Read Khumi Chin JEREMIA 48 Bible Online

JEREMIA 48 - Khumi Chin bible

JEREMIA 48

¹Moba pri molam y ati cheaungkhang sa thai nai keung ARENG i leu pei nai ly hina nai ne: Nebo mary i khumichi ai palau u; nichi i mary ly phra veng bo! Kiriathaim mary ai ly tiu iy la vui bo i, huni mary i amtangrachi ly taphra vui nai y, mary i khumichi ly kangji nga u nai ne.

²Moba pri i phum-ang ly tama veng bo. Paleung ka-echi ly Hesabon mary peang vui iy, Moba pri ai tamyh vui ai nai tau u nai ne. Madmanah mary ly tyn kryh y naimy awm ai. Tavaimi risachi ly huni mary y tavai tiu u ai.

³Horonam mary i khumichi my, ‘Khrukhra naira! Tamyh naira!,’ nanai aeu u bo.

⁴“Moba pri ly phra veng bo; cho deaungdichi i vo hang nai raawi tangai u.

⁵Luhith mawi akham lam jeungrei y nichi i vo sang-eng nai katyn hawi, Horonam mary mang y satla nai angthiu lam jeungrei y, paleung bi naimy aeu nai raawichi py tangai u.

⁶Nichi my, ‘Nangchi tleaung u ai nai angpreng u kaliki! ‘Khutaha daichi ka-vymra i keaungngo kano kasau karam kamta angpreng u!,’ nanai thui u bo.

⁷“Moba pri awi, nang ly nangmy i atho hawi nang chawn nai ai a-ym nai ne. Na i py vai nang ly sum naira avum ai. Nang i tameuh Khemosa py, ni i samrang chapochi hawi pathyp pi nai keungchi raurei, pri pala naira avum u ai.

⁸Mani mary py taphra naira i nai tleaung ai ny y; leaunghawi py, adym py phra mei ai. Hini ly kai, ARENG i thui nai leu ne.

⁹Moba pri i vui tapreaung leungcheng leng u; Huni pri ly kra y nai sala y phra ai. Huni pri i marychi ly phra iy, khumi angso savai tlang naira lawm ai,”

¹⁰(ARENG i kalop ai paleung hawi verei so y nai khumi ly amsawi lawi kalei sy! Mymy i haisau hawi tleh iy padei y nai khumi ly amsawi lawi kalei sy!)

¹¹ARENG my, “Moba pri i khumichi ly chymme naimy awm jo reng nai deaungkho y, pri pala naira avum u vai y nai ne. Moba pri ly laawm harei i nai laawm harei mang y patlai y; tahawi py tahawi y iy angdeang jo nai kreip hang hawi atawm; mui hawi kalum kathau phra y naimy, hawi veangveang nai ne.

¹²“Hunai deaungkho y Moba pri ai kreip hang kamta lai vui nai khumichi ai, kaimy pato nai neng ang tym ai. Nichi ly huni pri i kreip hang chy-ychi lai vui iy, dei lawm na pa-rei pakhau piu ai.

¹³Huna nai khala, mychi ym u nai Bethela tameuh ai Israela chengchi my paleung phra u nai kamta, Moba pri khumichi ly mychi i Khemosa tameuh ai paleaung phra u ai.

¹⁴Moba neampachochi awi, nangchi ly ati mana nai y nangmychi kypkyp ai khumi soraichi, tavai keung i soraichi, nanai thui u lawh mo?

¹⁵Moba pri hawi marychi ly phra iy nichi i vui vawi patyp nai thawndeang deaungdichi ly tleh naira avum u ai. Kai ly ati cheaungkhang sa thai nai keung, napi nai samrang ne. Huni ly kai i thui nai leu ne.

¹⁶Moba pri i taham kasi ly kasa dudu bo i, huni pri phra seaungkhrang ai nai neng ly kra y naimy tym ai.

¹⁷“Tengpang sahawi y awm nai khumichi awi, huni pri i vui vo tangam u; Huni pri i amyn amthang nai pany nai khumi bawibawichi awi, khri pa-rei sa thai naira awm nai hini pri ly anawi seaungkhrang iy, huni i phum-ang hawi sa thai naira ly jum veng bo,’ nanai thui u.

¹⁸Dibon mary y awm nai khumichi awi, nangchi ly tahm awm nai meingtym i nai satla iy, spryh tleaung y ateh u. Moba pri ai phra hai nai keung ly hini meingtym y tym iy, nang i amtangrachi taphra veng bo.

¹⁹Aroh mary y awm nai khumichi awi, lam teng mang y angdo iy ajeng jo ly preang nai khumichi teng y atiti tym naichi deng cham.

²⁰Huni khumichi my, ‘Moba pri ly phra veng bo,’ ‘Huni pri i vui vo u; huni pri ly kangji nga nai ne. Moba pri ly phra veng bo!, nanai satang ly Arnon tavo jeungrei aeu u,’ nanai pathang u ali teang ai.

²¹“Holon mary, Jahaz mary, Miphet mary,

²²Dibon mary, Nebo mary, Beth Diblathaim mary,

²³Kiriathaim mary, Betkamula mary, Betmeon mary,

²⁴Kerijo mary hawi Bozarah mary napi nai mawi aheung adym y awm nai mary bawibawichi ly pajeng naira avum u bo. Kamlo kang sa i Moba mary ngiereichi py, pajeng naira avum u nai ne.

²⁵Moba pri i sa thai naira ly jum veng bo. Hini ly kai ARENG i thui nai leu ne,” napi.

²⁶ARENG my, “Moba pri ly kai ARENG ai tiu nai deaungkho y, huni pri ai pavui hai u. Ni ly my i amleura y jawn tlawntlan ai. Khumichi my py ni ai panui hai ai.

²⁷Aw Moba pri, Israela pri khumichi ai nangmy mana tanrei panui hai mo, nanai pany jo ba. Nang ly nichi ai kangviu sara, damra kamkawm hawi vanrei patiu nai palawn iy ana nai ne.

²⁸“Moba khumichi awi, nangchi ly nangmychi mary i nai theu u! Tahi tangam mang y chei ly awm u! Amkeu sala y tabu sa reng nai apryn buhuchi kamta so u.

²⁹Moba pri ly khri pa-rei amlyh am-e parai. Khumichi ly mana tanrei paleung len iy, khumi aniu y naimy amlyh am-e u nai py, mana tanrei amy i vui hau khyh na mo, nanai py kai pany nai ne.

³⁰Nichi i amlyh naichi ly atira y py tym y; nichi i sa naichi py akan y. Nichi i amlyh am-e nai py kai, ARENG pany.

³¹Hunai deaungkho y kai ly Moba pri khumi bawibawichi hawi, Kir Here mary i khumichi i vui meikatui tla ai.

³²Jaza mary i khumichi i vui vo hai nai tleaung y, Sibmah mary i khumichi i vui y kai ly kavo ai. Aw Sibmah mary, nang ly pangli kadei ai katlen prei iy, Jaza mary y tym pa-rei amjang nanai kreip keung hawi atawm. Na i py vai, nang i nisa thengthai athaichi hawi, kreip keungchi ly phra be veng bo.

³³Amti amjang thawn nai Moba pri i amo theu naira ly vym pi veng bo. Kreip athai ati nai angawmra i kreip hangchi leaung y leang bo. Kreip athai ati iy amo theu aeu nai khumi py, leaungrei py by y leang bo.

³⁴“Hesabon mary hawi Elealeh maryra i khumichi vo nai raawi ly Jaha mary y tym pa-rei thai u nai ne. Huni raawi ly Zorath mary, Horonam mary hawi Ekala mary i dengdairei py thai pajau. Nimarim micheaung tui py kang veng bo.

³⁵Kai ly Moba pri khumichi ai mawi saleungchira y leng patlum nai kapathyprachi talam nai hawi, mychi i tameuhchi teng y apathyp naichi anawn hai ai. Hini ly ka, i ARENG i thui nai leu ne.

³⁶“Hunai deaungkho y Moba khumichi hawi Kir Here mary i khumichi ly mychi i nang nai yhmtheaung katuichi chau pawn nai y, kai i paleung ly si tlaiveu keung y khulym ai byhlyh eng nai khumi kamta, huni khumichi i vui y vo tangam ai.

³⁷Khumi luteng ly sam hawi labeaung mui avau u bo. Nichi ly mychi i kiubanchira tamo ajyn iy, paisiu kanih apam u bo.

³⁸Moba pri i yhm amphu ngierei salo y py, khumichi amkheng achu nai khaileaung ka-ho tleireira py, vo tangam u nai ny y baly takhra ati sai py niu y. Ati mana nai mo nabaly kai ly teaung ai ngo y nai chy-y ai pakawi piu nai kamta, Moba pri ai taphra vui nai deaungkho y ne.

³⁹Moba pri ly anawi jawn veng bo! Vo tangam jau! Moba pri ly tahm by y leang bo. Huni pri ly phra seaungkhrang nai deaungkho y, tengpang sahawi i khumi bawibawichi ly huni ai panui hai u bo. Hini ly kai, ARENG i thui nai leu ne,” napi.

⁴⁰Pakhichi kadai nai ahmtlau kamta, paleung ka-echi ly Moba pri tlang tleaung y ni kathiu ai, nanai ARENG my leu pei yb bo.

⁴¹Marychi hawi amtangrachi ai ly peang vui ai. Huni kani y Moba tavaimichi ly deaungdi tapen ai nai achai nai neampachy kamta, jei hyn u ai.

⁴²Moba pri ly kai ai tiu lawh nai deaungkho y tamyh naira avum i, pri harei malawn py, amlum ai ny y leang bo.

⁴³Moba pri i khumichi ai jei hyn hai naichi, hum angawmchi hawi, deaungchi my ly ajeng rym nai ne. Hini ly ARENG i thui nai leu ne.

⁴⁴Jei hyn ai hawi naira i law tleaung ai nai atho sa naichi ly huni angawm theung y tla u ai. Hum angawmra i lyn kalau nai khumichi ly deaungchira y man u ai. Ati mana nai mo nabaly Moba pri ai tamyh ai nai neng ly kaimy khai takhra yb nai deaungkho y ne.

⁴⁵Jeaungmang iy patang naira avum nai khumichi ly Hesabon mary y abyh ai nai hau u nai ne. Na i py, vaichi khala Sihon samrang my peang nai Hesabon mary ly mai angveaung pun veng bo. [12]Mai ly tavai atiu ham parai nai Moba khumichi i khuteng meingtymchi hawi mawi ka-sangchi ai kang nai ne.

⁴⁶Moba khumichi ai pahen u! Khemosa tameuh ai chiu nai khumichi ly tamyh naira avum u nai ne. Nichi i cho chanauchi py langheng hawi naira avum u bo.

⁴⁷Na i py mo mang i neng khala ARENG ly Moba pri y nang chawn hai ali teang ai. Hini bawibawichi ly Moba pri tlang tleaung y tym ai nai atitichi molam y ARENG i pei nai leuchi ne.