Read Khumi Chin Ezekiela 29 Bible Online

Ezekiela 29 - Khumi Chin bible

Ezekiela 29

¹ Achi pri pala naira avum nai saneng horei, lo horei, lo si kani holai nyhrei kani y ARENG i leu ly kai teng y tym bo.

²Mymy ly “Nang khumicho awi, Aikupta samrang ai thui tamawn ba. Mymy hawi vanrei Aikupta pri verei pajeng naira avum ai, nanai amti pi.

³Sa thai naira angym nai ARENG my ati mana leu pei mo, nanai Aikupta samrang Pharao teng y amti pi ai nai ly: tavo theung i atho len parai nai satam pui awi, kai ly nang i paleung ka-e ne. Naing tavo ai ly nangmy peang, huni tavo ai nangmy palum nai ne, nanai nang ly thui bo.

⁴Kai ly nang i kajai y tamo leangkhawn hawi vawn iy, nang i tavo theung i ngochi ai nang i tlangra y akau hai ai.

⁵Naibaly huna nai akau mang nai ngochi hawi vanrei, nang ai Naing tavo theung i nai ryh piu iy, daichi ka-vym y aphi su ai. Nang i veu ly khaileaung y tla ai, up ai ny y. Tavochi hawi mawichi i teicha lawm hai ai.

⁶ Huna nai khala kai ly ARENG ne, nanai Aikupta pri khumichi my pany u ai,” napi. ARENG my, “Nang ly Israela chengchi i vui japang uipo keung teu.

⁷Nichi ly nang i tlang tleaung y kho sa nai khala, nang ly tleu iy nichi i takajachi ai viu krai i, akengchira py tamo nga hai bo.

⁸Huna nai y vai, sa thai naira angym nai kai, ARENG my leu kang pei nai ly kai ly haisau pa nai khumichi ai, nang ai tiu ai nai pato ai. Nichi ly nang i khumichi hawi tawnbawichi ai tleh pawn ai.

⁹Aikupta pri ly khumi angso savai tlang nai meingtym lawm ai. Huna nai khala kai ly ARENG ne, nanai nichi pany u ai. “Naing tavo ly nangmy i peang nai, nangmy i palum nai ne, nanai thui nai deaungkho y,

¹⁰kai ly nang i paleung ka-e, Naing tavo i paleung ka-e py ne. Tosyh mang i Mikadol mary i ka-so, tokalawi mang Asavan mary y khrairei, Sudan khujyh ryrei, Aikupta pri verei y khumi angso savai tlang nai meingtym lawm hai ai.

¹¹Mani khumi hawi mani tawnbawichi py, huni pri y aleaung ali ai ny y. Saneng vui palyh ryrei huni pri y khumi awm ai ny y.

¹²Kai ly Aikupta pri ai khaileaung pri y khumi angso savai tlang keh nai pri lawm hai ai. Saneng vui palyh sala ryrei, Aikupta pri i marychi ly takhra marychi hawi atawm y na pa-rei, kangtlen chyn phra hai seaungkhrang ai. Kai ly Aikupta khumichi ai patang nai khumichi lawm hai ai. Nichi ly pri tleirei y preang iy, cheng takhra khumichi theung y awm u ai,” napi.

¹³Sa thai naira angym nai ARENG my, “Saneng vui palyhrei bo y Aikupta khumichi ai kaimy ahei hai nai meingtymra i nai kapalau ali teang iy,

¹⁴nichi i saleaung khuteng Aikupta pri tokalawi mang y awm hai ai. Nichi i pri ly atho di nai pri lawm ai.

¹⁵Pri bawibawichi theung y atho di keh ai i, mana khala py pri takhrachi ai peang ali ai ny y. Kai ly nichi ai tahm anem nai khumichi lawm hai iy, nichi ly mani khumi chengchi ai py, sa thai naira haiho khiu pajau ai ny y.

¹⁶Israela chengchi ly nichi teng y mana khala py abyh u ai ny y. Huna nai abyh lawh nai deaungkho y, mymychi ly mana tanrei tamang na mo, nanai Israela chengchi teng y Aikupta pri i avum nai khym taham my pany hai ali teang ai. Huna nai khala kai ly sa thai naira angym nai ARENG ne, nanai Israela chengchi pany u ai,” napi.

¹⁷Achi pri pala naira avum nai saneng apom phai saryhrei saneng, angchei i lo, lo si kani harei kani y ARENG i leu ly kai teng y tym bo.

¹⁸Mymy ly “Nang khumicho awi, Babulon samrang Nebukhadnezar ly Turu mary ai tiu nai ne. Ni ly mymy i tavaimi risachi ai khri pa-rei ji nai vawnchi pho hai nai deaungkho y, nichi i sam amui pawn iy paleangchi py abei pan na bo. Huna nai patang u teu i py tavaimi risachi hawi samrang ly ati sai py kamran ngo u y.

¹⁹Hunai deaungkho y sa thai naira angym nai kai, ARENG my leu pei nai ly: Aikupta pri ai ly Babulon samrang Nebukhadnezar i kiu y kaau ai. Ni ly tiu lawm iy Aikupta pri i yhmtheaung katui nang nai ngiereichi ai, mymy i tavaimichi i vui y la pi pawn ai.

²⁰Ni ly mymy i tavaimichi hawi kai i kalop sa pi nai deaungkho y, kai ly ni ai kawn vang Aikupta pri kapei ai. Hini ly sa thai naira angym nai kai, ARENG i pei nai leu ne.

²¹Huni atitichi tym nai khala y kai ly Israela chengchi ai atho ham hai ai. Naibaly Ezekiela awi, kai ly ARENG ne, nanai khumi bawibawichi pany thai ai nai, nang ai thui hai ai,” napi.