Read Khumi Chin JEREMIA 52 Bible Online

JEREMIA 52 - Khumi Chin bible

JEREMIA 52

¹Zedekiah ly samrang lyn nai thym khala, saneng apom phai harei awm iy Jerusalem mary y saneng holai harei peang. Ni i amhm ly Libana mary y awm nai Jeremia i chaniu Hamutal ne.

²Samrang Zedekiah ly samrang Jehojakim kamta, ARENG i mo y hawi y nairachi sa bo.

³Jerusalem mary hawi Juda pri i awm nai sai ly pipi hawi y nai deaungkho y, ARENG ly kado theu i, mipuichi ai pri pala nai avum hai bo. Zedekiah ly Babulon samrang Nebukhadnezar ai tiu nai deaungkho y,

⁴Juda samrang Zedekiah i peang nai takawrei saneng, lo horei, kani horei kani y, Babulon samrang Nebukhadnezar ly mymy i tavaimi risa bawibawichi hawi vanrei, Jerusalem mary y tiu ai nai amsa u bo. Nichi ly mary angam mang y kheucha sa iy, mary ka-ki abyhra angawmchi tai u nai ne.

⁵Huni mary ly samrang Zedekiah my peang nai saneng holai ha ryrei, katanmeuh naira avum bo.

⁶Huni saneng palyh lo, kani takawrei kani y khri pa-rei cha nei takang nai deaungkho y, khumichi ly teicha teinei pipi by y bo.

⁷Huna nai khala mary apaichi ly anawi be bo. Mary ai Babulon chengchi my katanmeuh teu i py, tavaimi risa bawibawichi ly vum y preang u nai ne. Nichi ly samrang i akho lam mang theu iy, apai nyhrei sala y awm nai katheu pa-kho mang theu i, Jordan leaunghawi mang y preang u bo.

⁸Na i py Babulon tavaimi risachi ly samrang Zedekiah ai patiu ai nai pareng u i, Jeriko mary sahawi i adymra y kai bo. Zedekiah i tavaimi risa bawibawichi ly ni ai daw su iy preang u pawn bo.

⁹Paleung ka-echi ly Zedekiah ai patiu iy samrang Nebukhadnezar awm nai Hamath khu ka-peang, Riblah mary mang y hawi u bo. Huni meingtym y my Nebukhadnezar ly Zedekiah ai tara chih nai ne.

¹⁰Babulon samrang ly Riblah mary y Zedekiah i chapochi ai ampo i mei ka-niu y my, padei hai bo. Juda samrang i bangtangchi ai py padei hai teang nai ne.

¹¹Hunaibaly Zedekiah i meichi tha hai iy, ni ai Babulon mary mang y hawi ai nai sengkry hawi pakheng hai bo. Zedekiah ly dei pa-rei, Babulon mary i theaung theung y awm nai ne.

¹²Babulon samrang Nebukhadnezar i peang nai saneng holai takaw, pa-ngo lo, kani horei kani y samrang y tau pei nai bangtang hawi, tamcheaungchi i tavailu areng Nebuzaradan ly Jerusalem mary theung y kun bo.

¹³Ni ly Achura yhm hawi samrang yhm ai py, Jerusalem mary y aly len nai khumi bawibawichi i yhmchi ai py, mai leng pawn nai ne.

¹⁴Ni i risachi my py mary apaichi panawi u bo.

¹⁵Hunaibaly samrang i tamcheaung tavailu areng Nebuzaradan ly mary theung y awm rai nai khumichi, kupe kakawp awm rai naichi hawi, Babulon khumichi mang y kun nai khumichi ai, Babulon mary[15]mang y hawi vui bo.

¹⁶Na i py ati sai py by y nai khumi, kamawn kateu phyreichi ai ly Juda pri y daw jo iy, kreip akhochi hawi li hlau kalopchi sa hai nai ne.

¹⁷Babulon chengchi ly Achura yhm theung i kheupaja yhmmawm puichi, kheupaja panuira kheuchiuchi hawi kheupaja tuikan pui ai deihpiu na pa-rei pakhau pawn iy, kheupaja ngiereichi ai ly Babulon pri mang y syn u pawn bo.

¹⁸Nichi ly maicham pachai naira y teaung nai khaileaung veira tamo chawnchi, maicham pachai naira y teaung nai maidym khauchi, maisi yhmchi pachai naira y teaung nai ateaung alangchi, tawnbawi thi kadeng nai rahumchi, mui katui leng patlum nai khauchi hawi, Achura yhm theung y chiu sa naira y teaung nai takhra kheupaja ateaung alangchi ai py, syn u pawn nai ne.

¹⁹Mai-aichi syn nai khala teaung nai sora chychi hawi seng-y-kang pangdaichychi, tawnbawi thi kadeng nai rahumchi, maidym khauchi, maisi yhm panuirachi, mui katuichi leng patlum naira khauchi, kreip hang katalamra y teaung nai khauchi napi nai muku, ti y baly tangka hawi sa nai vawnsai ngiereichi py syn u be nai ne.

²⁰Achura yhm i vui samrang Solomon my sa nai kheupaja yhmmawm pui nyhrei, panuira kheuchiuchi, tuikan pui hawi anui mang i eang nai si katai myn holai nyhreichi ly neh ai nai ngo y na pa-rei ji nai ne.

²¹Yhmmawm pui nyhrei ly atawm riri iy, ka-sang miu holai tajarei, ka-hi miu holai nyhrei awm. Huni yhmmawmchi ly paho iy, katho bi thomrei awm nai ne. Kheupaja yhmmawm meaung kamsuichi ly ka-sang miu pangrei awm riri iy, hunichi i ka-kira y thaitleung athaichi hawi ka-pu sa nai thunchengchi awm. Huni bawibawichi ai kheupaja hawi sa nai ne.

²³Yhmmawm harei i thunchengchi ra y thaisi athai chungvairei tai i, vui takaw hongan tariurei ai ly khaileaung mang dengdairei niu pajau nai ne.

²⁴Huni bo y py samrang i tamcheaung tavailu areng Nebuzaradan ly pathyp pi nai keung kalen keh Seraiah, ni i bangtang pathyp pi nai keung Zephaniah hawi takhra aly len nai Achura yhm miteaung keh leaung thomreichi ai langheng y hawi vui bo.

²⁵Ni ly Juda tavailu areng kangngym leaungrei, mary theung y awm rai nai samrang ai tau pei nai bangtang leaung saryhrei, tavaimi vuikanai kry nai bangtang tavailu areng hawi, takhra aly len nai khumi leaung vui tariureichi ai py, Jerusalem mary i dengdairei hawi vui nai ne.

²⁶Nebuzaradan ly huni khumichi ai Babulon samrang i awm nai Riblah mary y tym hai iy,

²⁷samrang ly Hamath khu ka-peang Riblah mary y, nichi ai khyh pakhau iy padei hai bo. Hunai deaungkho y Juda khumichi ai ly langheng y palawn iy mymychi pri i nai hawi vui nai ne.

²⁸Nebukhadnezar my langheng hawi nai khumi vuikanai ly ni i samrang lyn nai saryh saneng y leaung sangthom palyh leaung apom phai thomrei,

²⁹samrang lyn nai tajarei saneng y Jerusalem mary i dengdairei leaung chungvai taja takaw phai palyh leaung nyhrei,

³⁰samrang lyn nai apom phai thomrei saneng y Nebuzaradan my hawi nai leaung chungvai saryh taja vui palyh pa-ngo leaung pangrei ne i, bawibawi ly leaung sang palyh pa-ngo chungvai tariurei ne.

³¹Babulon samrang Evilameroda ly my i samrang lyn nai saneng y, Juda samrang Jehojakhin ai theaung i nai palawi iy, pahen naira patei bo. Hina nai tym nai ly Jehojakhin theaung tla nai bo, phai palyh saryhrei saneng, lo holai nyhrei, kani apom phai pangrei kani ne.

³²Evilameroda ly Jehojakhin ai kapahen paleung hawi amkawm iy, Babulon pri y ni hawi vanrei pri pala naira avum nai takhra samrangchi tleaung y tahm pasang nai ne.

³³Hunai deaungkho y Jehojakhin ly theaung i ateaungchi aleng ai nai nga iy, heng nai sala ryrei samrang hawi vanrei cha nei ahawi ai nai nga.

³⁴Huni bo y mymy ngai nai kamta pasum ai nai, heng nai sala ryrei, kani tleirei pasum charei nga nai ne.