Read Khumi Chin Ezekiela 22 Bible Online

Ezekiela 22 - Khumi Chin bible

Ezekiela 22

¹ARENG i leu ly kai teng y tym.

²Mymy ly “Nang khumicho awi, nang ly khumi ai padei nai keungchi kawi nanai mary ai tara chih ai nai angveirym bo a? Huni mary ai my i sa nai amso ngai naira bawibawichi patei pi.

³Sa thai naira angym nai kai, ARENG ly huni mary molam y ati mana leu pei mo, nanai hina nai thui pi; Nang ly nangmy i khumi neangneangchi ai padei; mynchi ai chiu nai molam y nangmy ai chai hai y nai deaungkho y, nang i neng kani ly ang tym dudu bo.

⁴Nang ly huni khumichi ai padei nai molam y kamngo awm nai khyh ny y, nangmy i sa nai mynchi molam y py, nangmy ai chai hai y nai deaungkho y, nang i neng kani ly ang tym bo. Nang i sanengchi khei ai nai neng tym bo! Huna nai y kai ly nang ai khumi cheng cheaungkhangchi i amnui tabu lawm hai iy, pri tlei tleirei my panui hai naira lawm hai ai.

⁵Kamlo kang sa i prichi my, nang ly reita ai pipi dawn y iy amyn phra nai molam y panui hai bo.

⁶Nang teng y awm nai Israela cheng lu sa nai khumi bawibawichi ly mymychi i atho a-ym iy khumichi ai padei u nai ne.

⁷ Nang teng y awm nai mary theung i amimi py, amhm ampo ai tahm khai nai by y. Nang teng y awm nai cheng takhra khumichi ai nang ly li-tapawp iy, neampachy lumaichi hawi nurochochi ai ana bo.

⁸ Meingtym kachaichi ai tahm khai y iy Anawn kani py ja vai y.

⁹Nang theung i phyrei khumichi ly ka-jo pakei iy, khumi takhrachi ai padei ai nai tau u nai ne. Nang theung i phyrei khumichi ly mawi salo chiu nai meingtymra i mynchi teng y apathyp nai mawi cha u. Phyrei khumichi ly kamleaung sa naira y amo theu u nai ne.

¹⁰ Nang theung i phyrei khumichi ly amhmto hawi tamang u. Nang theung i phyrei khumichi ly neampachychi tlangchai awm nai neng khala, i u akhikan nai ne.

¹¹Nang theung i phyrei khumichi ly ami i aju chanau ai taphra iy phyrei ly mymychi i lengngo ai py, ampo vanrei amhm takhra nai tuicho lengsangchi ai py parawi iy tamang u bo.

¹² Nang theung i nang i khumi phyreichi ly un cha iy, khumi ai padei nai keungchi lawm u bo. Phyrei khumichi ly mymychi Israela chengchi teng y tangka paseng i, kamran la iy mymychi ai nang hai u. Nichi ly kai ai tami u veng bo,” napi. Hini ly sa thai naira angym nai ARENG i leu ne.

¹³“Kai ly nang i lawm nai hawi tleh naichi molam y, kiu makeng nyhrei atabeng nai ne.

¹⁴Nang ai kaimy pajeng chum baly, nang ly sorai paleung awm rai na a? Nang i kiu pheu ai nai atho awm rai na a? Kai, ARENG my leu pei nai ne; kai ly kaimy i leu pei nai kamta kasa khyp ai.

¹⁵Kai ly nang i khumichi ai pri tleirei hawi, khumi cheng cheaungkhangchi theung y ahei hai iy, nang i hawi y sa naichi anawn hai ai.

¹⁶Huna nai y nang ly cheng takhrachi i mo y thui tamawn naira avum ai. Na i py kai ly ARENG ne, nanai nang pany ai,” napi.

¹⁷ARENG i leu ly kai teng y tym.

¹⁸Mymy ly “Nang khumicho awi, Israela chengchi ly kaimy teaung ai nai ngo y. Nichi ly tamo ngan patlawn nai paheungra y tangka patlawn nai bo y awm nai kheupaja, sawn ngan, tamo, kima, hunichi abawi nai, teaung ai ngo y nai hawi atawm.

¹⁹Hunai deaungkho y nichi ly huni tamo ei kamta teaung ai ngo y nai khumichi lawm be bo, nanai sa thai naira angym nai kai, ARENG my leu pei nai ne.

²⁰Tangka, kheupaja, tamo, kima hawi sawn nganchi abawi nai tamo ngan ai paheung y thun achu nai kamta, kai ly huni khumi bawibawichi ai Jerusalem mary y pakheng achu ai. Mai ly tamo kangheng ai tlawn hai nai kamta, kai i kado theu nai ly nichi ai tlawn hai ai.

²¹Kai ly meitang khyp, Jerusalem mary y pakheng achu iy nichi i anui mang mai pareaung hai naimy, kai i kado theu nai ly nichi ai tlawn hai ai.

²²Tangka ly paheungra y tlawn nai kamta, nichi ly Jerusalem mary y tlawn u ai. Huna nai khala mymychi ly ARENG i kado theu naira avum u bo, nanai nichi apany u ai,” napi.

²³ARENG i leu pei nai ly kai teng tym bi bo.

²⁴Mymy ly “Nang khumi cho awi, Israela pri ly kado theu naira tym nai kani y kanitui ngo y, kani nai y naimy awm ai, nanai huni pri y thui pi.

²⁵Nichi i lu sa naichi theung y amkawm paviu naichi awm. Nichi ly amso mawichi ai kei nai bo y hang nai khrangsichi hawi atawm. Nichi ly khumichi ai padei iy nga thai nai ngierei tangka hawi vawnsaichi la u nai ne. Huna nai padei nai deaungkho y neampachy neangneangchi ai lumai lawm hai bo.

²⁶ Pathyp pi nai keungchi py kai i reita taphra iy, kachai sa nai ai py tahm khai u y bo. Nichi ly chai parai naira hawi chai y naira ai py khai takhra nai by y. Nichi ly chai nai hawi chai y nai takhra nai sai py patiu pi y. Anawn kani ai py dawndan u y. Hunai deaungkho y Israela chengchi ly kai ai tahm khai u y nai ne.

²⁷Achora miteaung kehchi ly amso mawichi ai kei piupa nai kasuichi hawi atawm. Nichi ly mymychi nang chawn ai nai molam y khumi ai padei u nai ne.

²⁸Amochi ly lengseaung apaira y theung kangleung pajui nai khumichi kamta, huni kamngochi apha hai u bo. Nichi ly paleung mei y niu naira teng y naichi ai niu iy teng y nai leuchi thui pi pateang bo. Nichi my mymychi ly sa thai naira angym nai ARENG i leu kathui u nai ne, na u teu i py, huni leuchi ly khumichi teng y kathui pi vai y.

²⁹Huni meingtym y awm nai khumichi ly kamjau kamteang sa iy lawm u. Nichi ly khumi kamawnchi ai ana iy, cheng takhrachi ai kamjau kamteang ana u nai ne.

³⁰Kai ly kaimy i khumichi awm nai pri y kado theu nai hawimy taphra ai nai tau nai khala, huni pri y lengseaung apai tapang pajau nai keung hawi, mary apai sa naira y angdo iy amtang pajau nai keung ai kahau cham bo. Na i py leaungrei ai py avum y.

³¹Hunai deaungkho y kai ly kado theu naira tym hai iy nichi i tlang tleaung y kado katheu mai kangveaung kamta tym hai ai. Nichi i sa nai saichi molam y nichi i lu tleaung y tym hai ai,” napi. Hini ly sa thai naira angym nai ARENG i pei nai leu ne.