Read Khumi Chin JEREMIA 36 Bible Online

JEREMIA 36 - Khumi Chin bible

JEREMIA 36

¹Samrang Josia i chapo Juda samrang Jehojakim i samrang y atheng nai palyh saneng, ARENG ly kai teng y,

²“Nang ly cha aeang harei la iy Israela pri, Juda pri hawi pri tleireichi molam y kai i leu pei naichi tajiu typ ba. Samrang Josia deung y kai i leu pei nai tangai u nai neng dengdai vaini khrairei, nang teng y leu kang pei nai bawibawi tajiu typ ba.

³Juda khumichi ly mychi i vui kaimy dawn yb nai ka-jeira satang thai u lawh baly, mychi i hawi y naira khai su tan khai u su lym ai. Huna nai khala y kai ly nichi i hawi y sa nai kamngochi pahen pi ai,” napi.

⁴Hunai deaungkho y kai ly Neriah i chapo Baru ai palau iy, mymy ly ARENG i leu pei nai ngiereichi tajiu typ ai nai labeaung mang thui pi nai ne. Baru my py cha aeang hareira y tajiu typ bo.

⁵Naibaly kai ly Baru teng y, “Kai ly Achura yhm theung y kun ai nai ngo y.

⁶Na i py vai tlenrei khumichi biu hai u nai khala y, kai ly nang ai Achura yhm y kang chei hai ai nai ngai. ARENG my kai teng y leu pei nai deaungkho y, kaimy nang ai labeaung mang kang thui pi nai ngiereichi ai khumichi thai bawi pa-rei, nang ly huni cha aeang ai athorei my phain pi ai nai tla. Nangmychi mary hawi avangchira i jeu u nai Juda khumichi raurei, hu y awm nai khumichi thai pa-rei, nang ly hini cha aeang phain pi.

⁷ARENG ly hini khumichi ai kaso tahyn theu ai hawi nanai kado theu naira hawi pajei pahyn nai deaungkho y, khumichi ly mychi i hawi y nairachi khai su iy, ARENG teng y chiu sa u tan chiu sa u lym ai,” nanai leu pei bo.

⁸Hunai deaungkho y Baru ly my teng y kaimy thui pi nai kamta, Achura yhm theung y ARENG i leu pei naichi hawihai palai phain pi tanga bo.

⁹Josia i chapo Juda samrang Jehojakim i samrang atheng nai pa-ngo saneng, takawrei lo y, Israela khumichi ly ARENG y meimai nga ai nai molam, biu hai ai nai neng thai hai nai deaungkho y, Jerusalem mary i khumi bawibawichi py, Juda mary tleirei i jeu u nai khumi bawibawichi py, biu hai u bo.

¹⁰Huna nai khala y Baru ly cha aeangra i, kaimy labeaung mang thui pi nai ngiereichi ai, Achura yhm theung y awm nai khumichi thai pajau nai meingtym mang phain pi bo. Ni ly Kemaria i chapo, samrang ai tau pei nai keung Shaphan i takun mang my huni cha phain pi nai ne. Huni takun ly Achura yhm katheu pa-kho kangtha kunra sahawi, salo kangtheng theung y awm nai ne.

¹¹Kemaria i chapo, Shaphan i katu Mikaia ly huni cha aeangra y awm nai ARENG i leuchi Baru my phain nai thai baly,

¹²samrang yhm theung i bangtangchi ka-vum sa nai, samrang ai tau pei nai keung i takun mang y chei bo. Huni meingtym y samrang ai tau pei nai keung Elishama, Shemaiah i chapo Delaiah, Akhabo i chapo Elanathan, Shaphan i chapo Kemaria, ananiah i chapo Zedekiah hawi takhra samrang i bangtangchi awm u nai ne.

¹³Mikaia ly khumi mipuichi teng y Baru i phain pi naichi theung i, my i thai nai ngiereichi huni khumichi teng y thui pi bo.

¹⁴Huna nai khala y samrang i bangtangchi ly Kushi i kati, Shelemiah i katu, Nethaniah i chapo Jehudi ai Baru teng pato iy, Baru ai my i khumichi teng y phain pi nai cha aeang syn nai my jeu ai nai taviu bo. Baru py huni khumichi teng y chei nai ne.

¹⁵Huni khumichi ly Baru ai ateh ai nai thui pi chum baly, “Hini cha aeang ly kaichi teng y phain pi,” napi i, Baru ly phain pi bo.

¹⁶Phain pi chym baly samrang i bangtangchi ly athengra nai meimai hawi leaung leaungrei akhen u leungtang iy, “Hini satang ly samrang teng y kaichi thai hai ai nai tla ai,” nanai Baru teng y thui pi bo.

¹⁷Naibaly nichi my Baru teng y, “Nang ly ati mana nai y hini leu bawibawichi nga iy tajiu typ nai mo? Hunichi ai nang teng y Jeremia my labeaung mang thui pi nai a?,” nanai deng u.

¹⁸Baru my, “Hini leu bawibawichi ly Jeremia my labeaung mang ang thui pi iy, kaimy chatui hawi hini cha aeangra y katajiu nai ne,” nanai pathang pi.

¹⁹Naibaly samrang i bangtangchi my, “Nang hawi Jeremia ly preang iy aheu hawi ai nai tla. Nangni i awm naira ly ami ai py pany hai moh,” nanai Baru teng y thui pi u bo.

²⁰Samrang i bangtangchi ly huni cha aeang ai, samrang i secretary Elishama i takun y khai jo iy, samrang yhm y chei u i, samrang teng y huni satang bawibawichi amti pi.

²¹Naibaly samrang ly Jehudi ai pato iy cha aeang la hai bo. Jehudi py Elishama takun i, huni cha aeang la iy samrang hawi vanrei, samrang i sahawi y taki teungtareung nai bangtangchi i mo y phain pi nai ne.

²²Huni neng ly kaseih neng ne i, samrang ly my i kaseih neng y awm nai yhm theung i takeang mai mo y ateh.

²³Jehudi my chang thom chang palyhrei phain chum nai hawimy samrang ly huni chengchi ai acho hawi kalabaw iy mai theung y thun vui bo. Ni ly hina nai kamta cha aeang verei mai y kang keng na pa-rei sa nai ne.

²⁴Na i py cha aeangra abawi nai leu sai bawibawichi thai nai samrang py, bangtangchi py jei hyn y, uikheih nai ka-ma-ra py patei u y.

²⁵Elanathan, Delaiah hawi Kemariachi my huni cha aeang mai y leng y ai nai samrang teng y takeng u teu i py, samrang ly nichi i takeng nai tangai pi y.

²⁶Naibaly samrang ly Azariela i chapo Seraiah, Abadela i chapo Shelemiahchi hawi vanrei, my i chapo Jeramela teng y, kai hawi kai i secretary Baru ai patiu ai nai leu pei bo. Na i py ARENG ly kaini ai heu vui nai ne.

²⁷Baru teng y kaimy labeaung mang thui pi nai cha aeang ai samrang my mai leng veng nai bo y, ARENG ly kai teng y,

²⁸“Nang ly takhra cha aeang harei la iy, samrang Jehojakim my mai leng veng nai cha aeangra y abawi nai leu sai ngiereichi ai tajiu ba.

²⁹Samrang Jehojakim ai py ARENG my, “Nang ly cha aeang ai mai leng vui chum baly Jeremia teng y, Babulon samrang ly hini pri y ang jeu ai i, hini pri y taphra iy khumichi hawi tawnbawichi padei pawn ai, nanai ati mana nai thui lawh mo?, nanai deng bo.

³⁰Hunai deaungkho y nang i kangpreangchi ly mana khala py, Davida i areng atehra y samrang atheng ai nai nga u ai ny y, nanai kai ARENG my kang thui pi bo. Nang i veu py kanithun y ly kanibi ajai iy, vum y ly kadam tla hai ai nai aphi u su ai.

³¹Nangchi i sa tamang nai kamngochi deaungkho y, kai ly nang hawi nang i katu chanauchi ai, nang i bangtangchi hawi vanrei kapajeng ai. Nang hawi Jerusalem mary i khumichi, Juda khumichi ly kaimy pany hai naichi ai tahm khai u y. Hunai deaungkho y kai ly kaimy kang pajei, kang pahyn nai ka-jeira ai nangchi i tlang tleaung y kang tym hai ai, nanai leu pei nai amti pi,” napi.

³²Huna nai khala y kai ly takhra cha aeang harei la iy, kai i secretary Baru teng y pei pi. Baru ly samrang Jehojakim my mai leng vui nai cha aeangra y abawi nai cha ngiereichi ai, kaimy labeaung mang thui pi nai kamta tajiu bo. Kaimy labeaung mang thui pi nai ka-tawm leuchi tajiu panawi bi nai ne.