Read Khumi Chin JEREMIA 6 Bible Online

JEREMIA 6 - Khumi Chin bible

JEREMIA 6

¹Benjamin mipuichi awi, chymme naira mang y angpreng u! Jerusalem mary i nai theu u! Tekoa avang y baw eng u. Bethekarin avang y ka-ma-ra maiteaung to u. Ka-jeira hawi phra naira ly tosyh mang dengdairei ang tym ai.

²Zion mary ly mo cha hawi iy jypjyp teu i py, taphra naira avum ai.

³Beram typ nai keungchi ly mychi i beramchi hawi, huni meingtym y tai u ai. Nichi ly mychi i kanih tangbeungchi ai, nang i sahawi y sa chum baly, mychi i ngai nai meingtym y tai u ai.

⁴Nichi my, “Jerusalem mary ai tiu ai nai angvei u rym! Kani thunteng nai khala y achi tiu u sina!” nanai thui u. Na i py nichi my, “Vaini ly kani dym ai bo; kani ka-reu bo i, vai ly patyh bo.

⁵Vum y achi tiu u sina. Jerusalem mary i amtangrachi taphra u sina,” nanai thui u nai ne.

⁶Ati cheaungkhang sa thai nai keung ARENG ly hini samrangchi teng y, Jerusalem mary ai katanmeuh pajau ai nai dengkeaungchi paliu iy, abyhra angawmchi sa ai nai leu pei bo. Mymy ly “Hini mary ly pahyp y naimy ana nai kawi nanai deaungkho y, kai ly hini mary ai kapajeng ai.

⁷Tuikhora i tui leaung amjawn jo nai kamta, Jerusalem mary i hawi y nairachi ly leaung amjawn jo nai ne. Mary theung y khrukhra naira, alawm nairachi py kathai i, noso hawi tamo kalem nga naichi py kaniu bo.

⁸Jerusalem mary i khumichi awi, nangchi ly huni patang naichira i nai amtiura lo u, ti y baly kai ly nangchi ai kang khai su ai. Nangchi i mary ly khumi angso savai tlang iy khutaha meingtym lawm hai ai,” napi.

⁹Ati cheaungkhang sa thai nai keung ARENG my kai teng y, “Kreip akho theung y kreip athai awm nai ngiereichi jaw pyn nai kamta, Israela pri y khumi kamthum kamlai awm hai ai ny y. Hunai deaungkho y nang ly neng awm nai thym khala atleu iy, nga thai nai ngierei, Israela chengchi ai atleu ai nai tla,” napi.

¹⁰Kaimy py, “Kaimy kapany hai iy ami my kai i leu tangai ai mo? Nichi ly kanochi tamym vui iy nang i leu pei naichi tangai ai nai akhi naimy, nang i leu panui hai ai.

¹¹Aw ARENG, kai ly nang i kado theu naira my kawi i, am-yh pajau y na bo,” napi. Naibaly ARENG my, “Kai i kado theu naira ai, lam y awm nai deaungdi tlang tleaung y py, tleaungri ka-cheangchi amkheng achu nai tlang tleaung y py tym hai ba. Aju juvochi hawi khri pa-rei miteaung acheang nai khumichi ly tleaung u ai ny y.

¹²Nichi i yhmchi, li hlauchi hawi ajuchi ly ami i kiu y tym ai. Kai ly hini pri i khumichi ai kiu pheu iy pajeng ai.

¹³Khumi katheang kalen bawibawichi ly teng y naimy nang chawn ai nai hau u bo. Amochi hawi pathyp pi nai keungchi malawn py, khumichi ai li-tapawp u nai ne.

¹⁴Nichi ly kai i khumichi i tamo kalemchi ai, tahm pateng pi y naimy hawi sa pi. ‘Ati mo ra py amsym y pui naimy, amsyn teu,’ napi u bo.

¹⁵Nichi ly amso ngai naichi sa teu i py, kaji u sai a? Lymlym kaji u y, kangji meimai py amteng y. Hunai deaungkho y nichi ly khumi takhrachi kamta atlym u ai. Kaimy pajeng nai khala y nichi ly tama nai tym u ai. Hini ly kai ARENG. my thui nai leu ne,” napi.

¹⁶ARENG ly mymy i khumichi teng y, “Lam sangumchira y angdo u ly khen u cham. Jangni i lam kangngymchi hau u. Hawi keh nai lam ly ma mang y mo, nanai deng iy, huni lam mang tako baly nangchi i phailo ly tlamsa naira nga ai,” napi. Na i py nichi my, “Huni lam y kaichi abang ai nai ngai y leang!” napi u.

¹⁷Baw eng iy pany hai nai katyn tangai ai nai ARENG ly tamcheaungchi khai pi bo. Na i py nichi my, “Kaichi tangai ai nai ngai y,” napi u.

¹⁸Hunai deaungkho y ARENG my, “Nangchi khumi cheng cheaungkhangchi awi, tangai u. Nangchi pany hai nai keung bawibawichi awi, kai i khumichi tlang tleaung y tym ai na khym taham si ai dawn u cham.

¹⁹Khaileaung i khumichi awi, tangai u! Hini khumichi ly kai i leu tangai y, kai i parip nai leu py khai u su bo. Hunai deaungkho y kai ly nichi nga ai ataing nai ka-jeira ly nichi i tlang tleaung y katym hai ai.

²⁰Seba pri i dengdairei nichi syn nai kathan py, pri kamlora i syn nai mui katui py, kai aly ngai y. Nichi i katalamrachi kai ngai y; nichi i kapathyprachi py kai ngai y,” napi.

²¹Hunai deaungkho y kai ly huni khumichi i mo y khangmui ka-cheungchi khai pi nai y pathuikhe iy, avah hai mawp ai. Amhm ampo hawi cho chanauchi py, ahawichi hawi yhm deaungpachi py dei u ai,” napi.

²²ARENG my, “Tosyh mang y awm nai pri hareira i khumichi ly tavai thau u ai. Kamlora i atho len nai khumi cheng ly tavai tiu ai nai angveirym bo.

²³Nichi ly thailihochi, tivichi pa u bo. Nichi ly pahyp y naimy ana iy, pahen naira by y nai khumichi ne. Keaungngochi atang iy ang jeu nai khala y, nichi i katyn ly pangli tui kamsau katyn hawi atawm. Nichi ly Jerusalem mary y tiu ai nai angveirym bo.”

²⁴Jerusalem mary i khumichi my, “Hini satang kaichi thai nai khala y, kaichi i kiubanchi ly tla thlawi veng bo. Kaichi ly deaungdi tapen ai nai achai nai neampachy kamta, khri pa-rei no patang u bo.

²⁵Paleung ka-echi ly tavai ateaungchi pa iy, ka-jeira my ang katanmeuh nai deaungkho y, kaichi ly daichi daireang y theu vam y, lamchira py aleaung vam y bo,” napi u.

²⁶ARENG my mymy i khumichi teng y, “Nangchi ly paisiu akhiu iy maidym theung y jawn y tlawntlai; chanau leaungrei dei keng nai molam y vo tangam nai kamta, paleung ama naimy vo u. Ati mana nai mo nabaly nangchi ai tamyh pawn ai nai keung ly vaimy ang jeu iy ang tiu praw ryp ai nai deaungkho y ne.

²⁷Jeremia awi, kai i khumichi ai tamo ngan y cham nai kamta, nichi i amhi amtlau naichi pany ai nai khen patawm ba.

²⁸Nichi bawibawi ly paleung tang nai langmeang thau naichi ne. Nichi ly kheupaja hawi tamo kamta tang u nai ne. Nichi ly aki aleaung iy leu pakei u reng nai, khumi hawi y naichi ne.

²⁹Tamo nganchi patlawn nai mai pui paheung ly khri pa-rei kabi ango na teu i py, tamo ngan ei ly tlawn y iy hang py leaung y nai deaungkho y, kai i khumichi ai kakhawi kaeng kachi veangveang teu i py, kamran by y. Ati mana nai mo nabaly khumi kamngochi ai pathu pawn ai nai ngo y nai deaungkho y ne.

³⁰Kai, ARENG ly nichi ai khai su bo. Hunai deaungkho y nichi ai tangka chang ei, nanai palau ai,” napi.