Read Khumi Chin Ezekiela 3 Bible Online

Ezekiela 3 - Khumi Chin bible

Ezekiela 3

¹ Tameuh my, “Nang khumi cho awi, hini cha aeang cho; naibaly Israela khumichi teng y chei iy leu thui pi,” ang napi.

²Hunai deaungkho y kai ly labeaung kaang i, mymy ly kai cha ai nai cha aeang ang pei.

³Mymy ly “Nang khumi cho awi, nang ai kang pei nai cha aeang ai kajeu angjeng na pa-rei cho,” ang napi nai deaungkho y, kai ly kacha nai khala huni cha aeang ly khawi hang kamta tui.

⁴Naibaly Tameuh my, “Nang khumi cho awi, Israela khumichi teng y chei iy kai i leu pei nai ngiereichi thui pi.

⁵Kai ly sailang amny amcha y nai leu hawi, rai parai nai cheng takhra leu katheu nai khumichi theung y kang pato nai ny y. Israela chengchi teng y kang pato nai teu.

⁶Sailang amny amcha y nai leu hawi, nang pany ai nai rai parai nai leuchi katheu nai khumi cheng kalenchi teng y, nang ai kang pato nai ny y; kang pato lawh teu khyly, huni khumichi ly nang i leu tangai u ai.

⁷Na i py mani Israela khumichi ly nang i leu tangai u ai ny y. Nichi ly kai i leu ai malawn py tangai u ai ny y. Nichi bawibawi ly paleung tang iy leu atangai y nai khumichi ne.

⁸Vai, kai ly nang ai huni khumichi kamta paleung tang hai iy, paleung kang palen teang ai.

⁹Kai ly nang ai lengseaung tleaung y malawn py tang hai iy, diamond kamta tang hai ai. Huni tiu ham nai khumichi ai jei moh, kaso theu moh,’ napi.

¹⁰Tameuh my thui pi bi nai ly “Nang khumi cho awi, kai i leu kang pei nai ngiereichi ai hawihai palai tangai iy dawn patyp ba.

¹¹Naibaly pri palara avum nai nang i chengchi teng y chei ba. Nichi ly nang i leu ai tahm khai i py ne sy, tahm khai y i py ne sy, kai, sa thai naira angym nai ARENG my leu pei nai thui pi,” napi.

¹²Naibaly Tameuh i phailo my kai ai ang kateang nai khala kai i nithun mang, “Kani pri mang y awm nai ARENG i nang parai nai ai palo u!,” nanai kani pajyh nai katyn kamta tyn amsau nai kathai bo.

¹³Heng nai amjy palyhreichi i ali theung y pakhi aho nai katyn py, ka-ri amli nai kheuchi i katyn py, kai ly thai nai ne. Huni katynchi ly kalei theu nai katyn hawi atawm.

¹⁴ARENG ly sa thai naira len parai nai hawimy kai i tlang tleaung y tym iy, phailo my kai ai hawi jo nai khala, kai ly paleung phra, kado theu naimy abang bo.

¹⁵Hunai deaungkho y kai ly pri palara avum nai khumichi awm nai Kheba tavo sahawi i Tela Abi avang y chei iy, kai i niu nai atitichi molam y kani saryhrei athengra nai mynkym vui bo.

¹⁶Kani saryhrei bo khala ARENG ly kai teng y leu ang pei bo.

¹⁷“Nang khumi cho awi, kai ly Israela chengchi i vui y nang ai tamcheaung kang khai ai. Kaimy pany hai nai leuchi tangai iy, nang ly nichi teng y amti pi ai nai tla.

¹⁸Kaimy hawi y sa nai khumi leaungrei ly dei ai nai tla, nanai thui i py, huni khumi dei y pa-rei nang ly khumi kahawi sa vui ai nai lam patei pi y lawh baly, huni khumi ly my i kamngolai y dei ai; huna nai khala huni khumi i dei nai molam ly nang i phu ne.

¹⁹Nang ly kamngo sa nai khumi leaungrei ai, ni i tamang nai ai thui parip teu i py, ni ly mymy i hawi y sa naichi anawn y lawh baly, mymy i sa tamang nai kamngo molam y dei ai. Huna nai khala kai ly nang ai kangheng patleaung ai.

²⁰“Khumi kahawi leaungrei ly hawi y naira sa nai khala y, kai ly ni ai ka-jeira tym hai ai. Huna nai khala nang ly ni i hawi y sa nai ai thui parip y naimy awm lawh baly, ni ly mymy i sa tamang nai kamngo y dei ai. Vaichi khala y ni i kahawi sa naichi ai kaimy pany pi ai ny y. Huna nai khala huni khumi i dei nai molam ly nang i phu ne.

²¹Nang ly khumi kahawi leaungrei ai kamngo so y ai nai thui parip iy, ni py nang i leu tangai nai y kamngo so y naimy awm lawh baly, ni ly dei ai ny y, nang py kangheng tleaung ai,” napi.

²²Kai ly ARENG i sa thai naira haiho avum i, mymy ly kai teng y, “Angthau ly leaunghawi theung mang y chei ba; huni meingtymra nang teng y leu kang pei ai,” nanai leu raawi thai bo.

²³Hunai deaungkho y kai ly leaunghawi mang y kachei i, Kheba tavo sahawi y kaniu nai kamta, hunira y ARENG i nang parai nai kaniu; naibaly kai ly khaileaung y atlym i ambeu vui bo.

²⁴Na i py Tameuh i phailo ly kai i taku theung y kun i, kai ai angdo hai bo. ARENG my, “Nang ly nangmy i yhm y vawi iy yhm y aeung ba.

²⁵Nang khumi cho awi, nang ai vuinawn hawi kang kawm cheng ai i, nang ly khumi mipuichi i mo y theu pajau ai ny y.

²⁶Huni tiusi nai khumichi ai leu pei thai y na pa-rei, kai ly nang i palai ai dangkangra y akau hai thleng ai.

²⁷Naibaly nang ai kaimy thui hai ali teang ai ngai nai khala y, nang ai leu katheu teang ai nai kang pei ai. Huna nai khala nang ly nichi teng y kai i sa thai naira angym nai ARENG my hina nai ang thui pi, nanai amti pi ai nai tla ai. Phyrei khumichi ly nang i leu tangai iy, phyrei khumichi ly tangai y naimy awm u ai. Ati mana nai mo na baly nichi ly tiusi nai khumi cheng ne nai deaungkho y ne.