Read Khumi Chin JEREMIA 35 Bible Online

JEREMIA 35 - Khumi Chin bible

JEREMIA 35

¹Juda samrang Josia i chapo Jehojakim i deung y ARENG ly kai teng y,

²“Nang ly Rekhab chengchi teng y chei iy leu arum hai chum baly, nichi ai Achura yhm takun harei mang y hawi ly kreip hang panei,” napi.

³Hunaibaly kai ly (takhra Jeremia i chapo, Hebazinia i katu) Jaazaniah hawi ni i amjo amnauchi, chapochi napi nai Rekhab i nupai bawibawichi ai,

⁴Achura yhm y palau iy amo Hanan nithun abang nai khumichi awm nai takun mang y pahawi bo. Hanan ly Ikadalia i chapo ne. Huni takun ly miteaung kehchi i takun sahawi, Achura yhm miteaung keh leaungrei, Shalum i chapo Maaseiah i takun salo kangtheng y awm.

⁵Hunaibaly kai ly khau hawi kreip hang kawi meng nai rahumchi ai Rekhab nupaichi i mo y khai i, nichi teng y, Kreip hang maidenreichy nei u,” napi.

⁶Na i py nichi my, “Rekhab i chapo, kaichi i amsi pajo Jonada my, kaichi ly katu chanau deungrei mana khala py kreip hang nei y ai nai leu pei nai awm i, kaichi ly kreip hang kanei u y.

⁷Nimy ly kaichi ai yhmchi so y ai nai hawi lichi so y ai nai py, kreip akhochi so y ai nai hawi ka-jo ka-van so u y ai nai py, taviu kheng bi rai. Kaichi ly angvynchi kamta awm nai pri y awm u jo iy, kanih yhmchira y naini awm ai nai py, leu ang pei nai ne.

⁸Kaichi ly kaimychi i amsi pajo Rekhab i chapo Jonada i leu pei naichi kapatawm u nai ne. Kaimychi kypkyp hawi kaimychi i aju, cho chanauchi ly kreip hang mana khala py nei u y.

⁹Kaichi ly kaimychi awm ai nai yhmchi kaso u y. Kreip akhochi, li hlauchi, ti y baly chohchi py kapeang u y.

¹⁰Kaichi ly kanih yhmchira y kaawm u bo. Kaimychi i amsi pajo Jonada i reita ai kapatawm u takengkei nai ne.

¹¹Na i py hini mary ly Babulon samrang Nebukhadnezar my tiu nai thym khala y, Babulon hawi Suria tavaimichi theu vui ai nai molam kaichi ly Jerusalem mary y jeu ai nai paleung ka-dawn awm u nai ne. Hunai deaungkho y vai, kaichi ly Jerusalem mary y awm u nai ne,” napi u.

¹²Huna nai khala y Israela chengchi i Tameuh, ati cheaungkhang sa thai nai keung ARENG ly kai ai Juda khumichi hawi Jerusalem mary i khumichi teng y pato i, nichi teng y, “Nangchi ly ati mana nai y kai i leu pei naichi patawm u y lawh mo, nanai kai ARENG my deng nai ne.

¹⁴Jonada i katu chanauchi ly kreip hang nei y ai nai Jonada my pei nai reita patawm u bo. Nichi ly mychi i amsi pajo my leu pei nai tangai u nai deaungkho y, vaini khrairei ami py kreip hang nei u y nai ne. Na i py nangchi ly kaimy kang thui pi veangveang teu i py, kai i leu tangai u y.

¹⁵Kai ly kaimy i miseaung amochi ai kang pato pi veangveang bo. Nichi my py nangchi ai nangmychi i hawi y naichi khai su iy, kahawi sa u ai nai ang thui pi bo. Nangchi ly nangmychi i amsi pajochi teng y kaimy pei nai pri y awm u jojo ai nai deaungkho y, tameuh takhrachi ai chiu u y ai nai, nangchi ai kang pany hai nai ne. Na i py nangchi ly kai i leu tangai u y, kai ai py tahm khai u y.

¹⁶Jonada i kangpreangchi ly mychi amsi pajochi i leu tangai u. Nangchi ly kai i leu tangai u y.

¹⁷Hunai deaungkho y Israela chengchi i Tameuh, ati cheaungkhang sa thai nai keung kai ARENG ly kaimy i adeu nai ka-jeira ai Juda khumichi hawi Jerusalem mary i khumichi tlang tleaung y tym hai ai. Ati mana nai mo nabaly nangchi ly kaimy thui nai khala tangai u y. Kaimy palau nai khala pathang u y nai deaungkho y ne, nanai leu pei nai thui pi,” napi.

¹⁸Hunaibaly kai ly Rekhab nupaichi teng y, Israela chengchi i Tameuh, ati cheaungkhang sa thai nai keung ARENG my, “Nangchi ly nangmychi i amsi pajo Jonada my pei nai reita ai patawm u bo. Ni i leu pei naichi tangai u i iy, ni i taviu nai ngiereichi sa u bo.

¹⁹Hunai deaungkho y Rekhab i chapo Jonada ly kai i kalopchi sa ai nai katu chanau amthawn jojo ai, nanai Israela chengchi i Tameuh, ati cheaungkhang sa thai nai keung kai, ARENG my leu adeu bo,” nanai leu pei nai thui pi pateang nai ne.