Read Khumi Chin Ezekiela 19 Bible Online

Ezekiela 19 - Khumi Chin bible

Ezekiela 19

¹Israela samrang i chapo leaung nyhrei i vui vo tangam nai khulym ly anui mang i kamta thui ai nai ARENG my kai ai leu pei nai ne.

²Ngamhm ly khrangsinu atawm khyp! Ni ly chengthli nai khrangsi kataichi theung y mymy i chochi ai len pa-rei pacho iy kry bo.

³Amso mawichi kei kawp thai ai nai patiu pi nai deaungkho y, khrangsi cho ly len ryh i, khumi ngan cha nai khrangsi lawm bo.

⁴Khumi cheng cheaungkhangchi ly ni i satang thai nai khala, hum tai i patiu chum baly nodo tai iy, Aikupta pri mang y pahawi jo bo.

⁵Khrangsinu ly my i athang khai naira by y veng bo, nanai pany nai khala, takhra khrangsi cho harei ai len pa-rei pacho bi bo. Huni khrangsi cho py ka-jei awm nai khrangsi lawm teang.

⁶Ni ly tleaungri acheang iy atho awm nai khala, takhra khrangsichi hawi vanrei teicha hau ai nai amki naimy, amso mawi kei kawp ai nai amtiu iy, khumi ngan cha nai khrangsi lawm teang.

⁷Ni ly amtangrachi panawi iy marychi taphra bo. Ni my hang nai tleirei y khumi mipuichi ly jei hyn naimy kaso theu u nai ne.

⁸Huna nai khala y ni i tengpang sahawi meingtym tleirei i, khumi cheng cheaungkhangchi ly ni ai tiu ai nai akachu u. Ni ai pypui hawi patym iy hum angawm theung y patiu u bo.

⁹Naibaly ni ai tamo leangkhawn hawi ryh iy paeungra theung y khai i, Babulon samrang teng y syn u bo. Israela mawichi salo y ni i hang nai katyn ly vai mo mang y mana khala py thai bi y ai nai tamcheaung khai iy theaung y paeung bo.

¹⁰Ngamhm ly tavo micheaung sahawi y ui nai kreip keung hawi atawm. Tui bym pa-rei nga nai deaungkho y huni keung ly ngam hawi athaichi pasu nai ne.

¹¹Changpichi ly tangkhryh nai deaungkho y areng cheaungvawi palawn ai nai nga. Kreip keung ly khupanym y khrairei lo bo. Huni keung i asang nai ly ngam changpichi veng-u nanai ai, khumichi my niu nai ne.

¹²Na i py huni kreip keung ly kado theu nai khumichi my tangjyn akheaung na pa-rei akyn vui i, khaileaung y atlym vui bo. Nisi ali deaungkho y kreip athaichi jei pawn bo. Kreip changpichi py dei i, mai y kang nai avum bo.

¹³Vai ly huni keung ai jengha iy tui by y nai daichi ka-vymra y ui bo.

¹⁴Huni keung i keungma y mai my kang nai deaungkho y, changpi hawi athaichi py kang teang. Huni keung i changpichi ly mana khala py tangkhryh teang y leang bo. Mana khala py areng cheaungvawi lawm ai ny y leang bo. Hini ly vo tangam nai khulym ne; huni vo tangam nai khulym ai avaw avawrei thui u ai nai tla.