Read Khumi Chin JEREMIA 33 Bible Online

JEREMIA 33 - Khumi Chin bible

JEREMIA 33

¹Kai ly theaung apai theung y aeung nai thym khala y, ARENG ly kai teng y leu ang pei bi nai ne.

²Khaileaung ai sa iy meingtym karira y khai nai keung ARENG ly kai teng y leu ang pei. ARENG my,

³“Kai ai palau; kang pathang pi ai. Lyh ai awm iy rengrang nai atitichi kang patei pi ai.

⁴Jerusalem mary i yhmchi hawi Juda samrang i yhmchi ly katanmeuh iy tiu naira avum nai deaungkho y phra ai, nanai Israela chengchi i Tameuh kai, ARENG my leu pei nai ne.

⁵Babulon chengchi ai khumi phyreichi my tiu u ai. Kai ly khri pa-rei kado theu nai deaungkho y, kaimy padei ai nai khumi veuchi hawi, nichi ly hini mary y kawi hai ai. Mary i khumichi i sa tamang nai molam y, kai ly hini mary i nai meimai kahi pi vui ai.

⁶Na i py kai ly mary hawi mary i khumichi ai hawi sa pi ai i, noso hawi u ali teang ai. Mary i khumichi ai tlamsa naira hawi chymme naira nga hai ai.

⁷Kai ly Israela pri hawi Juda pri y nang chawn hai ai. Huni prichi ai jangni i kamta, kasa pi palai teang ai.

⁸Khumichi my kai i tlang tleaung y sa tamang nai kamngochi paju pachai pi ai. Nichi i kamngochi hawi nichi i tiu naichi molam y kapahen pi ai.

⁹Jerusalem mary ly kai i amo theu naira, tahm asang naira hawi amlyh naira lawm ai. Khaileaung pri i khumi cheng cheaungkhangchi ly huni mary ai kaimy peang nai hawi nairachi py, huni mary y kaimy tym hai nai nang chawn nairachi py, thai u nai khala ly kaso theu u ai,” napi.

¹⁰ARENG my, “Hini meingtym ly khutaha daichi ka-vym kamta khumi angso, tawnbawichi by y naira ne, nanai khumichi thui u lengleang nai ne. Juda marychi hawi Jerusalem mary lamchira y khumi angso, tawnbawichi savai tlang veng bo, nanai ly teng khyp nai ne. Na i py huni meingtymchira y,

¹¹amo theu nai raawichi hawi, apom nai pawira i amo theu nai katyn kapauchi thai u ali teang ai. Khumichi ly kawn nai katalamrachi kai i Achura yhm y syn nai tarawi y khulym thui u nai raawichi, nangchi thai u ai. Nichi my, ‘Ati cheaungkhang sa thai nai ARENG teng y, kawn nai leu thui u; ati mana nai mo nabaly mymy ly hawi nai ne iy tamen naira ly deungtasarei awm jojo nai deaungkho y ne,’ nanai thui u ai. Kai ly hini pri ai jangni khala i kamta, nang chawn hai teang ai. Hini ly kai ARENG i thui nai leu ne,” napi.

¹²Ati cheaungkhang sa thai nai keung ARENG my, “Khumichi hawi tawnbawichi by y iy khutaha daichi ka-vym hawi atawm nai hini pri y, beram typ nai keungchi my beramchi ai sui patlai nai meingtymchi awm teang ai.

¹³Mawitleaung prichi, mawi kheutangchi hawi Juda pri tokalawi ngan mang y awm nai marychi hawi, Benjamin khu ka-peang theung y py, Jerusalem mary tengpang sahawi i avangchi hawi Juda pri marychira py, beram typ nai keungchi ly mychi i beramchi ai vuikanai kati u teang ai. Hini ly kai, ARENG i thui nai leu ne,” napi.

¹⁴ARENG my, “Israela khumichi hawi Juda khumichi teng y kai i leu adeu nai kamta, tym angym hai nai neng ly tym ai.

¹⁵Huni neng kani khala ly Davida kangpreang theung i leu meitang teaung nai leaungrei vawi patyp pi ai. Ni ly pri verei y leu meitang adyh adawi ai naichi sa ai.

¹⁶Huni neng tym nai khala y, Juda pri ly atleu naira nga ai. Jerusalem mary i khumichi py chymme naira nga ai. Mychi i mary pui ai, ‘Kaichi ai atleu nai keung ARENG,’ nanai amyn palau ai.

¹⁷ARENG my Israela pri y mana khala py samrang Davida i kangpreang avaw hai by y ai nai py,

¹⁸kai i mo y angdo naimy leng patlum nai katalamrachi, teicha teinei katalamrachi hawi tawnbawichi talam ai nai mana khala py Levi theaung pathyp pi nai keungchi avaw hai by y ai nai py kai, ARENG my leu adeu bo,” napi.

¹⁹ARENG ly kai teng y,

²⁰“Vum hawi kanithun ly mychi i vui neng tym baly tym thai ai nai vum i vui kaimy sa nai leu maikawm, kanithun i vui kaimy sa nai leu maikawm ly taphra pajau y.

²¹Hunai kamta ly Davida i samrang kangpreang avaw by y ai nai hawi, kai i kalop sa pi nai Levi theaung i pathyp pi nai keung avaw hai by y ai nai, kai i miseaung Davida hawi asa nai Leu Maikawm ai py, taphra pajau y.

²²Kai ly kani mang i ka-si taukichi hawi pangli peang i spryhchi kamta, kati pajau y na pa-rei kai i miseaung Davida i kangpreangchi hawi kai i kalop sa nai Levi theaung pathyp pi nai keungchi i vuikanai peung hai ai,” napi.

²³ARENG ly kai teng y,

²⁴“Kai ly kaimy i vawi takhra nai Israela yhm dengtheungchi hawi Juda yhm dengtheungchi ai khai su bo, nanai khumichi my thui u nai ly nang pany a? Nichi ly hina nai kamta kai i khumichi ai mei aniu y nai sa iy, khumi cheng harei malawn py palawn u y bo.

²⁵Na i py kai ARENG ly vum, kanithunchi hawi leu maikawm asa iy, kani hawi khaileaung ai kryme ai nai reita leaungsai sa pi bo.

²⁶Huna nai kai i kateng sa nai kamta, Jakob i kangpreangchi hawi py, kai i miseaung Davida hawi py, asa nai Leu Maikawm khaw hai jo ai. Kai ly Abraham, Isaka hawi Jakobchi i kangpreangchi ai peang ai nai, Davida kangpreang theung i leaungrei ai vawi takhra ai. Kai i khumichi ai nang chawn hai teang ai. Kai ly nichi i tlang tleaung y kapahen ai,” napi.