Read Khumi Chin JEREMIA 49 Bible Online

JEREMIA 49 - Khumi Chin bible

JEREMIA 49

¹ARENG my Ammon khumichi molam y leu pei nai ly “Israela chengchi ly ma mang y mo? Nichi pri i vui ama hai ai nai keung leaungrei py by y a? Nichi ly ati mana nai y Mole tameuh ai chiu nai khumichi teng y, Kad cheng theaung i khu ka-peang lawm vui iy, huni meingtym y awm ai nai pei u lawh mo?

²Na i py kai ly Rabah mary i khumichi ai tavai atiu nai katynchi thai ai nai neng tym hai ai. Huni mary ly phra naimy huni i avangchi py mai y kang ai. Huna nai khala y Israela chengchi ly mychi i pri peang vui nai khumichi kiu i, pri nga u ali teang ai.

³Hesabon mary i khumichi awi, vo u! Nangchi i Ai mary ly phra veng bo! Rabah mary i neampachychi awi, paleung si nai patei u! Paisiu kanih apam iy paleung si nai patei u. Tapai taveang naimy angpreng u. Nangchi i Mole tameuh ly my i pathyp pi nai keungchi, samrang i chapochi hawi vanrei, pri pala nai avum u ai.

⁴Ka-ym by y nai khumi chengchi awi, nangchi ly ati mana nai y amlyh u mo? Nangchi ly atho bai u bo. Nangchi ly ati mana nai y nangmychi i sa thai naira haiho ai a-ym iy, ‘Achi ai ami my py ang tiu vam ai ny y,’ nanai thui u lawh mo?

⁵Kai ly tengpang sahawi i khumichi ai, nangchi ai tiu hai ai nai deaungkho y, nangchi ly angpreng u ai. Khumi luteng malawn py, amy tleaung ai nai vui preang u ai nai deaungkho y, nangchi i tavaimi risachi ai pangym pi teang ai nai khumi leaungrei py awm ai ny y.

⁶“Na i py mo mang y kai ly Ammon khumichi ai, nang chawn hai teang ai. Hini ly kai ARENG i thui nai leu ne,” napi.

⁷Ati cheaungkhang sa thai nai keung ARENG ly Edom pri molam y, “Edom khumichi ly paleung ka-dawn kahawi by y na bo sai a? Nichi i khumi kachengchi py, ati mana sa ai nai avo mo, nanai tau pei pajau y na bo sai a? Nichi i cheng nairachi ly tama be veng bo a?

⁸Aw Didan mary i khumichi awi, alengli iy angpreng u jau! Aheu u pawn! Esaw i kangpreangchi ai pajeng ai nai neng tym dudu nai deaungkho y, kai ly nichi ai tamyh ai.

⁹Khumichi ly kreip athaichi jaw nai khala, kreip champichira y athai maidenrei khai mai reng. Vum y damrachi tym nai khala py, mychi i ngai nai vawnsaichi naini la reng nai ne.

¹⁰Na i py kai ly Esaw kangpreangchi teng i awm nai vawnsai ngiereichi la pi veng ai. Nichi aheu bi ai nai ngo y pa-rei, nichi i aheura meingtymchi patheaung pawn ai. Edom pri khumi bawibawichi ai katamyh veng bo. Nichi ly leaungrei py by y leang bo.

¹¹Nangchi i nurochochi ai kai teng y daw jo ly kaimy khen kry ai mang. Nangchi i neampachy lumaichi ly kai teng y abyh pajau nai ne.

¹²Pajeng naira avum ai nai avo y naichi malawn py, pajeng naira avum u lawh baly, nangchi ly pajeng naira khau nei y naimy awm u ai, nanai athang khai u a? Nangchi ly meitang khyp, kamngo khau nei u ai!

¹³Bozarah mary ly niu nai khumichi jei hyn ai hawi nai, khumi angso by y nai meingtym lawm hai ai nai py, khumichi ly huni mary ai panui hai iy, huni mary i amyn ai vaineng abeu naira y teaung ai nai py, kaimy kypkyp my vaineng abeu nai ne. Tengpang sahawi i avang bawibawichi ly phra seaungkhrang naimy awm jojo ai. Hini ly kai ARENG i thui nai leu ne,” napi.

¹⁴Kaimy, “Aw Edom pri awi, ARENG teng i leu pei nai kanga bo. Mymy ly khumi cheaungkhangchi teng y, nangchi i tavaimichi pangym iy Edom pri ai tiu u. Tavai thau ai nai angvei u rym, nanai thui pi ai nai savai leaung rei kang pato pi bo.

¹⁵ARENG ly nangchi i pri ai atho bai hai iy, ami py nangchi ai tahm ang khai u ai ny y.

¹⁶Nangchi i amlyh am-e naira my, nangchi ai ang tapawp bo. Nangchi i athang khai nai kamta, ami py nangchi ai jei u y leang. Nangchi ly mawi saleungra i lengseaung ka-sang salo y awm u nai ne. Na i py hunai kamta ahmtlau tanrei ka-sang y awm u teu i py, ARENG ly nangchi ai pala kathiu ai. Hini ly ARENG i thui nai leu ne.

¹⁷ARENG my, “Edom pri tlang tleaung y tym nai taphra naira ly khri pa-rei jei hyn ai hawi nai deaungkho y, sahawi mang tako nai khumichi ly huni pri y tym nai atitichi niu nai khala, jei hyn iy kaso theu u ai.

¹⁸Sodom mary, Komora mary hawi, tengpang sahawi i avangchi ly taphra naira avum nai kamta, Edom pri py avum teang ai. Neng tanareichy malawn py, huni pri y awm ai nai leaungrei py awm ai ny y. Hini ly kai, ARENG i thui nai leu ne.

¹⁹Kai ly Jordan tavo jeungrei y awm nai daichi kabeng theung i dengdairei, heng-a nai sui tlai naira meingtym y theu nai khrangsi kamta theu iy, Edom chengchi ai mychi pri i nai paryh pawn ai. Hunaibaly kai ly huni pri y peang ai nai samrang leaungrei vawi takhra pi ai. Kai ai ami hawi pata pajau ai mo? Kai ai ami tiu pajau ai mo? Mani samrang ly kai ai awi pajau ai mo?

²⁰Hunai deaungkho y Edom chengchi i vui kai i sa yb nai leaungsaichi py, Tamen mary khumichi i vui kaimy paran yb nai leaungsaichi py, tangai u. Paleung ka-echi ly nichi i cho chanauchi ai malawn py, athorei my ryh phraiphro iy hawi vui ai. Hunaibaly nichi ly jei hyn u ai.

²¹Edom pri anawi nai khala khri pa-rei katyn amsau nai deaungkho y, khaileaung pri verei amchyh ai. Jei hyn naimy hang u nai katynchi py Akaba pangli katheaung mang khrairei thai u ai.

²²Kani mang dengdairei pakhi kadai naimy ni kathiu nai ahmtlau kamta, paleung ka-e ly Bozarah mary y tiu ai. Huna nai khala Edom tavaimichi ly deaungdi tapen ai nai achai nai neampachy kamta kaso theu u ai,” napi.

²³ARENG my Damaska mary i molam y leu pei nai ly “Hamath mary hawi Arpet mary i khumichi ly satang hawi y nai thai u nai deaungkho y, paleung bi paleung mawn iy paleung phra u nai ne. Paleung mawn nai ly pangli tui sampyhchi kamta, nichi i tlang tleaung y tym nai deaungkho y nichi ly paleung awmnem pajau y bo.

²⁴Damaska mary i khumichi ly paleung atho di iy, kaso theu naimy preang u pawn bo. Nichi ly deaungdi tapen nai neampachy kamta no patang iy, khri pa-rei paleung ngari u nai ne.

²⁵Vaichi khala amo theu ai hawi iy amyn amthang nai huni mary ly khumi angso savai na veng bo.

²⁶Hunaibaly huni neng kani tym nai khala y deaungdi ka-cheangchi hawi tavaimi risa bawibawichi ly mary lamchira y tleh nai avum u ai.

²⁷Kai ly Damaska mary apaichi hawi samrang Benhadad i samrang yhmchi ai mai y kang ai. Hini ly kai, ARENG i thui nai leu ne,” napi.

²⁸ARENG ly Babulon samrang Nebukhadnezar my tiu iy pajau vui nai Keda cheng theaungchi hawi Hazor prichi molam y, “Keda cheng theaungchi teng y chei iy tiu u. Huni nisi mang i cheng theaungchi ai tamyh u!

²⁹Nichi i kanih yhmchi hawi beram kanghuchi ai py, taira y jang nai kanihchi hawi tai theung i vawnsai ngiereichi py lo pi u pawn. Nichi i kula-iuchi la pi pawn iy nichi teng y, ‘Nangchi i tengpang sahawi y jei ai hawi nai ka-jeirachi ang tym dudu bo,” nanai thui pi u!

³⁰“Hazor khumichi awi, kamlora y preang iy aheu u ai nai nangchi teng y kai, ARENG my kang pany hai bo. Babulon samrang Nebukhadnezar ly nangchi ai padei ai nai paran yb veng bo.

³¹‘Jeu u! achi ly chymme naira awm bo, nanai dawn nai huni khumichi ai tiu u sina! Huni khumichi i mary ly apai katheu hawi atleangra py by y; chymme naira py by y nai mary ne,’ napi.

³²“Nichi i kula-iuchi hawi tawnbawichi lo u! Kai ly sam kadawi vau naichi ai meingtym tleirei y ahei hai iy, meingtym tleirei y ka-jeira avum hai ai.

³³Hazor mary ly khivachi aeungra, khumi angso savai tlang nai meingtym lawm hai jojo ai. Huni meingtym y ami py awm ali bi ai ny y. Hini ly kai, ARENG i thui nai leu ne,” napi.

³⁴Juda samrang Zedekiah samrang lyn nai bo kra y rai khala y, ati cheaungkhang sa thai nai keung ARENG ly Elam pri molam y kai teng y leu pei nai ly

³⁵“Kai ly Elam pri ai sa thai naira len pa-rei palum nai keung thailiho pa nai bawibawichi ai tleh pawn ai.

³⁶Kani mang khuteng taki palyhra i dengdairei aho nai ali ly Elam pri mang y aho hai iy, khumichi ai meingtym tleirei y ahei hai ai. Huni patang nai khumichi tym y nai pri harei py awm ai ny y.

³⁷Elam khumichi ly mymychi ai padei ai ngai nai paleung ka-echi ai jei ai nai pa-rei kaimy sa ai. Kai ly khri pa-rei kado theu iy nichi ai tamyh ai. Nichi ai tamyh pawn ai nai pa-rei, tavaimichi kapato iy tiu hai ai.

³⁸Kai ly Elam samrangchi hawi lu sa naichi ai tamyh pawn iy, huni pri y kai i areng atehra tahyh ai.

³⁹Na i py mo mang y Elam pri khumichi ai nang chawn hai ali teang ai. Hini ly kai, ARENG i thui nai leu ne,” napi.