Read Khumi Chin Ezekiela 21 Bible Online

Ezekiela 21 - Khumi Chin bible

Ezekiela 21

¹ARENG i leu ly kai teng y tym.

²Mymy ly “Nang khumicho awi, Jerusalem mary mang y hi iy, huni mary ai thui tamawn ba. Khumichi i chiu nai meingtymchi ai py thui tamawn ba. Israela pri y pany hai pi ba.

³Khumichi teng y kai, ARENG ly nangchi i paleung ka-e ne, nanai py, kaimy i haisau aphiu iy nangchi bawibawi ai khumi hawi nai, hawi y nai py patleh y naimy, tamyh pawn ai nanai py,

⁴Tokalawi mang dengdai tosyh mang y khrairei, awm nai khumi bawibawichi ai haisau hawi tleh ai nanai py,

⁵kai, ARENG ly kaimy i haisau ai haisau keura i nai aphiu bo nanai py, huni haisau ai keu theung y hawn ali teang ai ny y nanai py, khumi bawibawichi my pany u ai.

⁶“Nang khumicho awi, nang ly paleung si, paleung phra nai khumi ka-tawm tangam. Khumi ka-niu y khri pa-rei vo tangam ba.

⁷Nang ly ati mana nai y tangam nai mo, nanai khumichi my angdeang nai khala, nang i thai nai satangchi molam y tangam nai ne, nanai thui pi. Huna naichi tym nai khala, khumichi ly paleung kaso theu iy mynkym u na ai. Nichi i kiuchi ly nemthlo iy kheukhuchi py ahyn thlyhthlyh ai. Huna naichi tym ai nai neng tym bo, vaimy tym ryp bo,” napi. Hini ly sa thai naira angym nai ARENG i thui nai leu ne.

⁸ARENG i leu ly kai teng y tym;

⁹mymy ly “Nang khumicho awi, amo leu thui pi. Kai, Areng my ati mana leu pei mo, nanai khumichi teng y thui pi ai nai ly: haisau chiu pa-rei kata theih bo, haisau sadi na pa-rei kachi pyn na bo.

¹⁰Tleh ai nai haisau ai chiu pa-rei kata theih na bo, amlo sadi kamta sadi ai nai kachi pyn bo. Kai i khumi Juda my peang nai areng cheaungvawi molam y, amo theu pajau ai ny y; huni areng cheaungvawi ly haisau hawi pajeng naira avum ai.

¹¹Teaung praw thai ai nai huni haisau ai ly kachi pyn yb bo. Khumi ai padei nai keung i kiu y au ai nai huni haisau ai ly chiu pa-rei kata chum baly sadi na pa-rei kachi pyn nai ne.

¹²Nang khumicho awi, paleung si nai y vo naimy hang na ba; hini haisau ly kai i khumichi hawi Israela chengchi ai lu sa nai keungchi i vui ne. Nichi ly awm asai rai nai kai i khumichi theung y abawi naichi hawi vanrei padei ai nai tla ai. Paleung phra nai y nangmy i paleung y atum ba!

¹³Kai ly haisau hawi pajeng naira avum ai nai Juda i areng cheaungvawi phra nai neng khen paryp nai ne, nanai ARENG my leu pei bo.

¹⁴“Nang khumicho awi, vai kai i thui nai leu amti pi. Kiu tabeang ba; huna nai khala haisau hawi avawrei lilei ba. Huni haisau ly khumi tleh nai haisau, pahyp y naimy khumi tleh nai haisau ne. Nichi ai cheaungkhangra mang katanmeuh iy tleh ai.

¹⁵Huni ly kai i khumichi ai paleung kaso theu hai iy, atlym khikha hai nai ne. Amlo sadi kamta sadi iy tleh ai khai yb nai haisau hawi, kai ly nichi i mary apai katheuchira y tleh ai nai huni haisau khai ai.

¹⁶Aw chiu parai nai haisau awi, langvawi lamtang tleh ba! Amhi naira tleirei tleh ba.

¹⁷Kai py kiu tabeang ai; naibaly kai i kado theu nai rym ai. Hini ly kai ARENG i pei nai leu ne,” napi.

¹⁸ARENG i leu ly kai teng y tym.

¹⁹Mymy ly “Nang khumicho awi, Babulon samrang ly tiu ai nai haisau pa iy ang jeu pajau nai lam nyhrei ma kheng ba. Huni lam nyhrei ly pri harei mang dengdai amteaung ai. Huni mary mang y chei nai lam kamprei sangumra y ka-ma-ra teangchi leng ba.

²⁰Taphra nai haisau tym ai nai ka-ma-ra harei ly Ammon pri Rabah mary mang y lam patei ai i, takhra ka-ma-ra harei ly Juda pri khaw parai nai Jerusalem mary mang y lam patei ai.

²¹Babulon samrang ly lam sangumra tym nai khala angdo i, mani lam ly ma mang y chei ai nai mo, nanai pany thai ai nai thaicheng tambe va bo; my i mynchi teng y deng, tawnbawi pathym py khen.

²²Huna nai khala, ‘Jerusalem,’ nanai tajiu nai ka-ma-ra thaicheng ly ni i lamtang kiu y tym bo. Huni thaicheng ly ni teng y mary apai taphra ai nai dengkeaung beangpuichi tai iy tiu ai nai leu pei nai tavai kachyh nai katyn aeu ai nai py, katheu taphra ai nai dengkeaung beangpui ai py, abyhra khaileaungchi taphum nai hawi abyhra amkeuchi tai ai nai py thaicheng my patei ai.

²³Jerusalem mary i khumichi ly Babulon samrang hawi tavai atiu y ai nai leu sumneang awm nai deaungkho y, hina nai thui rym nai ai ly ym u ai ny y. Na i py nichi ai mymychi i kamngo sa naichi adawn hai vau iy mymychi ai apatiu hai ai.

²⁴Huna nai y sa thai naira angym nai kai, ARENG my leu pei nai ly nangmychi tiu nai molam y nangmychi i kamngo pany hai vau bo. Nangmychi i amhi amtlau nai ngierei my, nangmychi i kamngo amteng hai bo. Nangchi hina nai sa nai deaungkho y kai ly nangchi ai, nangmychi i paleung ka-echi teng y au ai.

²⁵“Nang khumi aso y nai Israela samrang awi, nang i khym taham tla ai nai neng kani, nang ai kangkhym kangtem pajeng ai nai neng kani ly tym bo.

²⁶Hini ly sa thai naira angym nai kai, ARENG i thui nai leu ne. Nang i samrang lukym hawi lupeu aleng vui jau; awm nai sai bawibawi ly alie veng bo. Khumi kamawnchi teng y sa thai naira pei iy, sa thai naira awm nai khumichi ai tahm anem hai ai!

²⁷Kai ly Jerusalem mary phra seaungkhrang hai ai, phra seaungkhrang hai ai. Phra seaungkhrang hai ai. Na i py huni mary ai peang nai yhmkeung tym y nai ryrei ly huni mary ai palum teang ai ny y; huni khumi teng y kaimy au ai.

²⁸ “Nang khumicho awi, kai i leu amti pi; Israela chengchi ai mei aniu y nai Ammon pri khumichi teng y sa thai naira angym nai kai, ARENG my ati mana leu pei mo, nanai thai hai ba. Thuipi ai nai ly: ‘Tamyh vui ai nai haisau khai rym bo, haisau ly khai rym bo; tleh ai nai huni haisau ai kachi pyn bo; amlo sadi kamta sadi na pa-rei kachi pyn bo,’ nanai nichi teng y thui pi.

²⁹Nangchi i paleung mei y niu naichi ly niu angchi khyp nai ny y i, nangchi teng y thui pi yb naichi py ka-chawi cheichei teu. Nangchi ai pajeng angchi khyp ai nai neng kani ly kasa bo. Haisau ly khumi aso y nai i kaneaung y kala ai nai ang tym ai bo.

³⁰“‘Nang i haisau ai haisau keu theung y hawn teang! Nang ai sa nai meingtym hawi, nang ai tapen nai pri y kai ly nang ai tara kangchih ai.

³¹Kai ly mai kangveaung kamta kai i kado theu naira ly nang i tlang tleaung y kang tym hai ai. Nang i tlang tleaung y pahyp y naimy ana nai keung, kataphra kawp nai khumichi teng y kang au ai.

³²Nang ly mai teicha lawm ai. Nang i thi ly nangmy i pri y beu ai; nang ai ami py pany ali bi ai ny y,’ ” napi. Hini ly kai, ARENG i thui nai leu ne.