Read Khumi Chin JEREMIA 5 Bible Online

JEREMIA 5 - Khumi Chin bible

JEREMIA 5

¹Jerusalem mary i khumichi awi, nangmychi i lamchira y chei u! Tengpang sahawi y hau u! Adawn pasym u! Seng mang y chei iy hau u! Kahawi sa nai khumi, Tameuh i tlang tleaung y ka-ym awm ai nai atho sa nai khumi leaungrei niu pajau na a? Huni khumi ai nang avum lawh teu baly, ARENG ly Jerusalem mary i kamngo lawi hai ai.

²Nangchi my, ARENG ly heng nai ne, nanai vaineng abeu u teu i py, nangchi ly teng y nai vaineng abeu u nai ne.

³ARENG ly ka-ym awm nai ai ngai nai ne. Mymy ly nangchi ai pajeng teu i py, nangchi ly dawndan u y. Taphra i py thui parip nai nangchi ly tangai u y. Nangchi i paleung ly lengseaung tleaung py tang u i, uikheih y.

⁴Hunaibaly kaimy, hinichi ly khumi kamawnchi ne. Dawn pany thai y nai khumichi ly ARENG i kangai py, Tameuh i khai pi nai Reitachi py, pany u y nai deaungkho y hawi y naira sa u nai ne.

⁵Kai ly sa thai naira awm nai khumichi teng y chei iy, nichi teng y thui pi ai. Nichi ly ARENG i kangai pany u ai. Tameuh i khai pi yb nai reitachi pany u nai ne,” nanai adawn u bo. Na i py nichi bawibawi ly ARENG i sa thai naira khai su iy leu atangai u y nai ne.

⁶Huna nai deaungkho y daichi mang i khrangsichi ly nichi ai kei u ai. Khutaha daichi ka-vym i kasuichi ly nichi ai keileu keileu ai. Takai kheangchi py nichi i marychi sahawi y o iy, mary angam mang y theu nai khumi ngiereichi ai keileu keileu pawn ai. Ati mana nai mo nabaly huni khumichi ly kamngo nawi nai khyh chang y i, Tameuh ai avaw avawrei nithun thun u nai deaungkho y ne.

⁷ARENG my, “Kai ly kaimy i khumichi i kamngochi ati mana nai y kapahen ai mo? Nichi i cho chanauchi ly kai ai khai su iy, tameuh ka-chawichi i amyn y tau iy vaineng abeu u bo. Kai ly kaimy i khumichi ai kajeu kawi pa-rei kapacho teu i py, nichi ly ami i yhm hlau taphra iy, bimachi hawi tamang u bo.

⁸Nichi ly kajeu kawi iy po chiu nai keaungngo kasichi kamta, hang naimy yhm deaungpachi i ajuchi ai ngai tahau nai ne.

⁹Hina naichi molam y kai ly nichi i tlang tleaung y, pajeng y naimy awm ai nai avo na a? Hina nai mipuichi ai vawitheung tha y naimy awm ai nai avo na a?

¹⁰Kai ly paleung ka-echi ai kapato iy, nichi i kreip akhochi taphra hai ai. Na i py kreip keungchi myh pa-rei ly taphra hai ai ny y. Kreip changpichi ly kaimy peang y nai deaungkho y, hunichi ateng pawn ai nai paleung ka-echi teng y kaimy leu pei ai.

¹¹Israela hawi Juda mipuichi ly kai i leu pipi tangai u y. Hini ly kai, ARENG my thui nai leu ne, napi.

¹²ARENG i khumichi ly mymy i satang tengtang y naimy thui u nai ne. Nichi my, “Mymy ly ati sai py ang dawn hai ai ny y. Achi py ngari kamtang avum u ai ny y. Tavai ka-jeira hawi takang py avum ai ny y,” nanai thui u.

¹³Nichi my, “Amochi i leu ly ali cheichei teu; nichi thui ai nai ARENG i leu pei nai ati sai py by y leang. Nichi i thui nai kamta nichi teng y tym sy,” napi u.

¹⁴Ati cheaungkhang sa thai nai keung ARENG Tameuh my, “Jeremia awi, huni khumichi ly hina nai thui nai deaungkho y, kai i leu ly nang i labeaung y mai kamta lawm iy, nichi ly theng kamta lawm ai; mai ly nichi ai kang ai,” napi.

¹⁵ARENG my Israela mipuichi teng y, “Kai ly nangchi ai tiu hai ai nai pri kamlora i khumi kamkawm harei kang hawi ai. Nichi ly atho len iy jangni jangkhawn i khumi cheng, nangchi pany thai y nai leu katheu nai khumi cheng ne.

¹⁶Nichi i thailiho pa nai khumichi ly atho len iy, am-eaung jo nai tapreaung angawm kamta, pany y naimy padei u reng nai ne.

¹⁷Nichi ly nangchi i thengthaichi hawi teicha teineichi cha nei iy, nangchi i cho chanauchi ai tleh u ai. Nichi ly nangchi i beram kanghu hawi si kanghuchi cha u ai. Nangchi i kreip keungchi hawi thaidu keungchi taphra pawn ai. Nichi i tavaimi kamkawm ly nangchi i a-ym nai amtangra mary kakhawchi taphra pi pawn ai.”

¹⁸ARENG my, “Huni neng kanichi khala malawn py, kai i khumichi ai katamyh be ai ny y.

¹⁹Jeremia awi, Huni khumichi ly nang teng y, ‘Ati mana nai y ARENG ly hina naichi sa lawh mo,’ nanai ang deng u ai. Naibaly nichi teng y, ‘Nangchi ly Tameuh ai khai su iy, nangmychi i pri y my cheng takhra tameuhchi i kalop sa pi u lawh. Hunai deaungkho y pri takhra mang y, cheng takhrachi i kalop sa pi ai nai tla ai,’ nanai pathang pi,” napi.

²⁰ARENG my, Jakob i kangpreang hawi Juda mipuichi teng y thui pi:

²¹Mei awm ta-jai iy niu thai y, kano awm ta-jai iy thai y nai khumi, nangchi khumi ka-khumchi awi, tangai u.

²²Kai ly ARENG ne. Nangchi ly ati mana nai y kai ai jei u y nai mo? Kai i mo y ati mana nai y kaso theu u y mo? Kai ly pangli i vui khujyh, pangli tui sadawn pajau y ai nai khujyh kakhaw ly speungchi hawi jyh pi nai ne. Pangli ly tui sampyh len teu i py, huni khujyh ai ly sadawn pajau y. Tui sampyhchi ly amsau na teu i py, huni khujyh katlen pajau y nai ne.

²³Na i py nangchi khumi mipuichi awi, nangchi ly paleung tang iy tiu ai nai lam amphri vui i, kai teng i nai theu u veng bo.

²⁴Neng tleirei khuma kani hawi, kangkhym kani nai hai iy saneng tleirei, amti amjang pakym achu ai nai neng sa pi nai keung kai ai nangchi ly tahm khai u vai y.

²⁵Nangchi i sa tamang nai hawi kamngochi my ly amtheaung nairachi paka vui iy, nangchi teng i nai amphri hai veng bo.

²⁶“Kai i khumichi theung y khumi hawi y naichi awm. Nichi ly deaung hawi tavochi ai patym nai khumichi kamta, khumichi ai patiu ai nai amo u yb bo.

²⁷Mawi sara ly my i tavo theaungra y tavochi kawi hai nai kamta, huni khumichi ly mychi i yhmchira y, atiura i nga nai vawnsaichi hawi kawi hai bo. Hunai deaungkho y nichi ly sa thai naira awm iy nang chawn u nai ne.

²⁸Bym pa-rei cha ai nai nga iy veung py hawi u bo. Nichi ly hawi y naichi ai tem-ma by y pa-rei sa u nai ne. Nuro nukaichochi ai nichi i nga ai avo nai phychi py pei pi y. Pahyp y naimy ana naira avum naichi ai py, adyh adawi hai y.

²⁹“Na i py hini atitichi molam y nichi ai kai, ARENG my pajeng ai. Hini khumichi ai kaimy vawitheung katha ai.

³⁰Huni pri y lyh ai awm iy amso ngai ai hawi naichi tym nai ly

³¹amochi ly leu kateng thui u y; pathyp pi nai keungchi ly amo my leu pei nai kamta peang u bo. Kai i khumichi my py hina nai sa naichi ai ei u y. Na i py nichi ly kangkhym kani y ati sa u ai mo?”