Read Khumi Chin JEREMIA 9 Bible Online

JEREMIA 9 - Khumi Chin bible

JEREMIA 9

¹Kai ly dei naira avum nai kai i chengchi i vui vum kanithun vo pajau ai nai kai i meichi ly meikatui ly tuino kamta py, kai i lu ly tuikan kamta py, lawm ai ngai parai na bo.

²Kai ly kaimy i chengchi ai khai su naimy, tui by y nai daichi ka-vym y chei iy awmra meingtym harei ngai parai lawh. Nichi bawibawi ly ka-ym by y iy, khrukhra hai nai khumichi lawm u bo.

³Nichi ly li-tapawp ai nai ko nai thailiho chyn kamta, labeaung paniu vai y. Nichi i pri y leu meitang peang ai nai tleaung y ly leu ka-chawi my peang nai ne. ARENG my, “Kai i khumichi ly kamngo sa tamyhtyh naimy, kai ai nichi i Tameuh palawn ai nai ngai u y,” napi.

⁴Khumi luteng ly amychi i ahawi ka-dawichi ai amkyn ai nai tla. Ami mi py amy i amjo amnau ai ym ai nai aso y. Ati mana nai mo nabaly amjo amnau ne i py Jakob kamta tapawp iy Khumichi ly amy i ahawi ka-dawichi ai thui tamawn u reng nai deaungkho y ne.

⁵Nichi ly ahawi ka-dawichi ai li-tapawp u nai ne. Mani ka-ym leu py katheu u y. Nichi ly leu ka-chawi katheu thai ai nai mychi i labeaung y amtiu u lawh. Kamngo sa naimy mychi ai akawm hai u bo.

⁶Nichi ly kamngo sa ai nai khai su y. Nichi ly li-tapawp u tamyhtyh nai ne. ARENG my mymy i khumichi ly kai ai khai su bo, napi.

⁷Hini molam y ati cheaungkhang sa thai nai keung ARENG my, “Kai ly tamo ngan patlawn iy pachai nai kamta, kai i khumichi ai chai pa-rei kasa ai. Nichi ai kaimy cham ai. Kai i khumichi ly sa tamang u bo. Kai ly nichi ai mana kasa ai mo?

⁸Nichi i palai ly dei asi kaleu nai thailiho chyn hawi atawm. Nichi ly li-tapawp nai leu avawrei katheu u nai ne. Khumi luteng ly amy i yhm deaungpachi teng y leu katui katheu reng teu i py, katheu tatang nai ly nichi i vui deaung pateung pi nai leu ne.

⁹Hina naichi sa nai molam y kai ly nichi ai pajeng y naimy awm ai a? Huna nai khumi chengchi ai kai ly vawitheung tha y naimy awm ai a? Hini ly kai, ARENG i thui nai leu ne,” napi.

¹⁰Jeremia my, “Mawi aheungchi i vui kai ly tangam ai. Acha baichi i vui kai ly vo ai. Ati mana nai mo nabaly sui tlairachi ly jengha vui iy, aki aleaung nai khumi by y nai deaungkho y ne. Beram hawi sichi a-u nai katyn thai y bo. Tavochi, daichi mawichi py preang pawn bo,” napi.

¹¹ARENG my, “Kai ly Jerusalem mary ai kasuichi aeungra, yhm hlau kaphrachi pakheng achu nai meingtym lawm hai ai. Juda marychi py khumi angso savai tlang nai tui by y nai daichi ka-vym lawm ai,” napi.

¹²Kaimy, “Aw ARENG, “Ati mana nai y hini pri ly aki aleaung ai nai ngo y, phra seaungkhrang naimy tui by y nai daichi ka-vym kamta lawm lawh mo? Hina naichi pany thai nai khumi kacheng ly ami mo? Khumi takhrachi teng y thui pi pateang thai ai nai, ami hini satangchi ai ami teng y nangmy pany hai yb mo?,” nanai deng bo.

¹³ARENG my, “Hina naichi tym nai ly kai i khumichi ly mychi teng y kaimy patiu pi nai leuchi ai khai u su nai deaungkho y ne. Nichi ly kai i leu tangai y, kai i thui nai kamta py so u y.

¹⁴Nichi ly paleung tang iy mymychi i amsi pajochi my thui pi nai kamta, bala tameuh mynchi ai chiu u bo.

¹⁵Hunai deaungkho y nichi i tlang tleaung y Israela chengchi i, ati cheaungkhang sa thai nai keung kai, ARENG my mana kang sa ai mo, nanai tangai cham. Kai ly kaimy i khumichi ai kho nai dona keung pacho iy, dei asi abawi nai tui nei hai ai.

¹⁶Kai ly nichi hawi nichi i amsi pajochi malawn py thai vai y nai khumi chengchi theung y, nichi ai ahei hai ai. Hunaibaly nichi phra be ai nai pa-rei tiu ai nai tavaimichi kapato ai,” napi.

¹⁷Ati cheaungkhang sa thai nai keung ARENG my, “Adawn pasym u! Vo kakawpchi, si tlaiveu keung y vo khulym thui kawp nai neampachychi ai palau u,” napi.

¹⁸Khumichi my py, “Kaichi i meichi ly meikatui hawi kawi iy, kaichi i mei akhymchi ly vo ala nai deaungkho y, meikatui kawi nanai pa-rei, si tlaiveu khulym thui thai nai khulym kakawpchi ai palau u kaliki,” napi u.

¹⁹“Kaichi ly myh kang naira avum bo! Tahm pipi by y nai avum u lawh bo ly! Kaichi i yhm hlauchi ly phra pawn veng bo i, kaichi ly kaimychi i pri khai su ai nai tla ai,” nanai Zion mary i khumichi i vo tangam nai raawi tangai u, nanai thui u bo.

²⁰Kaimy, “Neampachochi awi, ARENG my leu pei nai tangai u. Mymy i leu ai hawihai palai dawn u patyp ly tangai u. Nangchi i chaniuchi vo kawp ai nai py, nangchi i ahawi ka-dawichi, si tlaiveu khulym thui kawp ai nai py, patiu pi u.

²¹Dei areng ly achi i thaibeng pa-kho mang dengdairei, achi i yhm puichi theung y ang kun nai ne. Nichi ly lamchira y awm nai deaungdi chochi hawi, seng meingtym y awm nai thawndeang deaungdi ka-cheangchi ai padei bo.

²²Khumi tlaiveuchi ly li prangra i sieichi pakheng achu mang nai kamta py choh tyn nai khumichi my aphi su nai choh kawmchi, ami my py pakym achu y nai choh kawmchi kamta py, ajangtang naimy awm ai. Hini ly kaimy thui pi ai nai ARENG my pei nai leu ne,” napi.

²³ARENG my, “Khumi kacheng ly my i tau cheng nai ai atho len nai khumi ly my i atho len nai ai, nang chawn nai khumi ly my i nang nai ai, amlyh ai nai avo y.

²⁴Amlyh am-e ai ngai nai khumi leaung leaungrei awm lawh teu baly, huni khumi ly kai i satang pany naira naini amlyh am-e ai nai tla. Ati mana nai mo nabaly kai i tamen naira ly khaw parai iy, kai i sa nai kalop ly adyh adawi naira hawi, kahawi sa naira awm nai deaungkho y ne. Hini kalopchi ly kai i kangai ne. Hini ly kai ARENG i thui nai leu ne,” napi.

²⁵ARENG my, “Aikupta khumichi, Juda khumichi, Edom khumichi, Ammon khumichi, Moba khumichi hawi tui by y nai daichi ka-vymra y awm nai sam kadawi khai nai khumichi[3]ai, kaimy pajeng ai nai neng kani tym ai. Huni khumi bawibawichi ly Leu Maikawm Pawm ka-ma-ra lawm nai lengkhym takip teu i py, kai i Leu Maikawm ai patawm u y. Huni khumi bawibawichi hawi Israela mipuichi ly kai i Leu Maikawm patawm u y,” napi.