Read Khumi Chin Ezekiela 11 Bible Online

Ezekiela 11 - Khumi Chin bible

Ezekiela 11

¹Tameuh i phailo ly kai ai ang kateang kalau iy Achura yhm nisi katheu pa-kho mang y ang hawi jo. Katheu pa-kho sahawi y pri i luchi napi nai Azura i chapo Jaazaniah hawi Benaiah i chapo Pelatiah nini abawi rau nai khumi leaung apom phai pangreichi ai kaniu bo.

²Tameuh my kai ai, “Nang khumi cho awi, hini mary theung y hawi y nai katau pei reng nai khumi kamngochi ly hini khumichi ne.

³Nichi my, ‘Achi ly kra y nai sala y yhmchi sa u bi ai. Hini mary ly Seng-y-kang pangdai hawi atawm iy, achi ly huni laawm theung i mawi hawi atawm,’ nanai thui u. Na i py huni laawm my kaichi ai mai i nai ama hai ai,’ nanai thui u bo.

⁴Huna nai y nang khumi cho awi, nichi ai thui tamawn iy amo leu thui ba,” napi.

⁵ARENG i phailo ly kai i tlang tleaung y ang tym. ARENG my, “Aw Israela chengchi awi, nangchi katheu u nai leuchi hawi nangchi i dawn naichi kai pany.

⁶Nangchi my padei nai khumichi ly khri pa-rei nawi nai deaungkho y, lamchi ly khumi veuchi hawimy kawi na veng bo.

⁷“Hunai deaungkho y sa thai naira awm nai ARENG my leu pei nai ly hini mary ly Seng-y-kang pangdai ne khyp. Na i py mawi ly atichi mo? Nangchi i kiu y dei nai veuchi ne lawh ly! Naibaly kai ly nangchi ai mary angam mang y patheu pawn ai!

⁸Nangchi ly haisau jei u a? Nangchi ai haisau hawi ang tleh ai nai khumichi ai kaimy hawi ai, nanai ARENG my leu pei bo.

⁹Nangchi ai mary angam mang y patheu iy, pri takhra i khumichi kiu y au ai. Kai ly nangchi ai dei pa-rei kang pajeng bo.

¹⁰Nangchi ly nangmychi i khujyh y nangchi ai tara kangchih nai deaungkho y my, ‘Pri palara avum nai khumichi ly tavai keung y dei u ai. Huna nai khala kai ly ARENG ne, nanai khumi lutengchi my pany u ai.

¹¹Seng-y-kang pangdai ly mawi ai ama hai nai kamta, hini mary ly nangchi ai ama hai ai ny y. Israela pri khujyh y kai ly nangchi ai kang pajeng ai.

¹²Kai ly ARENG ne, nanai py, saleaung deaungpa prichi i tara leu py patawm iy, kai i reitachi hawi leu pei naichi ai taphra nanai py, nangchi pany u ai,” nanai kai teng y leu pei bo.

¹³Kai ly huni leu pei naichi thui pi nai thym khala y, Benaiah i chapo Pelatiah ly atlym i dei bo. Huna nai khala kai ly khaileaung y tabiu naimy ambeu vui iy, “Aw sa thai naira angym nai ARENG! Nang ly awm rai nai Israela cheng ngiereichi ai tamyh pawn ai bo a?,” nanai aeu naimy thui pi nai ne.

¹⁴ARENG i leu ly kai teng y ang tym.

¹⁵Mymy ly “Nang khumi cho awi, Jerusalem mary y awm nai khumichi ly nang hawi nang i amjo amnau pri palara avum nai Israela khumichi i satang thui u nai ne. Nichi ly ARENG y amjo amnau kypkyp hawi, mymy teng i nai kamlo y awm u naichi ne. Huna nai y mymy ly hini pri achi amtym ai nai ang pei nai ne,’ nanai thui u bo.”

¹⁶Naibaly kai ARENG my leu pei nai ly “Nichi ai kamlora i cheng takhrachi hawi vanrei awm ai nai pato iy pri takhra y ahei hai teu i py, kani tanarei sala nichi awm naira y nichi hawi vanrei kai kaawm ai.

¹⁷“Hunai deaungkho y sa thai naira awm nai kai ARENG my leu pei nai ly nichi teng y thui pi. Kai ly cheng takhrachi theung i nai nangchi ai kang la teang iy, nichi ahei u dan nai prichira i nai, nichi ai kapangym ali teang ai. Israela pri py kapei pi ali teang ai.

¹⁸Nichi ly tym u ali teang nai khala, mymychi i avum nai ngiereichi, amso ngai hawi nai mynchi khai u su ai.

¹⁹ Nichi ai paleung adyh adawi hai iy paleung kangtha hawi ka-dawn kangtha kapei ai. Kai ly nichi i lengseaung kamta tang nanai paleung la pi vui iy, leu atangai nai paleung kapei ai.

²⁰Huna nai y nichi ly kai i reitachi kry iy kai i leu pei naichi hawihai palai tangai u ai. Nichi ly kai i khumichi lawm iy kai py nichi i Tameuh lawm ai.

²¹Na i py kai ly amso ngai hawi nai mynchi mang y paleung apei naichi ai ly kapajeng ai,” napi. Hini ly sa thai naira angym nai ARENG i leu pei nai ne.

²² Heng nai amjychi ly akheang u amteaung nai khala amlira kheuchi py abawi rau nai ne. Israela chengchi i Tameuh i nang parai nai kangvang ly nichi i tlang tleaung y tym bo.

²³Naibaly angvang nai kangvang sangso ly mary i nai theu vui iy, nisi ngan mang y awm nai mawi aheungchi mang y asyh vui bo.

²⁴Paleung mei y niu nai theung y, Tameuh i phailo ly kai ai kateang kalau iy, pri palara avum nai khumichi awm nai Babulon pri mang y ang tha ali teang. Naibaly paleung mei y niu nai ly jum dudu bo.

²⁵Kai ly kai teng y ARENG my thui pi nai leaungsai ngiereichi ai pri palara avum nai khumichi teng y thui pi pateang nai ne.