Read Khumi Chin JEREMIA 50 Bible Online

JEREMIA 50 - Khumi Chin bible

JEREMIA 50

¹ARENG ly Babulon mary hawi huni pri i khumichi molam y, kai teng y leu ang pei nai ne. Mymy ly

²“Babulon mary ly phra vui bo! Huni mary i Marduk tameuh ly tleu piupa pawn veng bo! Babulon mary i amso ngai hawi nai mynchi ly kangji nga iy taphra naira avum u lawh bo ly! Hini satang ai khumi cheng cheaungkhangchi teng y thai hai u! Ka-ma-ra tamkhawn patei iy thai hai u! Huni satang ai apha hai vui moh!

³“Tosyh ngan mang i khumi cheng harei ly Babulon mary y tiu ai nai ang jeu iy, huni mary ai khutaha daichi ka-vym lawm hai ai. Khumi hawi tawnbawichi preang pawn ai i, huni meingtym ly khumi angso savai tlang naira lawm ai,” napi.

⁴ARENG my, “Huni neng tym nai khala, Israela hawi Juda khumichi ly vo naimy mymychi i Tameuh, napi nai kai ai hau u ai.

⁵Nichi ly Zion mary mang y chei nai lam deng iy, huni mary mang y chei u tapai ai. Nichi ly kai hawi deungtasarei Leu Maikawm asa iy, huni Leu Maikawm ai mana khala py taphra u ai ny y.

⁶“Kai i khumichi ly mawichira y beram typ keungchi my lam tama hai nai beramchi hawi atawm nai ne. Nichi ly mawichira y lyn kalau, ang vum kathiu naimy mychi i beram hai ai tami vui nai beramchi kamta, amki u bo.

⁷Nichi ly mychi hawi avum nai khumi bawibawichi my tiu nai avum u nai ne. Nichi i paleung ka-echi my, ‘Huni khumichi ly ARENG i tlang tleaung y tamang u nai deaungkho y, nichi ai kaichi i sa nai sai ly tamang y; nichi i amsi pajochi ly ARENG ai ym nai khumichi ne nai deaungkho y, mymychi kypkyp py mymy i tlang tleaung y ka-ym awm ai tla nai ne,’ nanai thui u bo.

⁸“Aw Israela khumichi awi, Babulon mary i dengdairei preang u! Huni mary i nai theu u! Theu kasa u!

⁹Kai ly tosyh ngan mang i atho len nai prichi ai kachyh iy, Babulon pri y tiu hai ai. Nichi ly tavai pasau iy huni mary ai tiu iy peang u vui ai. Nichi ly patyp naira y avawrei chawm khyp pa-rei ko pajau nai mawi sarachi kamta, mymychi i thailihochi ko u thai nai ne.

¹⁰Babulon pri ly lawm naira avum ai. Lawm nai khumichi py mychi i ngai nai vawnsai ngiereichi la u ai. Hini ly kai, ARENG i thui nai leu ne,” napi.

¹¹ARENG my leu pei nai ly “Babulon mary i khumichi awi, nangchi ly kai i pri ai lawm u bo. Nangchi ly choh ati nai si nu kamta py, hang nai keaungngo kamta py, amo theu naimy aki aleaung u teu i py,

¹²nangchi i mary ly kangji nga iy, tahm anem ai. Pri leilachi theung y Babulon pri ly tahm theang keh nai pri lawm ai. Huni ly jengha iy tui by y nai khutaha daichi ka-vym lawm ai.

¹³Kai i kado theu nai molam y Babulon mary y ami py awm ai nai nga u ai ny y. Huni mary ly phra seaungkhrang naimy awm ai. Huni sahawi mang tako nai khumi bawibawichi ly huni mary i avum nai leaungsaichi niu nai ly athengra iy kaso theu naimy lyh u ai.

¹⁴“Thailiho pa nai khumichi awi, tavai pasau u ly Babulon mary ai tiu iy katanmeuh u. Babulon mary ly kai ARENG i tlang tleaung y sa tamang u bo. Hunai deaungkho y nangchi i thailiho bawibawi hawi, huni mary mang y ko u.

¹⁵Mary tengpang sahawi y tavai atiu nai katynchi aeu u! Vai Babulon mary ly kasum apei veng bo. Mary apaichi ly anawi seaungkhrang veng bo. Kai ly Babulon chengchi ai vawitheung katha nai ne i, nangchi ly nichi i tlang tleaung y vawitheung tha u. Khumi takhrachi ai nichi my sa nai kamta, nichi ai py so u teang.

¹⁶Babulon mary y ti hei ai nai pei u moh. Nichi ai amti amjangchi pakym ai nai pei u moh. Huni meingtym y awm u nai cheng takhra khumi ngiereichi ly vai, tavai thau nai tavaimichi ai jei nai deaungkho y mymychi i pri mang y vawi u ai.

¹⁷ARENG my, “Israela khumichi ly khrangsichi my kei nai deaungkho y, ahei dan nai beramchi hawi atawm. Angchei y Asuria samrang ly nichi ai tiu bo. Huni bo y Babulon samrang Nebukhadnezar my, nichi i hiuchi taai piupa pawn nai ne.

¹⁸Hini molam y Israela chengchi i Tameuh, ati cheaungkhang sa thai nai keung kai ARENG ly Asuria samrang ai pajeng nai kamta, samrang Nebukhadnezar hawi ni i pri ai py pajeng ai.

¹⁹Israela khumichi ai mymychi i pri mang y kaimy pahawi ali teang ai. Nichi ly Karamela mawi saleung hawi Bashan meingtym y pati nai amti amjangchi cha u ai. Ephraim hawi Kilead khu ka-peangchira y prau nai amti amjangchi ai, bym pa-rei cha ai nai nga u ai.

²⁰Huni neng tym nai khala kai ly kaimy heng ai pei nai khumichi i kamngochi kapahen pi ai i, Israela pri y sa tamang nai kamngo ati sai py avum ai ny y. Juda pri y py tamang nai ati sai py niu ai ny y. Hini ly kai, ARENG i thui nai leu ne,” napi.

²¹ARENG my, “Tavai atiu ham nai Merathaim khumichi hawi Pekod khumichi ai tiu u. Nichi ai tleh u pawn. Kai i leu pei nai ngierei so u. Hini ly kai ARENG i thui nai leu ne.

²²Huni pri y tavai atiu nai katynchi thai nai ne. Phra nai sai py ka-teng ny y na.

²³Babulon mary my khaileaung pri verei ai tamo chaki hawi atum nai ne. Na i py vai huni tamo chaki ly tleu piupa veng lawh bo! Khumi cheng cheaungkhangchi ly Babulon mary i avum nai leaungsai niu i, athengra nai kaso theu u nai ne.

²⁴Aw Babulon mary, nang ly kai ai tiu lawh bo. Kai i pateung nai deaungra y athang khai y naimy man bo.

²⁵Kai ly kado theu nai deaungkho y kaimy i tavai ateaung khaira takun paeaung iy, tavai ateaungchi kala bo. Ati mana nai mo nabaly Babulon mary y ati cheaungkhang sa thai nai keung kai, ARENG my sa ai nai kalop awm nai deaungkho y ne.

²⁶Huni mary ai cheaungkhangra mang tiu u. Chohpaichi taphra u! Tiu lawmra i nga nai vawnsaichi ai, choh pakheng achu nai kamta pakheng achu u! Mary py taphra u! Ati sai py khai moh!

²⁷Tavaimi risachi ai padei u! Khumi neangneangchi ai padei u! Babulon khumichi ly taham si u bo! Nichi ly kamngo pajeng naira avum ai nai neng kani tym bo!” napi.

²⁸(Babulon pri i dengdairei law tleaung nai tavai kamtangchi ly Jerusalem mary y tym u iy, mymy i Achura yhm ai Babulon khumichi my taphra nai molam y, achi i ARENG Tameuh ly nichi ai ati mana vawitheung tha mo, nanai thui pi u bo.)

²⁹“Babulon mary y tiu ai nai thailiho pa nai khumichi ai thui pi u. Thailiho teaung kawp nai khumi ngiereichi ai pato u. Mary ai katan u meuh; leaungrei py tleaung moh sy. Huni mary i khumichi ai vawitheung tha u. Nichi ly khumi takhrachi ai sa nai kamta, nichi ai py so u teang. Ati mana nai mo nabaly nichi ly Israela chengchi i chai parai nai keung kai ai amlyh am-e naimy ka-awi sa u nai ne.

³⁰Hunai deaungkho y nichi i neampacho kacheangchi ly mary lamchira y tleh nai avum u ai. Nichi i tavaimi risa bawibawichi py, huni kani y tamyh naira avum u ai. Hini ly kai ARENG i thui nai leu ne.

³¹“Aw Babulon mary, nang ly amlyh am-e naira y kyh chawn nai deaungkho y, ati cheaungkhang sa thai nai keung Tameuh, kai ARENG ly nang ai ka-awi sa ai! Nang ai kaimy pajeng ai nai neng kani ly tym bo.

³²Amlyh am-e nai nangchi i pri ly athei iy atlym ai. Angthau teang ai nai nang ai ami py sabawm ai ny y. Kai ly nangchi i marychi ai mai kang hai ai i, nangchi tengpang sahawi y awm nai ngiereichi ly phra ai,” napi.

³³Ati cheaungkhang sa thai nai ARENG my, “Israela hawi Juda khumichi ly ana patang naira avum u nai ne. Nichi ai patiu iy hawi jo nai khumichi my ly nichi ai hawi hai palai typ u bo.

³⁴Na i py nichi ai atleu ai nai keung ly atho awm parai nai ne. Ni i amyn ly ati cheaungkhang sa thai nai keung ARENG ne. Mymy kypkyp ly nichi ai ama hai iy, huni pri y tlamsa naira tym hai ai. Na i py Babulon khumichi ai ly khrukhra naira tym hai ai,” napi.

³⁵ARENG my, “Babulon pri ly phra ai! Khumi mipuichi, peang nai keungchi hawi khumi kachengchi ly dei u ai.

³⁶Huni pri i tapawp nai amochi ly dei u ai; nichi ly khumi ka-khumchi ne! Huni pri i tavaimi risachi ly dei u ai. Nichi ly jei nai kaso theu u ai!

³⁷Nichi i keaungngochi hawi tavai ka-richi taphra u! Alai nai tavaimi risachi ly dei u ai. Nichi ly khri pa-rei atho bai u na bo! Babulon mary i yhmtheaung katuichi taphra u; Hunichi ai lawm u.

³⁸Huni pri y kani heang hai iy, tavo tuichi kang hai u. Babulon pri ly jei hyn ai hawi nai mynchi kawi nanai pri ne. Huni mynchi saho y, khumichi ly ka-khum lawm u bo.

³⁹“Hunai deaungkho y Babulon mary ly vawinamchi, kasitahuchi[13]hawi tavo kasichi abyhra lawm ai. Huni mary ly mo mang y khumi angso savai tlang nai meingtym lawm jojo ai.

⁴⁰Sodom, Komora mary hawi tengpang sahawi i avangchi ly kaimy taphra naira avum nai kamta, Babulon mary py avum teang ai. Neng tanareichy huni mary y khumi leaungrei py awm ai ny y. Hini ly kai ARENG i thui nai leu ne.

⁴¹“Tosyh ngan mang pri harei i khumichi ly ang jeu u ai. Huni ly kamlo ra i sa thai naira awm nai pri ne. Samrangchi ly tavai atiu ai nai angvei u rym bo.

⁴²Nichi ly mychi i thailihochi hawi haisauchi atheu u bo. Nichi ly pahyp y naimy ana iy kapahenra by y nai khumichi ne. Nichi i keaungngo muiken katynchi ly pangli tui kamsau katyn hawi atawm nai ne. Nichi ly Babulon mary y tiu ai nai aeng u yb bo.

⁴³Babulon samrang ly huni satang thai nai khala, mymy i kiubanchi py heang pajau y bo. Ni ly paleung bi naira tym i, deaungdi tapen nai neampachy kamta patang naira avum bo.

⁴⁴“Kai ARENG ly Jordan tavo jeungrei ra y awm nai daichi kabeng theung i dengdairei, heng-a nai acha bai mang y theu piu nai khrangsi kamta, theu iy Babulon khumichi ai mymychi mary i nai, vaimy kaparyh ai. Huni bo baly kai ly huni pri y peang ai nai samrang leaungrei vawi takhra pi ai. Kai ai ami hawi pata pajau ai mo? Mani samrang ly kai ai awi pajau ai mo?

⁴⁵Hunai deaungkho y Babulon mary i vui y kai i sa nai sai ai py, mary i khumichi i vui y kai i paran yb nai sai ai py tangai u. Paleung ka-e ly nichi i cho chanauchi ai malawn py, athorei my ryh phraiphro iy hawi vui ai. Niu nai khumi bawibawichi ly athengra iy kaso theu u ai.

⁴⁶Babulon mary anawi nai khala, khri pa-rei katyn amsau nai deaungkho y, khaileaung pri verei amchyh nanai. Jei hyn naimy aeu nai katynchi ai py, khumi cheng cheaungkhangchi my thai u ai,” napi.