Read Khumi Chin JEREMIA 4 Bible Online

JEREMIA 4 - Khumi Chin bible

JEREMIA 4

¹ARENG my, “Israela mipuichi awi, nangchi vawi u ali teang ai nai ngai lawh teu baly, kai teng y vawi u. Kai i niu ngai y nai mynchi va pawn iy, kai i tlang tleaung y ka-ym awm u lawh teu baly,

²kai i amyn y tau iy vaineng abeu nai ly kataw kateng lawm ai. Huna nai khala y khumi cheng cheaungkhangchi ly mymychi amtheaung naira nga ai nai hnei takeng u ai. Kai ai py palo u ai,” napi.

³ARENG my Juda mipui hawi Jerusalem mary i khumichi teng y, “Thawn vai y rai nai nangchi i li ly thawn u. Nangchi i choh tichi ai kabeng alengchi theung y hei u moh.

⁴Nangchi i ARENG, napi nai kai hawi nangchi i Leu Maikawm asa nai ly patawm u. Nangchi Juda mipuichi hawi Jerusalem mary i khumichi awi, kai teng y nangchi i tlang a-au u. Huna nai kamta so y lawh baly nangchi i sa tamang nai kamngo deaungkho y, kai i kado theu naira ly mai kamta angveaung ai. Huni mai pathym ai nai khumi leaungrei py awm ai ny y,” napi.

⁵Juda pri verei y baw eng u! Raawi amchang iy tao pajeng parai naimy aeu u! Juda mipuichi hawi Jerusalem mary i khumichi ai amtangra marychi mang y angpreng ai nai thui pi u.

⁶Zion mary mang y chei tapai u! Chymme naira mang y angpreng u! Patyh u moh! ARENG my khri pa-rei phra naira hawi ka-jeira ai tosyh mang dengdairei ang tym hai ai.

⁷Aeungra i nai ang theu nai khrangsi kamta, Khumi cheng cheaungkhangchi ai taphra ai nai keung ly ang jeu dudu bo. Ni ly Juda pri y taphra ai nai ang jeu bo. Juda marychi ly phra seaungkhrang naimy khumi angso savai tlang vui ai.

⁸Hunai deaungkho y paisiu akhiu iy vo tangam u. Ati mana nai mo nabaly ARENG i khri pa-rei kado theu nai ly Juda pri mang y patyp jo rai nai deaungkho y ne.

⁹ARENG my, “Huni kani y samrangchi hawi samrang i bangtangchi ly paleung phra atho di u ai. Pathyp pi nai keungchi ly lyh u ai i, amochi ly mynkym u ai,” napi.

¹⁰Huna nai khala kai ly “Aw ARENG, nang ly Jerusalem mary i khumichi ai li-tapawp vui lawh ly! Tlamsa naira nga ai, nanai nangmy leu pei i py, vai ly nichi i kaneaung y haisau padawi lawh bo,” napi.

¹¹Khutaha daichi ka-vymra i ali kabi ly aho ai, nanai Jerusalem mary i khumichi thai u nai neng kani ly ang tym ai. Huni ali ly choh ali pakheang ai nai aho nai ny y.

¹²ARENG i leu pei nai kamta aho nai ali ly huni tleaung y khri pa-rei ho ai. Mymy i khumichi tlang tleaung y vai, pajeng nai keung ly ARENG mymy kypkyp ne.

¹³Khen u cham, paleung ka-e ly khupanym kamta ang jeu ai. Ni i tavai ka-richi ly ali lengli hawi atawm iy, nichi i keaungngochi ly ahmtlauchi tleaung y rang nai ne. Kaichi ly sum bo! kaichi ly taham si lawh bo ly!

¹⁴Aw Jerusalem mary, nang ly tlamsa naira nga ai nai nangmy i paleung kamngo apachai ba. Nang ly hawi y nai katauchi dawn veangveang rai a?

¹⁵Dan pri mang i jeu nai savai hawi Ephraim mawi aheungchi mang i mo kamtheungchi my satang hawi y naichi thai hai bo.

¹⁶Nichi ly pri kamlo mang i dengdairei paleung ka-echi ang jeu u bo, nanai khumi cheng cheaungkhangchi teng y pany hai iy, Jerusalem mary y thai hai u bo. Paleung ka-echi ly Juda marychi ai ryh nai katyn sa u ai.

¹⁷Nichi ly li typ nai khumichi kamta, huni mary ai katanmeuh ai. Ati mana nai mo nabaly Juda pri ly ARENG ai tiu u nai deaungkho y ne. Hini ly ARENG my thui nai leu ne.

¹⁸Aw Juda pri, nang ly nangmy i awm nai, sa nai saichi molam y hina naichi tym haibo. Nang i paleung y haisau hawi thun nai kamta, nang ly nangmy i kamngo deaungkho y, hini patang naira avum nai ne.

¹⁹Kai i paleung pathym no-ei na! kham pajau y na pa-rei no-ei na! Kai i paleung khri pa-rei ahyn thlyhthlyh na! Kasa them nai bo! Kai ly awm py thai y bo. Baw eng nai katyn hawi tavai tiu aeu nai raawichi py kathai bo.

²⁰Ka-jeira ly harei bo baly harei tym dudu nai ne. Pri verei py phra seaungkhrang naimy awm bo. Achi i taichi ly tlenrei khyhmy anawi pawn iy taira i kanih jang naichi py aseih piupa veng bo.

²¹Kai ly tavai atiu nai ai mana tanrei kakra kaneu ai mo? Baw katyn mana tanrei thai veangveang ai mo?

²²ARENG my, “Kai i khumichi ly akhum parai; nichi ly kai ai pany u y. Nichi ly hawi y nai deaungdichi hawi atawm; nichi teng y pany thai naira by y. Nichi ly hawi y sa naira y kyh chawn u teu i py, kahawi sa ai nai ly kawp u y,” napi.

²³Kai ly khaileaung y khen nai khala, huni ly mo cha by y. Kani khusang ai khen nai khala py, kangvang niu y.

²⁴Kai ly mawichi mang y khen bi nai khala, mawi katheang kalenchi ly ahyn ka-lau nai ne.

²⁵Kai ly khumi leaungrei ai py kaniu y; tavo bawibawichi malawn py akheang pawn veng bo.

²⁶ARENG i khri pa-rei kado theu nai haiho molam y paitiu khuta hawi nai pri ly tui by y nai daichi ka-vym lawm iy, marychi py phra seaungkhrang veng bo.

²⁷(Khaileaung bomverei ly daichi ka-vym lawm vui teu i py, phra be ai ny y, nanai ARENG my leu pei yb nai ne.)

²⁸Khaileaung ly vo tangam ai; kani khusang ly veng pam na bo. ARENG my leu pei chum baly mymy paleung ly takhra lawh ai ny y. Paleung y dawn pasym chum baly mymy ly palai teang ai ny y.

²⁹Keaungngo atang nai risachi hawi, thailiho pa nai khumichi i katyn thai nai khala, khumi bawibawichi ly angpreng u pawn ai. Khumi phyreichi ly thengreung theung y py, phyreichi ly lengseaungchi salo y py angpreng u ai. Mary bawibawichi ly harei awm khyh ai i, khumi angso savai tlang nai lawm ai.

³⁰Aw Jerusalem mary, nang ly taham si! Nang ly ati mana nai ateaung kamsen jeaung amthyp lawh mo? Ati mana nai y vang kateng lengseaungchi amthyp iy, nang i meichi ai an pathym lawh mo? Nang ly nangmy ai atyhtyh naimy ka-pu sa lawh ly! Nang i tavawichi my nang ai ang khai su veng bo. Nichi ly nang ai padei ai nai ngai u nai ne.

³¹Deaungdi tapen ai achai nai neampachy i raawi, chanau chalu tapen nai neampachy i hang nai raawi ka-tawm katyn thai nai ne. Huni raawi ly akawm iy ahyn thlyhthlyh nai Jerusalem mary i katyn ne. Ni my, “Kai ly taham si! Nichi ly kai ai tleh ai nai jeu u dudu bo!