Read Khumi Chin Ezekiela 14 Bible Online

Ezekiela 14 - Khumi Chin bible

Ezekiela 14

¹Israela cheng lu sa nai phyreichi ly kai teng jeu iy, kai i mo y ateh u.

²Huna nai khala ARENG i leu ly kai teng y ang thui pi nai ne.

³Mymy ly “Nang khumicho awi, hini khumichi ly mynchira y paleung apei u nai y, huni mynchi my nichi ai tamang hai bo. Nichi ly kai teng i leu pathang nai nga u ai nai athang khai u a?

⁴“Sa thai naira angym nai kai ARENG my nichi teng y ati mana leu pei mo, nanai thui pi. Mymy ly Israela cheng ngiereichi myn chiu ai nai paleung apei u nai deaungkho y, huni mynchi my nichi ai tamang hai bo i, amo teng y ahihawi iy leu deng bo. Huni khumi teng y kai, ARENG my leu pathang ai. Huni pathang nai leu ly huni khumi i chiu nai mynchi i vui ne.

⁵Huni mynchi ly Israela chengchi ai kai hawi akhan hai bo. Na i py nichi ly kai i pathang pi nai deaungkho y, kai i tlang tleaung y ka-ym awm u ali teang ai.

⁶“Huna nai y Israela chengchi teng y thui pi; sa thai naira angym nai kai, ARENG my leu pei nai ly uikheih u. Amso ngai hawi nai nangchi i sa naichi ai nyn va vui ly mynchi py khai su.

⁷“Israela cheng, ti y baly Israela pri y awm nai cheng takhra khumichi ly kai ai khai su iy amo teng y leu deng ai nai chei nai khala, kai, ARENG my nichi ai pathang pi ai!

⁸Kai ly nichi ai ka-awi kasa ai. Nichi ai amtiu naira hawi kangji pei nai lawm ai nai kai ly teang ai. Kai i khumi kamkawm theung i nai patheu vui ai. Huna i naini kai ly ARENG ne, nanai nangchi pany u ai.

⁹“Amo ly parawi naira avum iy teng y nai amo leu katheu baly, huni amo ai kai, ARENG my parawi nai ne. Kai i kiu pheu naimy ni ai tiu iy Israela cheng theung i nai patheu vui ai.

¹⁰Huni amo hawi ni teng y leu deng nai khumichi raurei, pajeng naira avum ai.

¹¹Israela chengchi ly kai ai khai su nai y, mymychi kypkyp kamngora anum y ai nai hina nai kasa ai. Nichi ly kai i khumichi lawn ai i, kai py nichi i Tameuh lawm ai,” napi. Hini ly sa thai naira awm nai ARENG i thui nai leu ne.

¹²ARENG i leu ly kai teng y tym.

¹³Mymy ly “Nang khumicho awi, pri harei ly kamngo sa iy kai i tlang tleaung y ka-ym by y lawh baly, kai ly kiu pheu iy huni pri y teicha teinei avaw hai ai. Tahum takang theu hai ai i, khumichi hawi tawnbawichi raurei katamyh ai.

¹⁴Huni pri y Nova, Daniela hawi Joba nichi leaung thomrei awm u lawh teu i py, nichi i hawi naira my nichi ai naini atleu iy takhra khumichi ai ly atleu pajau ai ny y,” napi. Hini ly sa thai naira awm nai ARENG i thui nai leu ne.

¹⁵“Ti y baly kaimy khumichi ai tamyh ai nai mawi kasichi pato ai; huni pri y khumi angso savai tlang iy aki aleaung thai y na pa-rei, mawi kasichi deaungkho y khri pa-rei ka-jeira awm ai.

¹⁶Huna nai khala kai, ARENG ly Tameuh kangheng ne nai deaungkho y, huni pri y huni khumi leaung thomreichi awm lawh teu i py, mymychi i cho chanauchi ai atleu u pajau ai ny y; mymychi ai naini atleu u pajau ai khyh. Huni pri py khumi angso savai tlang ai.

¹⁷“Ti y baly kaimy huni pri y tavai atiu hai ai i, khumi hawi tawnbawichi raurei tamyh pawn ai nai taphra thai nai haichi pato nai khala y,

¹⁸sa thai naira angym nai kai, ARENG ly sa khyp nai deaungkho y, huni khumi leaung thomreichi ly huni pri y awm lawh teu i py, nichi ly mymychi i cho chanauchi ai malawn py atleu u pajau ai ny y; mymychi ai naini atleu u pajau ai khyh.

¹⁹“Kai ly huni pri y no kanghawi tym hai iy kado theu naira my khumi neangneangchi hawi, tawnbawi neangneangchi ai dei hai baly,

²⁰sa thai naira angym nai kai, ARENG ly sa khyp nai Tameuh kangheng ne nai deaungkho y, Nova, Daniela hawi Joba nichi leaung thomrei ly huni pri y awm teu i py, nichi ly mymychi i cho chanauchi ai malawn py atleu u pajau ai ny y; mymychi i hawi naira my naini mychi ai atleu u pajau ai,” napi.

²¹ Sa thai naira angym nai ARENG my leu pei nai ly “Kai ly khumi hawi tawnbawichi tamyh ai nai tavai takai, tahum takang, mawi kasichi hawi no kanghawi napi nai, hawi y keh nai pajeng naira amjy palyhrei, Jerusalem mary y tym hai ai.

²²Huni pajeng naira i law tleaung nai cho chanau awm iy nichi ly nangchi teng y ang tym u nai khala, nichi i amhi amtlau nai khen iy Jerusalem mary y kaimy pajeng nai ngiereichi py, teng nanai hawihai pany ai;

²³nang ly nichi i amhi amtlau nai saichi niu nai khala, kai ly ati mo ra py so atyhtyh y leang, nanai hawihai pany ai,” napi. Hini ly sa thai naira angym nai ARENG i thui nai leu ne.