Read Khumi Chin Ezekiela 25 Bible Online

Ezekiela 25 - Khumi Chin bible

Ezekiela 25

¹ ARENG i leu ly kai teng y tym.

²Mymy ly “Nang khumicho awi, Ammon pri mang y hi iy amo leu katheu naimy thui tamawn ba.

³Huni pri i khumichi teng y, sa thai naira angym nai kai, ARENG i leu pei nai tangai u; mymy ly hina nai leu pei bo. Nangchi ly kai i Achura yhm chai y vui nai py, Israela pri phra seaungkhrang vui nai, Juda chengchi pri pala naira avum nai niu nai khala amo theu u bo.

⁴Huna nai nangchi amo theu nai molam y kai ly nisi mang i nupaichi teng y nangchi ai tiu hai ai. Nichi ly nangchi i pri y awmra taichi sa iy khuteng cha u ai. Nangchi i cha nai thengthaichi cha iy nangchi nei nai kanu py nei u ai.

⁵Rabah mary ai kula-iu hai, Ammon pri verei y beramchi sui tlaira lawm hai ai. Hunaibaly kai ly ARENG ne, nanai nangchi pany u ai.

⁶“Sa thai naira angym nai ARENG my leu pei nai ly: nangchi ly kiu tabeang iy amo theu nai sarai u. Israela pri ai paso u nai ne.

⁷Ati mana nai mo na baly kai i kiu pheu iy nangchi ai tiu ai nai khumi takhrachi i kiu y kaimy pei ai. Kai ly nangchi ai tamyh pyn ai nai pa-rei kasa ai i, nangchi ly nangmychi i saleaung y awm ai nai nga u ai ny y. Khumi cheng harei kamta py angdo u pajau ai ny y. Huna nai khala kai ly ARENG ne, nanai nangchi pany u ai,” napi.

⁸ Sa thai naira angym nai ARENG my, “Juda chengchi ly cheng takhrachi hawi atawm, nanai Moba pri hawi Sera mary i khumichi my thui u nai deaungkho y,

⁹kai ly huni pri i apu parai nai Beth Jeshimoth mary, Bala Meon mary, Kiriatham marychi raurei, khujyhra i amtangra marychi py paleung ka-echi ai tiu hai ai.

¹⁰Kai ly Moba pri ai Ammon pri hawi vanrei, nisi mang i khumi chengchi teng y pei kym vui ai. Huna nai y Moba pri ly pri harei kamta angdo pajau ai ny y leang bo.

¹¹Moba pri khumichi ai kaimy pajeng ai. Kai ly ARENG ne, nanai nichi pany u ai,” napi.

¹² Sa thai naira angym nai ARENG my, “Edom pri ly Juda pri ai pahyp y na pa-rei vawitheung tha nai molam y, khri pa-rei kamngo sa bo.

¹³Huna nai y sa thai naira angym nai ARENG my, “Kai ly Edom pri ai kapajeng iy khumi hawi tawnbawi awm nai ngiereichi padei pawn ai, nanai thai hai nai ne. Kai ly Teman mary dengdai Dedan mary y khrairei, khumi angso savai tlang nai meingtym lawh hai ai. Khumichi py tavai keung y dei u ai.

¹⁴Kai i khumi Israela chengchi ly kai i jeng y, Edom pri khumichi ai vawitheung tha naimy kai i khri pa-rei kado theu naira avum hai ai. Kai i vawitheung tha nai sai Edom pri khumichi pany u ai,” napi. Hini ly sa thai naira angym nai ARENG i leu pei nai ne.

¹⁵ Sa thai naira angym nai ARENG my, “Philistin pri khumichi ly mymychi deungrei paleung ka-e khai nai Judachi ai pahyp y naimy vawitheung tha iy, niu ngai y nai paleung hawi tamyh u bo.

¹⁶Huna nai y ARENG my, kai ly kiu pheu naimy Philistin pri khumichi ai tiu iy, Philistin adym y awm nai Kherasi khumichi ai nyn va vui ai, nanai thai hai ba. Pangli peang y awm rai nai mary ai py, kaimy taphra pawn ai.

¹⁷Nichi ai khri pa-rei pajeng iy hawihai palai vawitheung katha ai. Huna nai khala kai ly ARENG ne, nanai nichi pany u ai,” napi.