Read Khumi Chin Ezekiela 13 Bible Online

Ezekiela 13 - Khumi Chin bible

Ezekiela 13

¹ARENG i leu ly kai teng y tym.

²Mymy ly “Nang khumicho awi, Israela chengchi i amochi ai thui tamawn ba; leu pei naichi ai mymychi naimy phym iy thui naichi teng y, ARENG i leu pei nai tangai ai nai thui pi,” napi.

³Sa thai naira awm nai ARENG my, “Hini amo ka-khumchi ly taham si! Nichi ly kai i phailo my pany hai nai ngo y naimy, mymychi paseng amang iy thui u bo.

⁴Israela chengchi awi, nangchi i amochi ly phra seaungkhrang nai maryra i khivachi kamta ati sai py ny y.

⁵Huni amochi ly mary apaichi anawi nai kry y; mary apaichi py pathyp u teang y. Hunai deaungkho y ARENG i kani y tavai atiu u nai khala, Israela pri ai ama hai pajau ai ny y.

⁶Nichi i paleung mei y niu naichi ly kateng ny y iy, nichi i thui yb nai amo leuchi py ka-chawi leuchi ne. ARENG i leu pei nai ne, nanai thui u i py, huni leu ly kaimy pei nai ny y leang. Na teu i py nichi thui nai kamta tym khyp ai, nanai athang khai u lawh ly!

⁷Nichi teng y hina nai thui pi; nangchi i paleung mei y niu naichi ly kateng ny y iy, nangchi thui yb nai amo leuchi py, ka-chawi leuchi ne. Nangchi my huni leu ai kai i leu pei naichi ne, nanai thui u teu i py, kai ly huni leu nangchi teng y kang pei y leang,” napi.

⁸Naibaly nichi teng y sa thai naira awm nai ARENG Tameuh my leu pei nai ly “Nangchi i leu ly teng y leang; nangchi i paleung mei y niu naichi ly li-tapawp naichi teu, kai ly nangchi ai ka-awi sa nai ne, nanai kai, ARENG my leu kang pei bo.

⁹Teng y nai paleung mei y niu nai ai niu iy nangchi, teng y nai leu thui yb nai amochi ai kapajeng ai. Nangchi ly kai i khumichi leu ka-rum sa naira y kun ai nai nga u ai ny y. Israela pri khumi charangra py, nangchi i amyn tabawi pajau y. Nangchi ly nangmychi i pri y mana khala py, vawi ai nai nga u ai ny y. Huna nai khala kai ly sa thai naira awm nai ARENG ne, nanai nangchi pany u ai.

¹⁰ “Amochi ly cheaungkhangra y hawi angym bo, nanai thui iy kai i khumichi ai tapawp u bo. Ati cheaungkhangra y hawi angymbe y leang! Kai i khumichi ly angkadeng pajui y nai lengseaung mary apaichi sa i, amochi ly jeu iy theung kangleung pajui u bo.

¹¹Huni mary apai ly anawi takengkei ai, nanai huni mary apai ai theung kangleung pajui nai khumichi teng y thui pi. Kai ly khri pa-rei kani nai hai ai. Zi akawichi ly mary apaira y tla iy, ali kamchai aho nai deaungkho y,

¹²huni mary apai ly anawi ai. Huna nai y nangchi i theung kangleung pajui nai ly ati kamran awm mo, nanai khumi luteng my angdeang u ai,” nanai ne.

¹³Sa thai naira angym nai ARENG my leu pei nai ly “Kai ly kado katheu y huni mary apai panawi ai nai ali kamchai aho hai ai. Kado theu naimy khri pa-rei kani nai hai iy, ji akawichi tla hai ai i, phra hai ai.

¹⁴Sangum langdengchi amteng seaungkhrang hai ai nai patyp naimy, kai ly amochi my theung kangleung pajui nai apaichi panawi pawn ai. Mary apai anawi nai khala, nangchi ai ang ti iy dei u ai. Huna nai khala kai ly ARENG ne, nanai nangchi pany u ai.

¹⁵“Mary apai hawi raurei, huni ai theung kangleung pajui u nai khumichi ly kai i kado theu nai y pajeng naira avum u ai. Huna nai khala mary apai ly anawi vui iy, theung kangleung pajui nai khumichi py tama pawn ai.

¹⁶Jerusalem mary ly cheaungkhangra y hawi angym nai by y pui naimy, paleung mei y hawi angym naira niu bo, nanai thui u nai amochi ly mary apaichi kamta taphra u veng bo,” nanai nangchi teng y kang thui pi ai! Hini ly sa thai naira angym nai kai ARENG i thui nai leu ne.

¹⁷ARENG my, “Nang khumicho awi, nang i chengchi theung y leu pei naichi ai phym amang iy thui u nai neampachychi ai khen cham; nichi ai thui tamawn ba.

¹⁸Naibaly sa thai naira angym nai ARENG my leu pei nai nichi teng y thui pi ai nai ly: “Neampachychi awi, nangchi ly taham si na a! Khumi takhrachi ai deaung kamta man vui pajau ai nai, khumi luteng i vui sa thai naira nga hai ai nai atam kakawp my sa yb nai kiukhenchi hawi, lu akawmra sambynchi py sa pi bo. Nangchi ly nangmychi i vui hawi ai nai kai i khumichi tlang tleaung y deira hawi hengra peang ai nai ngai u nai ne.

¹⁹Chohpui chamaw nei kiukawirei hawi tako maidenreichy nga ai nai molam y, kai i khumichi i mo y kai ai tahm khai u y. Nangchi ly padei ai ataing y nai khumichi ai padei u iy, padei ai ataing naichi ai kangheng khai u lawh; hunai deaungkho y nangchi ly kai i khumichi ai li-tapawp i nichi ly ym u bo,” napi.

²⁰Sa thai naira angym nai ARENG my leu pei nai ly “Tavo ai patym nai kamta, khumichi ai deaung kamta man vui pajau ai nai nang i teaung nai kiukhenchi ai, kai ly niu ngai y. Nang kiu i kiukhenchi theng baw iy, tavochi ai kamta paeung cheng nai khumichi ai, nang i kiu i nai kaimy lawi hai ai.

²¹Nangchi i lu y akawm nai sambynchi theng baw iy, kai i khumichi ai nang i kiu i nai lawi hai vui ai. Huna nai khala kai ly ARENG ne, nanai nangchi pany u ai.

²²“Nangchi ly kaimy paleung phra hai ai ngai y nai kai i khumichi ai leu ka-chawi teaung iy, paleung phra atho di hai bo. Nangchi ly khumi hawi y naichi ai, hawi y nairachi khai su y ai nai atho pei nai deaungkho y, nichi i hengra chau hai bo.

²³Hunai deaungkho y nangchi ly teng y nai paleung mei y niu naichi ai, niu u ali bi ai ny y; lam tamang naira y tym hai nai leuchi thui u bi ai ny y. Kai ly ARENG ne, nanai nangchi pany thai ai nai kai i khumichi ai, nangchi kiu i nai kaimy atleu ai,” napi.