Read Khumi Chin JEREMIA 37 Bible Online

JEREMIA 37 - Khumi Chin bible

JEREMIA 37

¹Babulon samrang Nebukhadnezar ly Jehojakim i chapo, samrang Jehojakhin i jeng y, samrang Josia i chapo Zedekiah ai samrang y palyn bo.

²Na i py Zedekiah ly my i bangtangchi hawi khumichi ly kai teng y ARENG my leu pei nai tangai u y.

³Samrang Zedekiah ly Shelemiah i chapo Jehuka hawi Maaseiah i chapo pathyp pi nai keung Zephaniah nini ai kai teng y pato nai deaungkho y, nini ly kai teng y, “Achi i pri i vui, achi i ARENG Tameuh teng y chiu so pi,” nanai thui hawi.

⁴Huna nai khala y kai ly theaung tlo y leang rai; kai ly khumichi hawi tlamsa naimy amkawm ai nai nga rai.

⁵Huna nai thym khala samrang Pharao i tavaimichi ly Aikupta pri i dengdairei tavai amsa u bo. Huna nai tavai amsa nai thai u nai khala y, Jerusalem mary ai takanmeuh nai Babulon tavaimichi ly tavai athawn u pan veng nai ne.

⁶Naibaly Israela chengchi i ARENG Tameuh my

⁷kai teng y pato nai keung Zedekiah teng y, “Nang ai sabawm ai nai vai, amsa nai Pharao samrang i tavaimichi ly mychi i awm nai Aikupta pri y vawi u ali teang ai.

⁸Huna nai khala Babulon chengchi ly ang jeu teang ai i, hini mary ai tiu nai peang vui iy mai leng vui ai.

⁹Babulon chengchi ly ang jeu u takengkei ai. Hunai deaungkho y nichi ang jeu u ali teang ai ny y, nanai nangchi i ka-dawn tamang y ai nai, kai ARENG my kang pany hai nai ne.

¹⁰Nangchi ly nangmychi ai tiu nai Babulon tavaimichi vereichi ai tiu pajau iy tamo kalem nga naichi naini, mychi i kanih yhm y awm khyh bo na lawh teu i py, huni khumichi ly ang thau u iy, hini mary ai mai leng vui ai,” napi.

¹¹Aikupta tavaimichi ly sahawi y kasa dudu nai deaungkho y, Babulon tavaimichi ly Jerusalem mary i nai athawn pan veng nai ne.

¹²Huna nai khala y kai Jeremia ly kaimy i yhm dengtheungchi hawi yhmtheaung katuichi la iy, Jerusalem mary i dengdairei Benjamin khu ka-peang mang y preang bo.

¹³Na i py Benjamin katheu pa-kho y tym nai khala ly Hananiah i katu, Shelemiah i chapo Irijah napi nai tamcheaung my, “Nang ly Babulon chengchi mang y preang nai khumi ne lo-oh!,” napi.

¹⁴Kaimy, “Nang i thui nai kamta ny y! Kai ly preang nai ny y leang,” nanai pathang i py Irijah ly kai i leu tangai y i, kai ai patiu iy samrang i bangtangchi teng y hawi nai ne.

¹⁵Huni khumichi ly kai ai khri pa-rei kado theu hai nai deaungkho y, pakhau chum baly samrang i secretary Jonathan i yhm y paeung bo. (Huni yhm ai ly theaung palawn nai ne.)

¹⁶Kai ly khaileaung theung i kaveng theung y tym i, kra parai na pa-rei aeung ai nai tla bo.

¹⁷Naibaly samrang Zedekiah ly kai ai samrang yhm y palau i, “ARENG teng i leu pei nai sai sairei awm a?,” nanai kangviu y angdeang. Kaimy, “Awm chy, nang ly Babulon samrang i kiu y tym ai,” nanai kapathang pi.

¹⁸Huni bo y kaimy, “Kai ly nang hawi, nang i bangtangchi, ti y baly khumichi ai ati hawi y nai kasa iy nang ly kai ai theaung y paeung nai mo?

¹⁹Babulon samrang ly nang ai py, hini pri ai py tiu ai ny y, nanai ang thui pi nai keung nang i amochi ly ma mang y awm u pawn mo?

²⁰Samrang awi, kai i leu tangai iy kai i thui nai kamta sa ai nai kang takeng. Kai ai ly nang i tau pei nai keung Jonathan yhm i theaung y pato teang moh kyh; pato teang lawh baly kai ly huni yhm y kadei angchi khyp ai,” napi.

²¹Hunaibaly samrang Zedekiah ly samrang yhm apai theung y kai ai deaungki thiu iy khai ai nai leu pei bo. Kai ly mary i takochi khei nai pa-rei, tako paawp naira i tako kanirei y phi harei kanga. Huna nai kamta kai ly samrang yhm apai theung y kaawm nai ne.