Read Khumi Chin Ezekiela 17 Bible Online

Ezekiela 17 - Khumi Chin bible

Ezekiela 17

¹ARENG i leu ly kai teng y tym.

²Mymy ly “Nang khumicho awi, Israela chengchi teng y pata nai thui pi;

³sa thai naira angym nai kai, ARENG my ati mana leu pei mo, nanai nichi ai pany ha ba. Vaichi khala ham parai nai pakhi kalenchi hawi, mui kasauchi awm nai ahmtlau pui harei awm. Ni teng y apu parai nai muichi awm. Huni ahmtlau pui ly Lebanon mawi saleung y akheang kalau iy saitleang keung salyh y chym bo.

⁴Keung salyh i sai kadeu khei iy ka-jo ka-van sa nai pri mang y syn i, ka-sum ka-pai sa nai khumichi i maryra y khai bo.

⁵Naibaly ni ly Israela pri y awm nai keungdi harei la iy paijeaung keung kamta prau thai ai nai, tui avaw y nai khaileaung kahawira y ui bo.

⁶Keungdichy ly sai ampho iy anem taryhdyh naimy changpichi angvai i, amhiryh nai kreip keung lawm bo. Huni keung i changpichi ly ahmtlau awm nai mang y lo kalau iy, tangjynchi ly khaileaung kathiu y aviu bo. Kreip keung ly ngam, changpichi hawi amhiru nai ne.

⁷Huni meingtym y ahmtlau pui harei awm; ni i pakhichi ly ham iy muichi py tho parai. Kreip keung ly mymy i prau nai akho dengdairei, tui hawihai palai nga ai nai athang awm i, ahmtlau awm nai mang y tangjynchi lo hai iy ngamchi py amlawi hai bo.

⁸Na i py ngam hawi athai thawn nai kreip keung kahawi lawm thai ai nai, huni kreip keung ai ly khaileaung kahawi hawi tui awm nai meingtym y ui nai ne.

⁹Huna nai y sa thai naira awm nai kai ARENG my deng i, “Hini kreip keung ly heng iy keung cheang pajau na a? Angchei i ahmtlau my huni keung ai akyn vui iy athaichi kaleng pawn nai hawi changpichi khei baly deirawm hai y ai a? Huni keung akyn vui ai nai atho kaawm khumi kanghu py aly ngai y leang.

¹⁰Ne, huni kreip keung ai ui baly heng pajau na a? Huni keung ly nisi ali aho nai khala y ajawi rawm iy, dei vui y ai a?” napi.

¹¹ARENG my kai teng y leu ang pei nai ly

¹² “Hini pata nai leu i awm nai sai pany u a?, nanai huni atiu reng nai khumichi teng y deng cham; Babulon samrang ly Jerusalem mary y jeu iy samrang hawi vanrei, mymy i bangtangchi ai Babulon mary mang y hawi vui nai satang huni khumichi teng y thui pi.

¹³Naibaly mymy ly huni Juda samrang yhm dengtheungra i leaungrei ai palau iy, aly nai leu sumneang asa chum baly, nichi ai vaineng abeu hai bo. Ni ly aly ngai nai khumi phyreichi ai hawi pawn bo.

¹⁴Hina nai sa nai ly Juda pri y awm rai nai khumichi my, ni i leu tangai iy mymy i pri y peang ali teang thai y ai nai, hina nai sa nai ne.

¹⁵Na i py Juda samrang ly tavai thau i, keaungngochi hawi tavaimi risa neangneang kasabawmra nga ai nai, Aikupta pri y savaichi pato bo. Ni i katau eaung a? Huna nai sa nai ly law tleaung na a? Ka-lyra sumneang akhai nai taphra nai ly pajeng naira avum y naimy awm na a?

¹⁶Sa thai naira angym nai ARENG my, “Kai ly Tameuh kangheng ne; hini samrang ly amy i vaineng abeu nai ai tahm khai y iy, amy ai samrang y palyn nai keung Babulon samrang hawi ka-lyra sa nai leu sumneang ai py taphra nai deaungkho y, Babulon mary y dei takengkei ai.

¹⁷Babulon tavaimichi ly khumichi ai padei ai nai abyhra amkeuchi sa iy tui apaichi tai u nai khala y, atho len nai Aikupta samrang i tavaimi kamkawm malawn py, Juda samrang ai sabawm pajau ai ny y.

¹⁸Huni samrang ly mymy i vaineng abeu nai ai tahm khai y iy ka-lyra leu sumneang akhai nai ai py taphra bo. Mymy ly vaineng abeu chum i py, hina naichi sa nai deaungkho y, ni ly vai law tleaung ai ny y,” napi.

¹⁹Sa thai naira angym nai ARENG my, “Kai ly Tameuh kangheng ne; ni ly kai i amyn y sa nai vaineng tahm khai y iy, leu sumneang akhai nai ai taphra nai deaungkho y, ni i tlang tleaung y kapajeng ai.

²⁰Kai ly musy i mawipy hawi ni ai kapatiu iy Babulon mary y hawi iy hu y ni ai kapajeng ai. Ati mana nai mo na baly ni ly kai i tlang tleaung y ka-ym by y nai deaungkho y ne.

²¹Mymy i tavaimi kahawi kehchi ly tavai keung y dei u ai; dei kamthumchi ly meingtym tleirei y ahei u ai. Huna nai khala kai, ARENG i leu pei nai ne, nanai nangchi pany u ai,” napi.

²²Sa thai naira angym nai ARENG my leu pei nai ly: “Kai ly saitleang keung ka-sang salyh i sai la iy, sai kadeu khei chum baly asang keh nai mawi saleung y kaui ai.

²³Asang keh nai Israela mawi saleung y kaui ai. Huni keung ly changpichi ampho iy athai py athai ai i, apu parai nai saitleang keung lawm ai. Huni keung y tavo cheaungkhangchi tabu sa u ai i, keung ka-khuira y py abyh u ai.

²⁴Kai ly ARENG ne, nanai hini pri y awm nai dengkeaung bawibawichi my pany ai. Kai ly dengkeaung ka-sangchi paliu iy dengkeaung lochi asang hai ai. Dengkeaung ngam heng-up nai keungchi ai ly ngam ajawi hai iy, ngam ajawi rawm nai keungchi ai ly heng-up hai ai. Hini ly kai, ARENG i leu pei nai ne. Kai ly kaimy i leu kamta kasa ai,” napi.