy atleu ai. Nangchi ly vawi teang iy tlamsa naimy awm u ai. Ami my py nichi ai pajei ai nai nga ai ny y.

¹¹Kai ly nangchi ai atleu ai nai kang jeu ai. Kaimy nangchi ai ahei hai nai prichi ai ly kaimy taphra ai. Na i py nangchi ai ly kang taphra ai ny y. Kai ly nangchi ai pajeng y naimy khai ai ny y; na i py pajeng nai khala ly hawi khypchy my kang pajeng ai. Hini ly kai, ARENG i thui nai leu ne,” napi.

¹²ARENG ly mymy i khumichi teng y, “Nangchi i tamo kalemchi ly tha pajau ai ny y. Nangchi i no angvawichi ly hawi sa i py, hawi pajau y ai.

¹³Nangchi ai kry ai nai khumi leaungrei py by y. Nangchi i tamo kalem vui py asi by y nai daeungkho y, nangchi ly nangmychi i no-na hawi ai nai molam y athang khai naira by y leang bo.

¹⁴Nangchi ai tamen nai khumichi ly nangchi ai tami pawn veng bo. Nichi ly nangchi ai dawndan u y leang bo. Nangchi i kamngochi ly nawi parai iy, nangchi i hawi y ala nai deaungkho y, kai ly nangchi ai paleung ka-e kamta no nga hai bo. Nangchi i pajeng naira avum nai ly khri pa-rei ty na bo.

¹⁵Nangchi ly nangmychi i tamo tha thai y nai molam y, tangam u reng moh jau. Nangchi i kamngo ly nawi parai iy, nangchi ly khri pa-rei hawi y ala nai deaungkho y, kai ly nangchi ai, hina nai kamta kang pajeng nai ne.

¹⁶Vai ly nangchi ai ang pajawn nai khumi bawibawichi ly pajawn naira avum u iy, nangchi i paleung ka-e bawibawichi ai py, langheng y hawi u vui ai. Nangchi ai pahyp y naimy ana nai khumi bawibawichi ly mychi naimy pahyp y naimy ana naira avum u iy, nangchi ai tiu nai khumi bawibawichi py, tiu naira avum u ai.

¹⁷Nangchi i paleung ka-echi my, ‘Zion mary ai ly nyn va veng bo. Huni mary ai ami py dawndan y leang bo, nanai thui u i py, kai ly nangchi ai hawi hai ali teang ai. Nangchi i tamo kalemchi tha hai ai. Hini ly kai ARENG i thui nai leu ne,” napi.

¹⁸ARENG my, “Kai ly kaimy i khumichi ai nang chawn hai teang iy, kapahawi ali teang ai. Jerusalem mary ai palum teang iy samrang yhm py palum teang ai.

¹⁹Huni meingtym y awm nai khumichi ly palo nai khulym thui u iy, nichi ly amo theu naimy aeu u ai. Kai ly nichi ai khumi peung hai ai i, tahm kapasang ai.

²⁰Kai ly hini pri ai jangni i sa thai naira kapei ali teang iy, hini sa thai naira ai py khaw hai jojo ai. Nichi ai ana nai khumi bawibawichi ai kapajeng ai.

²¹Nichi ai peang ai nai khumi ly mychi theung i nai theu ai. Nichi i samrang py mychi theung i nai theu ai. Kaimy palau nai khala, huni khumichi ly kai teng y ang jeu tapai ai. Kaimy palau y naimy, ami nai ly kai teng y jeu vam ai mo? Nichi ly kai i khumichi lawm u iy, kai py nichi i Tameuh lawm ai. Hini ly kai ARENG i thui nai leu ne,” napi.

²³Mymy i kado theu nai ly khumi kamngochi i lu y aho nai ali kamchai hawi atawm. Huni kado theu naira ly mymy i sa ai tau nai ngiereichi so angym pajau y ryrei ly rym ai ny y. Hinichi ai mymy i khumichi ly mo mang i neng kani y, chaipyn naimy pany u ai.