Read Khumi Chin JEREMIA 40 Bible Online

JEREMIA 40 - Khumi Chin bible

JEREMIA 40

¹Tavai lu areng Nebuzaradan ly Ramah mary y kai ai kawmchengra i nai su pi chum nai khala, ARENG ly kai teng y leu ang pei nai ne. Kai ly Babulon mary y langheng hawi nai takhra Jerusalem mary i khumichi, Juda khumichi hawi vanrei huni mary y abang nai ne.

²Tavailu areng ly kai ai, kaimyni leaung nyhrei ka-vum sa ai nai palau iy, “Nang i ARENG Tameuh ly hini pri taphra ai nai pajei nai kamta,

³vai ly ang sa pi khyp bo. Hina nai tym nai ly nang i chengchi my ARENG i tlang tleaung y kamngo sa iy, mymy i leu tangai u y nai deaungkho y ne.

⁴Vai ly nang i kiu lengngiera i sengkrychi kaimy su pi ai. Nang ly kai hawi vanrei, Babulon mary mang y abang ai nai ngai baly abang. Nang ai hawihai palai kang kry ai. Abang ai nai ngai y baly awm pajau. Pri verei y nangmy ngai nai meingtym chei pajau,” napi.

⁵Kaimy pathang y nai khala y, Nebuzaradan my thui bi i, “Juda marychi i vui samrang i bangtang kalen y Babulon samrang my khai pi nai Shaphan i katu, Ahikam i chapo Kedalia teng y vawi teang iy, ni hawi vanrei mipuichi theung y awm ba, ti y baly nang my chei ai avo naira y chei ba,” napi. Hunaibaly ni ly langseaung hawi cha nei vawn phyrei syn ai nai ang pei iy, kai ai khuleaung amsa hai.

⁶Kai py Kedalia teng y chei iy, Mizapa mary mang y awm rai nai khumichi hawi vanrei kaawm bo.

⁷Juda tavaimi miteaung keh phyreichi hawi, tavaimi risa phyreichi ly tavai kasum apei u y. Nichi ly Ahikam i chapo Kedalia ai Babulon samrang i bangtang kalenra y khai iy, Babulon mary mang y langheng hawi naira abawi y nai khumichi ai peang bo, nanai thai u. Hini khumichi ly pri theung y mawn keh nai khumichi ne.

⁸Hunai deaungkho y Nethaniah i chapo Ismaela, Kareah i chapo Johanan hawi Jonathan, Tanhumeth i chapo Seraiah, Netopha mary y awm nai Ephai i chapochi hawi, Maaka mary i Jezaniachi ly mychi i khumichi hawi vanrei, Kedalia i awm nai Mizapa mary y tym u bo.

⁹Huna nai khala y Kedalia my, “Nangchi ly Babulon chengchi teng y kasum apei ai nai jeira by y, nanai nangchi teng y kai leu adeu mang. Hini pri y saleaung khuteng pala iy, Babulon samrang i kalop so u. Nangchi i vui cheaungkhangra y hawi ai.

¹⁰Kai ly Mizapa mary y awm iy Babulon chengchi ang tym nai neng khala, nangchi i jeng y sa pi ai. Nangchi ly kreip hang, thengthai hawi olive asituichi kachu iy, nangmychi i avangchira y awm u,” napi.

¹¹Hina nai thymthang khala y Babulon samrang ly Israela cheng phyreichi ai Juda pri y awm ai nai pei iy, Shaphan i katu, Ahikam i chapo Kedalia ai samrang i bangtang kalen y palyn nai satang ly Moba pri, Ammon pri, Edom pri hawi takhra prichira y awm nai Hebrai cheng bawibawichi thai u nai ne.

¹²Hunai deaungkho y Israela cheng bawibawichi ly mychi aheidan nai meingtym tleirei i dengdairei, Juda pri y vawi u teang bo. Nichi ly Kedalia i awm nai Mizapa mary y tym u baly kreip hang hawi thengthai neangneangchi pakym u nai ne.

¹³Naibaly Johanan hawi kasum apei y nai tavaimi risachi i lu sa naichi ly Kedalia awm nai Mizapa mary y tym u i,

¹⁴Kedalia teng y, “Ammon samrang Baali ly nang ai padei ai nai molam y Nathania i chapo Ismaela ai pato bo, nanai nang ly pany y a?,” nanai deng. Na i py Kedalia ly huni leu ai ym y.

¹⁵Hunaibaly Johanan my, “Ismaela ai padei ai nai kai ai pei. Padei nai keung ai ami py pany y leang mang. Ati mana nai nang ai padei ai nai pei lawh ai mo? Huna nai sa baly nang teng y tym achu nai Juda chengchi ly aheidan iy, Juda pri y awm rai nai khumichi tlang tleaung y ka-jeira avum ai,” nanai ka-vym y thui pi bo.

¹⁶Na i py Kedalia my, “Huna nai ly so moh! Ismaela i satang nang i thui nai leuchi ly teng y leang,” napi.