Read Khumi Chin Ezekiela 16 Bible Online

Ezekiela 16 - Khumi Chin bible

Ezekiela 16

²Mymy ly “Nang khumicho awi, Jerusalem mary ai mymy i sa nai amso ngai nairachi patei pi.

³Huni Jerusalem mary ai sa thai naira angym nai ARENG my leu pei nai nang ly thui pi; “Nang i kangpreangchi ly Kanan pri y tapen iy nang i ngampo ly Amori cheng, nang i ngamhm ly Hiti cheng ne.[4]

⁴Nang ai tapen nai khala y ami py nang i laileung vui sui pi y, tui py pahiu pi y, palawi py tamui pi y, niprawn py bam pi y.

⁵Huna nai kamta nang ai pahen iy pasawm patau pi nai leaungrei py by y. Nang i tlang tleaung y tamen naira by y nai deaungkho y, nang ai tapen chum nai khala ly-um prang y aphi su nai ne.

⁶“Naibaly kai ly nang i sahawi mang aleaung nai khala, thinai theung y nang atapi nai kaniu bo. Nang ly thinai angtlen tlawnhawn iy py, kai ly nang ai dei hai y.

⁷Tamokalem by y nai dengkeaung di kamta, tleaungri kang cheang hai. Mo-cha hawi nai anglo ka-cheang lawm bo. Nang i kanu kasangchi amteng iy sam py sau ryh bo. Na i py nang ly tlang ka-keu jo rai.

⁸“Kai ly nang i sahawi mang aleaung bi bo. Huna nai khala nang ly khrei nai paleung mang y tleaungri aveang nai neng tym bo, nanai kang niu nai deaungkho y, kai ly tlang ka-keu naimy awm nai nang ai kai i ateaung hawi kang khiu iy, nang ai kang khrei mang, nanai adeu chum baly, nang hawi leu maikawm asa i, nang ly kai i aju lawm bo,” napi. Hini ly sa thai naira angym nai ARENG i thui nai leu ne.

⁹“Kai ly tui la iy nang teng y thi abawi naichi paju pachai pi. Nang i tlang ai py olive asitui hawi kang pajui pi.

¹⁰Nang ai kaseaung pau mawi thun nai ateaung alangchi ateaung hai iy, hawi keh nai mawipeih phainai amchiu hai bo. Kanih mai ka-syn sambyn py byn hai iy vang kateng ateaung kangjiuchi amthyp hai nai ne.

¹¹Nang ateaung ai nai vang kateng lengseaungchi hawi kiura y amchiu ai nai ka-sichi, kaneaung y awi ai nai leangchi py,

¹²notareang amchochi, kano amchochi hawi nang adeung ai nai apu parai nai areng lukhym py kang pei bo.

¹³Nang ly muku tangkachi ateaung iy, kanih mai ka-syn ateaung, kaseaung pau mawi thun nai ateaung hawi, vang kateng ateaung alangchi ateaung jojo ai nai nga bo. Nang ly hawi keh nai tako dei hawi sa nai tako, khawi hang hawi olive asitui cha ai nai nga bo. Nang i mo-cha hawi nai ly sadipa-la nanai y, nang ly samrangnu lawm bo.

¹⁴Kai ly nang ai mo-cha khri pa-rei kahawi palum pi nai deaungkho y, nang ly cheh ai naira amjy tariurei by y pa-rei mo-cha hawi na. Huna nai nang i mo-cha hawi nai ly pri tleirei y amthang bo,” napi. Hini ly sa thai naira angym nai ARENG i thui nai leu ne.

¹⁵“Na i py nang ly nangmy i mo-cha hawi nai hawi, amthang nai sai y a-ym iy bima lawm bo. Nang ly nang teng y ang jeu nai khumi ngiereichi hawi i ahawi nai ne. Nangmy i mo-cha kahawi py apasai y.

¹⁶Nang ly nangmy i ateaung alang phyreichi hawi, nangmy i chiu nai meingtymchi palum naimy bima sa iy, nangmy i khumi neangneangchi teng y apei bo. Huna nai kamta sa ai nai tlo y, huna nai py awm ngau y.

¹⁷Nang ly kaimy kang pei nai muku tangka hawi vang kateng lengseaung phyreichi la iy neampacho mynchi sa, hunichi hawi tamang nai ne.

¹⁸Nang ly kai i pei nai kaseaung pau myn thun nai ateaungchi hawi mynchi ai khiu bo. Huni mynchi ai kaimy pei nai olive asitui, mui katuichi hawi apathyp iy talam lawh nai ne.

¹⁹Kai ly nang cha ai nai hawi keh nai tako dei, olive asitui, khawi hang hawi sa nai teicha teineichi kang pei. Na i py nang ly mynchi teng y meimai nga ai nai, huni teicha teineichi ai nichi teng y mui katui palawn iy talam lawh bo,” napi. Hini ly sa thai naira angym nai ARENG i thui nai leu ne.

²⁰“Hunaibaly nang ly kai hawi nga nai cho chanauchi ai la i, tawnbawi palawn iy mynchi teng y apathyp bo. Nang ly kai i tlang tleaung y ka-ym by y nai khyh chang y i, paleung anyp y naimy,

²¹ati mana nai y kai i cho chanauchi ai la vui iy mynchi teng y apathyp lawh mo?

²²Nang deaungdi nai khala tlang ka-keu naimy thinai theung y angtlen jo nai leaungsaichi ai, nang ly amso ngai hawi nai bima sa nai thym khala, tlenreichy py pany vau y nai sai a?,” napi nai ne.

²³Sa thai nai angym nai ARENG my, “Nang ly taham si! Nang ly taham si! Nang ly hawi y nairachi sa chum baly,

²⁴seng meingtym tleirei y nangmy i vui chiu ai nai mynchi hawi, bima kalop sa ai nai meingtymchi sa bo.

²⁵Lam sangum tleirei y nangmy chiu ai nai meingtym ka-sangchi sa iy, amy i mo-cha hawi nai ai amso ngai pa-rei sa. Jeu nai khumi lutengchi teng y amy i tlang aau iy, kani tleaung y kanirei, bima lawn tleaung lawnra bo.

²⁶Paleaung ham parai nai yhm deaungpa Aikupta chengchi ai, mymy hawi vanrei i ahawi ai nai pei iy, bima sa nai ly kai ai kado patheu nai ne.

²⁷Vai, kai ly nang ai kang pajeng ai nai hawi, nang i khu ka-peang vym vui ai nai kiu pheu bo. Kai ly nang i ngaiphi ala iy hawi y nai saichi ai niu ngai y nai Philistin anglochi teng y nang ai kang-au veng bo.

²⁸“Nang ly takhra khumichi hawi ngai nai paleung anyp y nai deaungkho y, nang ly Asuria neampachochi hawi tamang bi bo. Na i py nang i ngai nai bym y leang rai.

²⁹Huna nai y nang ly ka-sum ka-pai sa nai Babulon pri i neampachochi hawi py tamang bi nai ne. Na i py nang i ngai nai bym y asai rai,” napi.

³⁰Sa thai naira angym nai ARENG my leu pei nai ly “Nang ly kangji by y nai bima kamta, hina naichi sa bo.

³¹Nang ly lam sangum tleirei y nangmy chiu ai nai mynchi sa iy, seng meingtym tleirei y bima kalopchi sa ai nai meingtymchi sa nai khala, bima kalop sa lawh teu i py, kalang bimachi kamta vang lo y lawh.

³²Nang ly nangmy i juvo ai khrei ai nai tleaung y ly apany vai y naichi hawi i ahawi ai ngai nai neampachy hawi atawm.

³³Bima ai ly vang pei ai nai tla; na i py nang ly meingtym tleirei i jeu nai neampachochi ai, nang hawi i ahawi ai nai langseaungchi pei ra lawh.

³⁴Nang ly asa takhra nai bima ne. Ami py nang ai vang pei iy bima palawn nai ny y, nang ly vang py ngo y; nangmy mang naini pei ra lawh! Nang ly angchi khyp, asa takhra pyp nai ne,” napi.

³⁵Nang bima Jerusalem mary awi! ARENG my leu pei nai tangai.

³⁶Sa thai naira angym nai ARENG my leu pei nai ly “Nang ly khri pa-rei paleaung iy ateaung alangchi aleng pawn nai bima kamta, amymy ai neampachochi teng y py, amso ngai hawi nai mynchi teng y py, aau naimy amy i cho chanauchi ai mynchi teng y kapathypra tawnbawi palawn naimy tleh bo.

³⁷Hina nai molam y kai ly nang i paleung abie nai, nang i khrei nai khumichi ai angym hai chum baly, nang i paleung bie nai hawi niu ngai y nai bawibawichi ai angym hai iy, nang ai taki teungtareung hai ai. Naibaly nang i ateaungchi aleng hai iy nang i tlang ka-keu awm nai patei ai.

³⁸Kai ly nang ai ami i yhm hlau taphra nai hawi, khumi ai padei nai molam y kang pajeng ai. Kai ly khri pa-rei kado theu i, kang khen pajau y nai deaungkho y, nang ai vawitheung tha iy kang padei ai.

³⁹Kai ly nang ai nichi i kiu y au ai. Nichi ly nangmy i chiu naira mynchi hawi, bima meingtymchi ai ang panawi pi pawn ai. Nichi ly nang i ateaungchi hawi lengseaung vang katengchi la pawn iy, nang ai tlang ka-keu naimy ang khai u su ai.

⁴⁰“Nang ai lengseaung hawi aphi iy haisau hawi kalei ai nai nichi ly khumi kanghu pui kachu ai.

⁴¹Nichi ly nang i yhmchi ai mai leang pawm iy, nang i pajeng naira avum nai sai ai, neampachy neangneangchi teng y patei ai. Nang i bima kalop hawi neampachochi teng y langseaung pei nai py, kaimy anawn hai ai.

⁴²Naibaly kai ly kado theu nai rym ai i, awmnem ai; kado theu bi ai ny y, ka-e paleung py awm bi ai ny y leang bo.

⁴³Nang ly nangmy deaungdi khala i satang ai tami veng iy, hawi y naira cheaungkhangchi sa nai ly kai ai kado theu hai nai ne. Huna nai y huni leaungsaichi molam y, kai ly nang ai kang pajeng ai. Nang ly hawi y nairachi sa nai bo y, takhra amso ngai hawi naichi ai ati mana nai sa panawi bi lawh mo?,” napi. Hini ly sa thai naira angym nai ARENG i thui nai leu ne.

⁴⁴ARENG my, “Aw Jerusalem, khumichi ly nang i satang molam y, ‘Amhm i sa nai adui nai chaniu,’ nanai thui achih nai leu teaung u ai.

⁴⁵Nang ly ngamhm adui khyp nai bo. Nang i ngamhm ly juvo hawi cho chanauchi ai niu ngai y nai khumi ne. Nang hawi nang i ngamjo ngamnauchi ly atawm u i, nichi ly mymychi i juvochi hawi cho chanauchi ai niu ngai u y. Nang i ngamhm ly Hiti neampachy ne i, ngampo ly Amori cheng ne.

⁴⁶“Nang i ngamjo neampachy ly mymy i chaniuchi hawi vanrei awm nai tosyh ngan mang i Samari mary ne. Nang i ngamnau neampachy ly mymy i chaniuchi hawi vanrei awm nai, tokalawi ngan mang i Sodom mary ne.

⁴⁷Nang ly nichi i kheu lawi chiu iy, amso ngam naichi sa naimy paleung tuinem a? Tuinem y; nang ly neng maidenreichy sala y my, nichi i sa nai ngiereichi tleaung y hawi y keh naichi sa nai ne.

⁴⁸Sa thai naira angym nai ARENG my, “Kai ly Tameuh kangheng ne khyp; nang i ngamnau neampachy Sodom mary hawi ni i chaniuchi ly nang hawi nang i chaniuchi kamta, hawi y nairachi mana khala py so u vai y.

⁴⁹Ni hawi ni i chaniuchi ly paleung len naimy kajeu kawi ala nai, ami ai py tahm khai y iy khumi kamawnchi hawi avaw nai khumichi ai sabawm u y.

⁵⁰Nichi ly paleung len iy kai i mei angai y naichi sa u nai ne. Hunai deaungkho y nangmy pany hawihai nai kamta, kai ly nichi ai taphra hai pawn bo.

⁵¹“Samari mary ly nang i hawi y sa nai ka-hyhrei tahm py so y. Nang ly ni i sa nai ngiereichi tleaung y amso ngai hawi keh naichi sa lawh nai ne. Nang ly amso ngai hawi parai nai deaungkho y, nang i ngamjo ngamnau neampachychi ly nang hawi dawn pata baly, nichi ly kamngo by y naichi, nanai palawn ai.

⁵²Vai nang ly nangmy naimy kangji nga ai. Nang i kamngochi ly nang i ngamjo ngamnau neampachychi i kamngochi tleaung y, khri pa-rei hawi y katlen nai deaungkho y, nichi ly nang hawi pata baly kamngo by y naichi atawm. Huna nai nangmy i ngamjo ngamnau neampachychi ai kamngo by y naichi kamta amny hai nai molam y, nang ly nangmy i kangji nga naira y awm ba,” napi.

⁵³ARENG my Jerusalem mary ai leu pei nai ly “Sodom mary hawi huni mary i chaniuchi, Samari mary hawi huni mary i chaniuchi ai kai ly sareaung hawi hai ali teang ai. Nang ai py sareaung hawi hai ali teang ai.

⁵⁴Nang ly nangmy ai akaji ai. Nang i kangjilai y, nang i ngamjo ngamnau neampachychi ly mana tanrei tlamsa u ai mo, nanai apany hai ai.

⁵⁵Nang i ngamjo ngamnau neampachy Sodom hawi ni i chaniuchi, Samari mary hawi ni i chaniuchi ly sareaung hawi ali teang ai.

⁵⁶Nangmy i hawi y nairachi ai khumichi my pany y rai nai, nang i amlyh am-e nai neng khala, nang ly nang i ngamnau neampachy Sodom mary i amyn pany hai y. Vai ly nangmy kypkyp my Edom chaniu anglo hawi yhm deaungpachi, Philistin chaniu anglo hawi yhm deaungpachi, nang ai niu ngai y nai khumichi my panui hai naira lawm bo.

⁵⁷

⁵⁸Nang ly nangmy i sa nai amso ngai nai hawi paleaung nai molam y, nang ly kham ai nai tla ai,” napi. Hini ly ARENG i thui nai leu ne.

⁵⁹Sa thai naira angym nai ARENG my, “Nang ly nangmy i adeu nai leuchi ai tahm khai y, Leu Maikawm py taphra nai deaungkho y nang, nga ai ataing nai kamngolai kang pajeng ai.

⁶⁰Na i py nang deaungdi khala, kai i sa nai Leu Maikawm ai adawn ali teang iy, nang hawi deungtasarei khaw nai Leu Maikawm asa ai.

⁶¹Nang i ngamjo hawi ngamnau neampachychi nang teng y tym ali teang nai khala, nang ly nangmy sa nai saichi adawn vau ai i, kaji ai. Nang hawi asa nai Leu Maikawmra y abawi y teu i py, kai ly nichi ai nang i chaniuchi kamta lawm hai ai.

⁶²Kai ly nang hawi Leu Maikawm asa bi ai. Huna nai khala y kai ly ARENG ne, nanai nang pany ai.

⁶³Nangmy i sa tamang nai ngiereichi ai kaimy kang pahen pi nai khala, nang ly huni tamang nairachi ai adawn vau iy, kaji nai deaungkho y labeaung malawn py ang vam y na pa-rei kangji nga ai,” napi. Hini ly sa thai naira angym nai ARENG i thui nai leu ne.