Read Khumi Chin Ezekiela 20 Bible Online

Ezekiela 20 - Khumi Chin bible

Ezekiela 20

¹Pri palara avum nai saryh saneng, pa-ngo lo, lo si kani horei kani y Israela lu sa nai keung phyreichi ly ARENG i kangai deng ai nai kai teng y tym u. Huni khumichi kai i mo y ateh u nai khala,

²ARENG i leu ai kai ly thai bo.

³Mymy ly “Nang khumicho awi, nang ly nichi ai, ‘Nangchi ly sa thai naira angym nai kai ARENG i kangai deng ai nai jeu u nai a? Kai ly Tameuh kangheng ne nai deaungkho y, nangchi i deng nai ngiereichi kang pathang pi ai ny y. Huni ly sa thai naira angym nai kai, ARENG i leu ne,’ nanai leu pei nai amti pi.

⁴“Nang khumicho awi, nang ly nichi ai cham ai nai angveirym bo a? Angveirym baly cham cham. Nichi teng y mymychi amsi pajochi i amso ngai naira sa nai saichi pany hai pi.

⁵ Kai ARENG my ati mana leu pei mo, nanai py thui pi. Israela chengchi ai kaimy vawi takhra iy, Jakob i nupaichi theung y kaimy leu adeu pi bo. Kai ly Aikupta pri y nichi teng amteng iy, kai ly nichi i ARENG Tameuh ne, nanai adeu pi bo.

⁶Nichi ai Aikupta pri i nai pahawi iy, nichi i vui khai pi yb nai pri y pahawi ai, nanai kaimy adeu pi nai ly huni neng khala ne. Huni pri ly kanutui hawi khawi hang leaung iy nang nai pri, apu parai nai pri ne.

⁷Kai ly nichi i ARENG Tameuh ne nai deaungkho y, mychi i ngai nai amso ngai nai mynchi khai u su ai nai hawi, Aikupta pri tameuh ka-chawichi ai chiu nai molam y, amymychi ai chai hai y nai awm y ai nai nichi ai thui pi.

⁸Na i py nichi ly kai ai amtang lawh iy kai i leu tangai y naimy awm u bo. Nichi ly mymychi i ngai nai amso ngai hawi nai mynchi hawi, Aikupta tameuhchi ai khai su y. Kai ly nichi ai Aikupta pri y kai i kado theu nai ly nichi i tlang tleaung y tym hai iy pajeng naira angym pa-rei avum hai ai nai dawn pi yb bo.

⁹Na i py kai i amyn y nichi hawi vanrei awm u nai prichi teng y tahm anem y ai nai, huna nai kaso pi vai y. Ati mana nai mo na baly Israela chengchi ai Aikupta pri i dengdairei kapahawi ai nanai, nichi hawi vanrei awm u nai cheng takhrachi i mo y, kai ly adeu pi nai deaungkho y ne.

¹⁰“Hunaibaly kai ly nichi ai Aikupta pri i dengdairei daichi ka-vym mang y pahawi bo.

¹¹ Kai i leu pei naichi tangai hai iy kai i Reitachi patiu pi. Hunichi ai sa patawm nai khumichi ly heng ai.

¹² Nichi ai chai hai nai keung ly kai ARENG ne, nanai pany hai ai ngai nai deaungkho y, kai hawi nichi ka-dyh ka-dawi sa nai ka-ma-ra ly Anawn kani y anawn u ai nai kaimy khai pi yb bo.

¹³Na i py nichi ly daichi ka-vym y my kai ai amtang u nai ne. Kai i leu pei nai tangai nai ngiereichi ly heng u ai napi i py, nichi ly kai i Reita taphra iy kai i leu pei naichi py khai u su bo. Anawn kani py pipi tahm khai u y. Hunai deaungkho y kai ly nichi ai daichi ka-vym y, kai i kado katheu pajeng naira avum hai iy tamyh pawn ai nai adawn vai nai ne.

¹⁴Na i py huna nai tamyh pawn lawh baly, pri cheaungkhangchi i mo y kai i amyn phra ai. Ati mana nai mo na baly nichi ai Aikupta pri i dengdairei kaimy pahawi nai ly khumi cheng cheaungkhangchi my niu nai deaungkho y ne.

¹⁵ Hunai deaungkho y apu parai nai pri, kanutui khawi hang leaung nai pri napi nai, kaimy pei nai pri y nichi ai kapahawi y leang bo, nanai kai ly daichi ka-vym y vaineng abeu bo.

¹⁶Huna nai vaineng ka-beu nai ly nichi ly mymychi i myn chiu ai nai ngai u keh i, kai i leu pei naichi khai su iy kai i Reita ai py taphra; Anawn kani ai py tahm khai u y nai deaungkho y ne.

¹⁷“Na i py kai ly nichi ai pahen i, daichi ka-vym y tama hai ai nai kaso y.

¹⁸Daichi ka-vym theung i nai nichi i cho chanauchi teng y, ‘Nangchi i amsi pajochi i sa nai reitachi teaung u moh; nichi i reita tanynchi py patawm u moh. Nichi i mynchi ai chiu nai hawimy chai hai y nai so u moh.

¹⁹Kai ly nangchi i ARENG Tameuh ne. Kai i Reitachi patawm iy kai i leu pei naichi tangai u.

²⁰Kai hawi nangchi asa nai Leu Maikawm ka-ma-ra lawm hai ai nai hawi, kai ly nangchi i ARENG Tameuh ne, nanai ai py, nangchi pany jo ai nai Anawn kani ai chai hai u,’ nanai kang pany hai bo.

²¹“Na i py huni khumi kangpreangchi py kai ai amtang u nai ne. Kai i leu pei nai tangai nai ngireichi ly heng u ai napi i py, nichi ly kai i Reita taphra iy kai i leu pei naichi py khai u su bo. Anawn kani py pipi tahm khai u y. Nichi ai daichi ka-vym y dei hai ai nai, kai ly kaimy i kado theu naira nichi i tlang tleaung y tym hai iy, pajeng naira avum hai ai, nanai kadawn bo.

²²Na i py avum hai y; huna nai avum hai lawh baly Israela chengchi ai Aikupta pri i dengdairei kapahawi nai ai niu nai khumichi i mo y, kai i amyn phra ai nai deaungkho y ne.

²³ Hunai deaungkho y kai ly nichi ai khaileaung pri meingtym tleirei y ahei hai ai, nanai daichi ka-vymra y vaineng ka-beu bo.

²⁴Huna nai kasa nai ly nichi kai i leu pei naichi khai su iy, kai i Reita py taphra; Anawn kani ai tahm khai y iy amsi pajochi chiu nai mynchi chiu lawh nai deaungkho y ne.

²⁵“Naibaly kai ly amlau y nai reitachi hawi, hengra pei pajau y nai leuchi kapei pi.

²⁶Nichi ly mymychi i chapo chanauchi ai apathyp nai hawimy, mymychi ai chai hai y ai nai sa thai naira kapei pi. Huna nai sa thai naira kapei pi nai ly kai ly ARENG ne, nanai patei ai nai hawi, nichi ai pajeng ai nai ne.

²⁷“Naibaly nang khumi chapo awi, sa thai naira angym nai kai, ARENG my ati mana leu pei mo, nanai vaimy thui pi. Nichi i amsi pajochi ly ka-ym by y nai deaungkho y, kai ai mei aniu y nai sa nai ly hini ne.

²⁸Kai ly nichi teng y pei ai nai vaineng adeu nai pri y kapahawi bo. Nichi ly mawi ka-sangchi hawi heng-up nai dengkeaung keungchi ai niu nai khala, huni meingtymchira y apathyp u nai ne. Mui katuichi leng patlum nai kapathypra hawi, kreip hang kapathyprachi talam u bo. Huna nai leaungsaichi hawi kai ai kado patheu u nai ne.

²⁹Kai ly nichi teng y, ‘Nangchi chei u nai mawi aheungchi ly ati mo?,’ nanai deng. Hunai deaungkho y huni meingtymchi ly vaini khrairei, ‘Asang nai meingtymchi,’ [5]napi nai bamah amyn pathi nai ne.

³⁰Israela chengchi teng y kai i leu pei nai amti pi; nangchi ly ati mana nai y amsi pajochi sa tamang iy chai hai y nai kamta, nangmychi ai chai hai u y lawh; nichi i chiu nai chai y nai mynchi ai chiu u lawh mo?

³¹Nangchi ly vaini khrairei nichi i talam nai kapathyprachi talam naimy, mynchi teng y mymychi i cho chanauchi ai leang patlum nai kapathypra talam iy, amymy ai chai hai y bo. Nangchi Israela chengchi awi, nangchi ly kai teng y jeu iy kai i kangai deng u bo. Kai ly heng nai ARENG Tameuh ne nai deaungkho y, mana mo i py nangchi ai leu deng ai nai kang pei y.

³²Nangchi ly pri takhrachi kamta py, pri takhra y awm u nai khumichi kamta py, dengkeaung keungchi, lengseaungchi ai chiu u ai, nanai dawn tau u bo. Na i py huni katau ly amcheang ai ny y.

³³Sa thai naira angym nai kai, ARENG ly Tameuh kangheng ne; kai ly kado theu naimy atho len parai nai sa thai naira hawi kiu pheu iy, nangchi ai kang peang ai.

³⁴Nangchi ai pri tlei tleirei hawi, ahei akyhkyh nai pri cheaungkhangra i nai palau ali teang nai neng khala, nangchi i tlang tleaung y atho len parai nai sa thai naira hawi kiu pheu iy, kado theu nai sai patei ai.

³⁵Khumi cheng cheaungkhangchi hawi amtawn abi nai daichi ka-vym theung y hawi iy, nangchi ai kaimy pajeng ai.

³⁶Aikupta pri daichi ka-vym y nangchi i amsi pajochi ai kaimy pajeng nai kamta, vai nangchi ai py kang pajeng ai,” nanai sa thai naira angym nai ARENG my leu pei bo.

³⁷“Kai ly nangchi ai hawihai palai kang kry iy Leu Maikawm asa nai kamta patawm hai ai.

³⁸Nangchi theung i tiu nai khumichi hawi kamngo awm nai khumichi ai nawi su ai. Nichi ai mymychi vai awm nai pri i nai theu hai pawn ai. Na i py Israela pri y vawi ali teang ai nai pei ai ny y. Huna nai khala kai ly ARENG ne, nanai nangchi pany u ai,” napi.

³⁹Sa thai naira angym nai ARENG my, “Nangchi Israela cheng bawibawichi awi, vai nangchi ly leaungrei py takhawi y pa-rei nangmychi teng y awm nai mynchi teng y chei iy chiu u! Na i py vai i dengdairei nangchi ly kai i leu tangai u ai nai tla. Mynchi teng y kapathyprachi talam nai molam y, kai i chai parai nai amyn ai vai mo mang y thui tamawn bi moh.

⁴⁰Kai i mawi kachai[6]napi nai Israela mawi ka-sang salo y, nangchi bawibawi ly kai ai chiu u ai, nanai kaimy leu pei nai ne. Kai ly nangchi ai kawn ai. Nangchi i talam nai tawnbawichi, hawi keh nai katalamrachi hawi khai takhra nai katalamra kachaichi kang hnei ai.

⁴¹Nangchi ai ahei akyhkyh nai prichira i dengdairei, kaimy nangchi ai pangym ali teang nai bo y, nangchi leng patlum nai mui katui hawi vanrei nangchi ai kang kawn pi ai. Kai ly chai parai nai ne, nanai khumi cheng cheaungkhangchi my niu u ai.

⁴²Nangchi i amsi pajochi teng y kaimy pei ai adeu nai Israela pri mang y nangchi ai kang pahawi nai khala, kai ly ARENG ne, nanai nangchi pany u ai.

⁴³Huna nai khala y nangchi ly nangmychi i sa nai amso ngai nairachi molam y, amymy ai apaso iy nangmychi ai mana tanrei chai y na mo, nanai adawn vau ai. Huna nai khala y nangmy ai nangmy apaso ai.

⁴⁴Aw Israela chengchi awi, kai ly kaimy i amyn saho y kaimy i tahm awm jo ai nai molam, nangchi i khumi aso y nai y, nangchi ai kang pajeng y nai khala, kai ly ARENG ne, nanai nangchi pany u ai,” napi. Hini ly sa thai naira angym nai ARENG i leu pei nai ne.

⁴⁵ARENG i leu ly kai teng y tym.

⁴⁶Mymy ly “Nang khumicho awi, tokalawi ngan mang y khen angdeang iy, huni meingtym hawi huni meingtym y awm nai dengkeaung thengreung teng y leu pei nai thui pi.

⁴⁷Tokalawi ngan mang i dengkeaung thengreung teng y sa thai naira angym nai ARENG my leu pei nai ly khen angdeang cham! Kai ly mai paeng bo. Huni mai ly nang i dengkeaung kadei ngierei hawi, dengkeaung kangheng ngiereichi ai kang hai ai. Huni mai kangveaung ai mani my py pathym pajau ai ny y. Huni mai ly tokalawi mang i dengdai tosyh mang y khrairei, khaileaung verei kang hai ai.

⁴⁸Huni mai ai kai ARENG my paeng nai ne nanai py, huni mai ai ami my py pathym pajau ai ny y nanai py, khumi bawibawichi my pany u ai,” nanai thui pi, napi.

⁴⁹Kaimy, “Aw sa thai naira angym nai ARENG, hini leu ly kai ai thui hai moh kyh! Kai ly pypraw thai y nai leu thui nai teu, nanai khumi bawibawichi my ang thui u bo,” napi.