Read Khumi Chin JEREMIA 7 Bible Online

JEREMIA 7 - Khumi Chin bible

JEREMIA 7

¹31ARENG ly Jeremia ai Achura yhm apai katheu pa-kho mang y pato iy, huni apai katheu pa-kho sahawi y angdo nai khala, hina nai thui hai bo.

²ARENG ai chiu ai nai hini katheu pa-kho mang kun u nai Juda mipuichi awi, ARENG i leu tangai u.

³Israela chengchi i Tameuh napi nai, ati cheaungkhang sa thai nai keung ARENG my, “Kai ly nangchi ai hini meingtym y awm u veangveang ai nai, nangchi ly nangmychi i awm nai sai hawi amhi amtlau nai saichi takhra hai u.

⁴Achi ly chymme na a! ‘Hini Achura yhm ly ARENG i Achura yhm ne, ARENG i Achura yhm ne, ARENG i Achura yhm ne!’ nanai thui naichi i tapawp nai leu ym u moh.

⁵“Nangchi i amhi amtlau nai sai takhra hai u; vai i sa nai kamta ly so u bi moh. Nangmychi tengtawi amkawm naira y, adyh adawi naimy awm u.

⁶Pri takhra chochi, nuro nukai chochi hawi neampachy lumaichi tlang tleaung y kho sa iy, kamran hau u moh jau. Hini kachai meingtymra y khumi kahawichi ai tleh u moh jau. Tameuh takhrachi ai chiu nai ly nangchi ai phra hai nai deaungkho y, huni chiu nai ly anawn u.

⁷Hina nai kamta awm nai sai takhra u lawh baly, kai ly nangchi i amsi pajochi teng y kamtym pei nai pri y, deungtasarei awm ai nai pei ai.

⁸“Khen cham, nangchi ly li-tapawp iy vang teng y nai leuchi ym u nai ne.

⁹Nangchi ly paviu nai, khumi ai padei nai, ami i aju ai taphra nai, ka-chawi naimy vaineng abeu nai, Bala tameuh teng y apathyp nai hawi nangmychi pany vai y nai tameuhchi ai chiu u bo.

¹⁰Nangchi ly kai i ngai y nai kalopchi sa naimy kai i Achura yhm y jeu iy, kai i mo y angdo i, ‘Kaichi ly phrumai by y! Hini amso ngai naichi kasa u pajau bo,’ nanai thui u.

¹¹Kai i Achura yhm ai ly damrachi i aheura meingtym palawn u lawh a? Nangchi i sa nai kalopchi ai kai kaniu, napi.

¹²Kai ai chiu nai meingtym lawm ai nai vawi takhra manme nai Siloh[1] avang y chei iy, kai i khumi Israela mipuichi i sa tamang nai molam y, huni avang ai kaimy mana kasa mo, nanai khen u cham.

¹³Nangchi ly vaichi khala y kaimy pany hai yb nai kamngo cheaungkhangchi sa u bo. Kaimy avaw avawrei kang thui pi teu i py, nangchi ly tangai u y. Kaimy nangchi ai kang palau nai khala py pathang u y.

¹⁴Hunai deaungkho y nangchi ym u keh nai hini kai i Achura yhm ai, Siloh avang y kamta kasa teang ai. Nangchi i amsi pajochi hawi nangchi ai kang pei nai, hini meingtymchi ai ly Siloh avang y kamta kasa teang ai.

¹⁵Kai ly nangchi i amjo amnau Ephraim mipuichi ai kaimy patheu vui nai kamta, nangchi ai py kang patheu vui ai,” nanai ARENG my leu pei nai ne.

¹⁶ARENG my, “Aw Jeremia, hini khumichi i vui chiu so pi moh. Nichi i vui hnei takeng pi nai py, ahui pi nai py so pi moh. Kai ly nang i leu tangai pi y ai nai deaungkho y, kai teng y takeng moh.

¹⁷Juda marychi, Jerusalem mary lamchira y nichi i sa nai saichi, nang ly niu y nai sai a?

¹⁸Cho deaungdichi ly theng acheaung i, neampacho ka-cheangchi my mai paeng iy, neampachy ka-cheangchi ly kani khusang samrang nu, napi nai kani anglo teng y talam ai nai, tako dei katlen iy paawp pi bo. Nichi ly kai ai paleung aleng hai ai nai tameuh takhrachi i vui kreip hang katalamrachi py leih iy talam u nai ne.

¹⁹Na i py paleung aleng tatang nai ly kai a? Ny y leang. Nichi naini mychi i paleung aleng hai iy, kangji nga u nai ne.

²⁰Hunai deaungkho y kai i ARENG ly kaimy i khri pa-rei kado theu nai ai, hini Achura yhm y kaleih ai. Khumichi hawi tawnbawichi tlang tleaung y py, dengkeaungchi hawi amti amjangchi salo y py kaleih ai. Kai i kado theu nai ly ami py pathym pajau y nai mai hawi atawm ai.

²¹Hina nai kamta ati cheaungkhang sa thai nai keung Israela chengchi i ARENG Tameuh my leu pei nai ne. “Kai i khumichi awi, nangchi ly nangmychi cha ai avo nai tawnbawichi awm nai kamta, maicham tleaung y theng iy, bom verei leng patlum nai tawnbawichi py awm. Huni tawnbawi amjy nyhrei ai cho u.

²²Nangchi i amsi pajochi ai Aikupta pri i dengdairei kapahawi nai thym khala y, kai ly leng patlum nai kapathyprachi molam y py, takhra kapathyprachi molam y py, reita leu pei nai by y leang rai.

²³Na i py kai ly nichi i Tameuh ne iy, nichi py kai i khumichi lawm ai nai molam y, kai i leu tangai u ai nai reita leu kapei nai ne. Cheaungkhangra y amsym ai nai molam y, kaimy pei nai reita lam y tako u ai nai leu pei nai ne.

²⁴Na i py nichi ly kai i leu tangai y, tahm py khai u y. Nichi ly mychi i hawi y nai paleung katangra i theu nai ka-dawnchi kamta sa u. Nichi ly hawi ai nai tleaung y ly hawi y kehra bo.

²⁵Nangchi i amsi pajochi ly Aikupta pri i nai theu u nai kani dengdai vaini khrairei, kai ly kaimy i amochi ai kang pato pi jojo nai ne.

²⁶Na i py nangchi ly kai i leu tangai y, tahm py khai u y. Nangchi ly nangmychi i amsi pajochi tleaung y malawn py paleung tang iy, tiu ai ngai nai khumichi lawm u bo.

²⁷“Hunai deaungkho y Jeremia awi, nang ly hini leuchi ai nichi teng y thui pi keng teu i py, nichi tangai u ai ny y. Nang ly nichi ai palau teu i py, nichi ly pathang u ai ny y.

²⁸Nichi ly mychi i ARENG Tameuh i leu tangai u i, pajeng naira avum nai y, amtiu naira nga ai nai khumi cheng ny y, nanai nichi teng y thui pi. Leu meitang ly tama veng bo. Leu kateng katheu u y leang bo.

²⁹“Jerusalem mary i khumichi awi, vo tangam u; Nangchi i sam vau iy aphi u pawn. Kai, ARENG ly kaimy i kado theu hai nai khumichi ai nyn kava veng bo i, nangchi ly mawi aheungchira y tlaiveu pavum nai khulymchi thui u.

³⁰“Juda khumichi ly hawi y nai sa u bo. Nichi ly kai i niu ngai y nai mynchi hawi, kai i Achura yhm theung y chai hai y bo.

³¹Nichi ly mychi i cho deaungdichi ai leng patlum iy apathyp ai nai hinnom leaunghawira y Topheth, napi nai maicham sa u bo. Huna nai sa ai nai nichi ai leu pei y, paleung ka-dawn py by y.

³²Hunai deaungkho y huni leaunghawi ly Topheth napi nai py, hinnom napi nai py, amyn palau bi y ai nai neng kani tym ai. Khumi kadeichi ai up ai nai akeaung y na pa-rei, huni leaunghawi y up nai deaungkho y huni leaunghawi ai ly khumi tleh nai leaunghawi, nanai palau u ai,” nanai ARENG my leu pei nai ne.

³³Khumi tlaiveuchi ly tavochi hawi daichi mawi kasichi i teicha lawm ai. Huni daichi mawichi ai paryh pi pawn ai nai khumi leaungrei py awm ai ny y.

³⁴Kai ly Juda marychi hawi Jerusalem mary lamchira y, apom nai pawira i amo theu nai katynchi hawi, amo theu kawn nai katynchi py, tama hai vui ai. Huni meingtym ly khumi angso savai tlang naira lawm ai.