Read Khumi Chin TANGAM NAI LEU 3 Bible Online

TANGAM NAI LEU 3 - Khumi Chin bible

TANGAM NAI LEU 3

¹Kai ly Tameuh i kamngo pajeng naira mana mo, nanai pany nai khumi ne.

²Mymy ly kai ai veng tleaung vengra nai, kaveng theung y ang tym hai iy,

³pahen y naimy avaw avawrei ang pakhau nai ne.

⁴Mymy ly kai i ngan tlang aseih hai piu iy, hiuchi py tleu hai piu i khai su bo.

⁵Mymy ly kai ai paleung sangri nai hawi, paleung bi patang naira theung y ang pakheng cheng nai ne.

⁶Mymy ly kai ai jangni i dei nai khumichi kamta kaveng theung y awm ai nai ang khai bo.

⁷Mymy ly kai ai sengkrychi hawi ang pakheng cheng bo. Kai ly theaung tla nai khumi ne i, lawira nga ai nai athang khaira by y.

⁸Kai ly sabawm naira nga ai nai tao pajeng parai naimy aeu teu i py, Tameuh ly tangai pi y nai ne.

⁹Kai ly lam tako nai khala y, atlym khikha na. Kai amhi nai tleirei y lengseaung apaichi my ang patleang khyp.

¹⁰Mymy ly tavym kamta kai ai oh iy, khrangsi kamta kai i tlang tleaung y ang taba na.

¹¹Mymy ly lam teng y kai ai patiu iy, ang theih piupa naimy ang khai su bo.

¹²Mymy ly my i thailiho a-eaung iy, kai ai amthiura palawn bo.

¹³Mymy ly thailihochi hawi kai i tlang tleaung y ko nai ne.

¹⁴Khumichi ly kani khengrei, kai ai ang panui hai; kai ly khumichi i vui amnui tabu kalawn lawh bo.

¹⁵Mymy ly kai i tlang tleaung y no patang naira ai, teicha teinei kamta ang pacho.

¹⁶Mymy ly kai i meimai khaileaung y ang kata iy, kai i hochi ai py lengseaung salo y patleu bo.

¹⁷Kai ly noso aho nai, tlamsa nai hawi amo theu nai py, katami pawn veng bo.

¹⁸Kai ly heng sau ai ny y leang; kai ly ARENG teng i athang khai naira py by y leang bo.

¹⁹Kai i patang nai hawi, kai i yhm hlau amny y nai sai ka-dawn pasym baly, hawi y keh nai dei asi nei nai hawi atawm.

²⁰Huna nai kamta avaw avawrei dawn pasym i, kai i phailo ai atho di hai bo.

²¹Na i py athang khai naira nga hai ali teang nai sai ly anui mang ichi ai kapany nai ne.

²²ARENG i khei pajau y nai tamen naira hawi pahen naira ly

²³khawn khutawi neng kamta khesere naimy, kani si nai kamta khaw hai tatang nai ne.

²⁴ARENG ly kai i vui ne nai deaungkho y, kai ly mymy ai athang khai.

²⁵ARENG ly mymy ai ym nai khumi lutengchi teng y ly hawi hai reng.

²⁶Hunai deaungkho y achi ai atleu ai nai, mymy ai paleung sau parai naimy ajeng nai ly achi i vui hawi keh.

²⁷Huna nai kamta paleung sau parai naimy ajeng nai ly hawithym khala acham nai hawi keh nai ne.

²⁸Achi patang naira avum nai thym khala kham tanga iy, amy tlairei tym teang y naimy, ateh jo ai nai tla.

²⁹Athang khai naira awm py awm lym ai i, achi ly ahui naimy khaileaung y lu meung ai nai avo.

³⁰Ang pakhau nai hawi khumi aniu y nai avum teu i py, pany thai iy kham tanga ai nai avo.

³¹ARENG ly pahen reng nai deaungkho y, achi ai deungtasarei ang khai su ai ny y.

³²Mymy ly achi ai paleung si vo tangam naira ang pei teu i py, achi i tlang tleaung y ang pei nai pahen naira hawi tamen naira ly len parai nai ne.

³³Mymy ly achi ai paleung si vo tangam hai iy patang hai teu i py, paleung ka-dawn hawi hai y.

³⁴Achi theaung tla iy paleung ka-dawn phra nai thym khala py, mymy ly pany pi nai ne.

³⁵Mymy ly my i pei yb nai nga ai avo naichi, achi ngo thai y nai khala py, ang pany pi se nai ne.

³⁶Jeung y tara chih nai sai tamang piupa nai thym khala py, mymy ly pany.

³⁷Areng i ngai nai kamta naini, sa nai sai amcheang ai tla.

³⁸Hawi nai hawi y nai ly mymy i leu pei nai kamta, lawm nai ne.

³⁹Achi ly amychi i kamngo molam y pajeng naira avum nai thym khala, ati mana nai y tangam u lawh ai mo?

⁴⁰Achi ly amychi i tako nai lam dawn pasym iy, ARENG teng y ali u teang sina.

⁴¹Kani pri mang y awm nai Tameuh teng y achi i paleung am-eaung naimy, anui i chiu sa naira thui u sina.

⁴²“Kaichi ly kamngo sa tamang u bo; nang ai kang tiu u bo. Aw ARENG, nangmy py, kaichi i kamngochi palawi pi y nai ne.

⁴³“Nang ly kaichi ai hui naimy patiu iy padei bo. Nang i pahen naira ly nang i kado theu naira my taphum vui bo.

⁴⁴Kaichi i chiu sa nai ly kado theu naira veng nanai khupanym ai, ta-i pajau y.

⁴⁵Nang ly kaichi ai khaileaung pri y, chainem y nai anyn angso lawm hai bo.

⁴⁶“Kaichi ly paleung ka-echi i mei aniu y naimy, panui hai nai avum u.

⁴⁷Kaichi ly phra seaungkhrang naichi ka-vum u bo. Kaichi ly paka naira hawi, ka-jeirachi theung y kaheng u nai ne.

⁴⁸Kaichi i khumichi myh kang pawn nai deaungkho y, kaichi i mei theung i mei katuichi ly tavo tui kamta leaung na bo.

⁴⁹“ARENG ly kani pri mang dengdai khen kathiu iy niu nai pa-rei, kai i mei katuichi ly anawn y naimy leaung jo bo.

⁵⁰

⁵¹Kai ly mary theung i neampachychi i tlang tleaung y tym nai leaungsaichi niu nai molam y, kai i paleung phra nai ne.

⁵²“Kai ly niu ngai y ai nai leaungsai ny y pui naimy, paleung ka-echi ly kai ai tavo palawn iy, deaung pateung u.

⁵³Nangchi ly kai ai kanghengtang naimy angawm theung y aphi u iy, angawm pa-kho y lengseaung hawi pali hai cheng bo.

⁵⁴Tui ly kai ai ang um dudu nai deaungkho y, kai ly kadei ai bo, nanai kadawn bo.

⁵⁵“Aw ARENG, angawm theung mang dengdairei, kai ly nang ai kaau bo.

⁵⁶Huna nai kaau nai raawi tangai ai nai, kai i takeng nai khala nang ly thai.

⁵⁷Kai ai jei moh, nanai pathang pi bo.

⁵⁸“Aw ARENG, nang ly kai ai sabawm ai nai jeu i, atleu pi bo.

⁵⁹Kai i avum nai teng y nai saichi nang pany i, kai ai meimai khen ly tara chih pi kyh ba.

⁶⁰Paleung ka-echi ly kai ai mana tanrei niu ngai y na mo, nanai py. kangviu y kai ai mana tiu na mo, nanai py, nang ly pany pi se nai ne.

⁶¹“Nang ly nichi my kai ai mei aniu y nai sa naichi thai iy, Aw ARENG, nang ly nichi i kangviu y dawn tau nai bawibawichi py pany pi se.

⁶²Nichi ly kai i satang kani khengrei thui u iy, mychi i dawn nai saichi sa u.

⁶³Khawn mang dengdai kani dym pa-rei, kai ai ang panui hai ryry bo.

⁶⁴“Aw ARENG, nichi i sa nai sai molam y, nichi ai pajeng kyh ba.

⁶⁵Nichi ai pasawi ly nichi ai paleung phra naira tym hai kyh ba!

⁶⁶Nichi ai hui iy patiu ly khaileaung tleaung i nai nichi ai ha py by y pa-rei, tamyh pawn kyh ba!”