Read Khumi Chin JEREMIA 34 Bible Online

JEREMIA 34 - Khumi Chin bible

JEREMIA 34

¹Babulon samrang Nebukhadnezar hawi tavaimichi anui y awm nai pri ngiereichi hawi, khumi cheng cheaungkhangchi i tavaimichi kasabawmra hawi, Jerusalem mary hawi tengpang sahawi i marychi ai tiu nai thym khala, ARENG ly kai teng y leu ang pei nai ne.

²Israela chengchi i ARENG Tameuh my kai teng y, nang ly Juda samrang Zedekiah teng y chei iy, ni ai thui pi ai nai leu ly “Kai, ARENG ly hini mary ai Babulon samrang i kiu y au ai. Ni ly hini mary ai mai leng vui ai.

³Nang ly ni i kiu i nai tleaung ai ny y; ang patiu ai i, ni i kiu y tym ai. Nang ly ni hawi mo atha iy leu arum chum baly, Babulon mary mang y abang ai nai tla ai.

⁴Aw samrang Zedekiah awi, nang i molam y kang pei nai leu ly tangai ba. Nang ly tavai keung y dei ai ny y.

⁵Nang ly paleung awmnem naimy dei ai. Khumichi my nang i amsi pajo samrangchi i vui mui katui patawi pi nai kamta, nang i vui py mui katui patawi pi ai. Nichi ly ‘Kaichi i samrang dei veng bo!’, nanai thui iy nang i vui vo tangam u ai. Hini ly kai, ARENG i thui nai leu ne,” napi.

⁶Naibaly Babulon samrang i tavaimichi ly Jerusalem mary y tiu u nai thym khala, amo Jeremia ly huni satang bawibawichi ai samrang Zedekiah teng y amti pi bo. Babulon tavaimichi ly Juda pri i amtangra marychi theung i awm rai nai Lakhisa mary hawi Azeka mary ai py, tiu u dudu nai ne.

⁸Samrang Zedekiah hawi Jerusalem mary i khumichi ly Juda cheng tengtawi miseaung apalawn y ai nai molam y,

⁹Hebrai miseaung neampacho, neampachychi ai tlamsa naira pei ai nai ngai u bo.

¹⁰Khumi bawibawichi hawi lu sa nai bawibawichi ly mychi i miseaungchi ai tlamsa naira pei chum baly, mo mang y mana khala py miseaung palawn bi y ai nai ngai u bawi nai ne. Nichi ly mychi i miseaungchi ai tlamsa naira pei u bo.

¹¹Na i py huna nai tlamsa naira pei chum nai bo y paleung amla vui i, huni khumichi ai palau ali teang iy, miseaung y palawn u akhikan nai ne.

¹²Naibaly Israela chengchi i ARENG Tameuh my,

¹³kai ai khumichi teng y thui hai nai ly “Kai ly nangchi i amsi pajochi ai Aikupta pri i dengdairei miseaung alaw hai nai thym khala y, nichi hawi Leu Maikawm asa nai ne.

¹⁴Nichi ly mychi i van nai Hebrai miseaung ngiereichi ai miseaung sa hai teang nai bo y, saryh saneng y ly miseaung alaw hai teang ai nai tla, nanai nichi teng y kaimy thui pi nai ne. Na i py nangchi i amsi pajochi ly kai ai tahm khai u y; kai i leu py tangai u y.

¹⁵Kani kra y naimy nangchi ly paleung ali vui i, kai i kangai sa u bo. Nangchi bawibawi ly nangmychi i Hebrai cheng tengtawi tlamsa naira pei ai nai ngai u bawi iy, kai i amyn y sa nai Achura yhm y kai i mo y Leu Maikawm sa u bo.

¹⁶Na i py nangchi ly paleung ali u bi i, kai ai tahm khai u y bo. Nangchi bawibawi ly nangmychi my tlamsa naira pei nai miseaungchi ai palau teang iy, miseaung y palawn u akhikan taleang bi nai ne.

¹⁷Hunai deaungkho y nangchi ly kai i leu tangai y, nangmychi Hebrai cheng tengtawi ai py tlamsa naira pei u y, nanai my thui nai ne. Naibaly nangchi ai tavai takai, no kanghawi, tahum takangra y ngaingai dei ai nai kang pei ai. Kai ly nangchi i tlang tleaung y sa nai sai molam y, khaileaung pri i khumi cheng cheaungkhangchi ly kaso tahyn theu u ai.

¹⁸Juda pri hawi Jerusalem mary i lu sa naichi ly samrang yhm kry nai keungchi, pathyp pi nai keungchi, mipuichi hawi vanrei si katai se nyhrei se nai sala y aleaung iy, kai hawi Leu Maikawm asa u nai ne. Na i py nichi ly kai i mo y mychi asa nai Leu Maikawm ai taphra u bo. Hunai deaungkho y si katai ai nichi my sa nai kamta, nichi ai py kaimy sa teang ai.

²⁰Kai ly nichi ai paleung ka-echi i kiu y au ai. Nichi ai padei ai ngai nai khumichi i kiu y kaau ai. Nichi i veuchi ly tavochi hawi daichi mawi kasichi i teicha lawm ai.

²¹Juda samrang Zedekiah hawi my i bangtangchi ai py, nichi ai padei u ai ngai nai paleung ka-echi teng y kaau teang ai. Kai ly vai, nangchi ai tavai tiu anawn nai Babulon tavaimichi kiu y au ai.

²²Huni tavaimichi ai kaimy leu pei nai deaungkho y, nichi ly vawi ali iy, hini mary ai tiu chum baly mai leng pawn ai. Kai ly Juda marychi ai khumi angso by y nai, khutaha daichi ka-vym lawm hai ai. Hini ly kai, ARENG i thui nai leu ne,” napi.