Read Khumi Chin JEREMIA 46 Bible Online

JEREMIA 46 - Khumi Chin bible

JEREMIA 46

¹ARENG ly pri cheaungkhangchi molam y kai teng y leu ang pei nai ne.

²Aikupta pri satang molam y mymy ly hina nai kamta leu pei bo. ARENG ly Josia i chapo, Juda samrang Jehojakim i samrang atheng nai palyh saneng y Euphrat tavo sahawi Kakhemish meingtym y, Babulon samrang Nebukhadnezar my tiu nai Aikupta samrang Pharoniko i tavaimichi molam y leu pei nai ne.

³“Aikupta tavailu arengchi my, ‘Nangchi i khopuichi aeng yb iy tavai thau u!

⁴Nangchi i keaungngochi ai ateaung amthyp hai iy atang u! Nangchi amjynta iy tamo lukhym amym u! tivichi kato u! Tamo baichu amchiu u!,” nanai aeu u bo.

⁵Na i py ARENG my, “Kai i niu nai ly ati mana nai mo? Nichi ly jei i nithun mang y anaw u bo. Nichi i tavaimi risachi ly sum u nai ne. Nichi ly khri pa-rei jei u nai deaungkho y nithun mang y khen y naimy, athorei my angpreng u kaliki na bo,” napi.

⁶Angpreng rang naichi ly tleaung u y; Tavaimi risachi py tleaung u y, Nichi ly tosyh ngan Euphrat tavo sahawi y athei iy atlym u nai ne.

⁷Tui lem nanai tavo kamta py, Naing tavo tui kamta py, tavai thau nai khumi ly ami mo?

⁸Tui lem nanai tavo kamta py, Naing tavo tui kamta py, tavai thau nai ly Aikupta pri ne. Aikupta pri my, ‘Kai ly tavai thau iy khaileaung pri verei kup be ai. Marychi hawi mary i khumichi ai taphra ai.

⁹Keaungngochi lyn u; ka-richi awi, athorei my amli u! Khupui syn nai Ethiopia neampachochi hawi Libia neampacho, Juda neampacho thailiho syn nai tavaimichi awi, tavai thau u jau,’ nanai thui bo,” nanai ARENG my leu pei nai ne.

¹⁰Vaini ly ati cheaungkhang sa thai nai keung ARENG i kani ne. Mymy ly vaini my vawitheung tha ai. Mymy ly paleung ka-echi ai vaini my pajeng ai. Mymy i haisau ly nichi ngan bym pa-rei cha iy nichi i thi bym pa-rei nei ai. Vaini ati cheaungkhang sa thai nai keung ly Euphrat tavo sahawi tosyh ngan mang y, tawnbawichi apathyp nai ne.

¹¹Aikupta pri khumichi awi, Kilead pri mang y chei iy, asi akhangchi hau u! Nangchi i asichi ly dau by y. Nangchi i no-na hawi hai pajau y leang.

¹²Khumi cheng cheaungkhangchi ly nangchi i kangji nga nai thai u veng bo. Nangchi i vo nai raawi khumi lutengchi my thai u nai ne. Tavaimi risa ly leaung leaungrei adeng nai deaungkho y, leaung nyhrei khaileaung y atlym hawi mei bo.

¹³Aikupta pri y tiu ai nai Babulon samrang Nebukhadnezar tym nai khala y, ARENG ly kai teng y leu ang pei nai ne. Mymy ly

¹⁴“Aikupta marychi napi nai Mikadol, Memphi hawi Tapaneh marychi teng y, ‘Nangchi ly nangmychi i vui amtang ai nai angvei u rym; nangchi teng y awm nai ngiereichi ly tavai keung y phra hai ai!

¹⁵Sa thai naira awm nai nangchi i tameuh Apis ly ati mana nai atlym vui lawh mo? Ni ai ARENG my pakhau bo!’

¹⁶Nangchi i tavaimi risachi ly athei iy atlym u bo. Nichi leaung leaungrei ly ‘Jeu u kaliki! Achi ly amychi i saleaung khuteng pri mang y vawi u sina. Paleung ka-echi i haisau i nai tleaung ai nai angpreng u sina!,’ nanai thui u nai ne.

¹⁷“Aikupta samrang ai, ‘Nga sang nai ngo thai y nai khumi, ali laawm pui,’ nanai amyn kangtha pei u.

¹⁸Ati cheaungkhang sa thai nai keung kai, ARENG ly samrang ne. Kai ly heng nai Tameuh ne. Tabor mawi ly mawi cheaungkhangchi tleaung y asang keh nai kamta py, Karamela mawi py pangli sahawi y asang parai naimy awm nai kamta py, nangchi ai ang tiu ai nai khumi ly khri pa-rei atho awm ai.

¹⁹Aikupta pri khumichi awi! langheng y ang hawi ai i, angvei u rym. Memphi mary ly khumi angso savai tlang nai khutaha daichi ka-vym lawm ai.

²⁰Aikupta pri ly tosyh mang i saimawm my kei nai veung hawi nai si nu hawi atawm.

²¹Alai nai tavaimichi malawn py si chochi kamta jeaungmang u nai ne. Nichi ly amtang u y naimy angpreng u pawn bo. Nichi sum u ai nai kani, taham kasi avum ai nai neng kani ly tym dudu nai ne.

²²Paleung ka-e tavaimichi kasa dudu baly Aikupta pri ly leu sa nai pavui kamta preang nai ne. Khumichi my dengkeaung ai paliu nai kamta paleung ka-echi ly ni ai marengchi hawi tiu u bo.

²³Nichi ly thengreung pa-ngeaung nai kamta tiu u bo. Nichi i khumichi ly kati lei y na pa-rei nawi nai deaungkho y, nichi i tavaimi vuikanai ly akhuchi tleaung y malawn py nawi nai ne.

²⁴Aikupta khumichi ly kangji nga u bo. Nichi ai tosyh mang i khumichi my pajau vui bo; Hini ly kai ARENG i thui nai leu ne,” napi.

²⁵Israela chengchi i Tameuh, ati cheaungkhang sa thai nai keung ARENG my, “Kai ly Thebe mary y awm nai Ammon tameuh ai Aikupta pri, Aikupta tameuhchi, samrangchi hawi vanrei pajeng ai. Aikupta pri samrang hawi ni ai paleung pado nai ngiereichi ai pajeng ai.

²⁶Nichi ai padei ai ngai nai Babulon samrang Nebukhadnezar hawi, tavaimichi i kiu y au ai. Na i py mo mang y khumichi ly jangni khala i kamta, Aikupta pri y awm u ali teang ai. Hini ly kai ARENG i thui nai leu ne,” napi.

²⁷“Kai i khumichi awi, jei u moh, Israela khumichi awi, kaso tahyn theu u moh. Nangchi ai langheng y hawi iy dei u ai nai pri, huni pri kamlora i dengdairei, nangchi ai kaimy atleu ai. Nangchi ly vawi u ali teang iy tlamsa naimy awm u ai. Chymme naira awm ai; ami my py nangchi ai ka-jeira tym hai ai ny y.

²⁸Kai ly nangchi teng y kang jeu iy nangchi ai atleu ai. Kaimy nangchi ai ahei hai nai pri cheaungkhangchi ai taphra ai. Na i py nangchi ai kang taphra y leang mang. Kai ly nangchi ai pajeng y naimy khai ai ny y teu i py, kang pajeng nai khala ly kamlau ryrei kang pajeng ai khyh. Hini ly kai ARENG i thui nai leu ne,” napi.