Read Khumi Chin Ezekiela 30 Bible Online

Ezekiela 30 - Khumi Chin bible

Ezekiela 30

¹Naibaly ARENG i leu ly kai teng y tym bi bo.

²Mymy ly “Nang khumicho awi, sa thai naira angym nai kai, ARENG i leu pei nai ai tao pajeng parai naimy thui pi ai nai ly: Ka-jei awm nai kani ly ang tym ai bo!

³ARENG my bawi la ai nai kani ly kasa bo; khupanymchi my khiu ai nai kani, khumi cheng cheaungkhangchi patang ai nai kani kasa bo.

⁴Aikupta pri y tavai atiu ai. Ethiopia pri ly ka-jeira avum ai. Khumi neangneangchi ly Aikupta pri y tleh nai avum u ai. Huni pri ly lawm nai hawi taphra naira avum ai i, phra seaungkhrang naimy awm ai.

⁵“Tavai keung y Ethiopia pri, Libia pri, Ludia pri, Arabia pri, Kuba prichira i alai nai tavaimichi hawi, kai i khumichi theung i phyrei khumichi dei u ai,” napi.

⁶ARENG my, “Tosyh mang Mikadol mary i ka-so, tokalawi mang Asavan mary y khrairei, Aikupta pri mang y asa iy amtang nai khumichi ly tavai keung y dei u ai. Aikupta pri my amlyh hai nai tavaimichi py phra pawn ai. Hini ly sa thai naira angym nai kai ARENG i pei nai leu ne.

⁷Aikupta pri ly khaileaung pri y khumi angso savai tlang keh nai pri lawm iy, huni pri i marychi ly phra bebe ai.

⁸Kai ly Aikupta pri ai mai kang hai iy huni pri ai asa hai nai khumi bawibawichi dei nai khala, kai ly ARENG ne, nanai nichi pany u ai.

⁹Aikupta pri phra nai neng tym nai khala y, kai ly dawndan y naimy awm nai, Ethiopia pri khumichi teng y satang thai hai ai nai samphochi hawi pato ai. Nichi ly jei hyn u ai. Huni kani ly kasa bo!,” napi.

¹⁰Sa thai naira angym nai ARENG my, “Kai ly Aikupta pri i nang chawn naichi tama hai ai nai, Babulon samrang Nebukhadnezar ai teaung ai.

¹¹Ni ly pahyp y naimy ana nai tavaimichi hawi jeu iy, huni pri taphra pawn ai. Nichi ly Aikupta pri y haisau hawi tiu iy, huni pri y khumi veuchi hawi kawi hai ai.

¹²Kai ly Naing tavo tui kang hai iy Aikupta pri ai, khumi hawi y naichi i kiu y tym hai ai. Cheng takhra khumichi my ly huni pri verei phra hai ai. Hini ly kai, ARENG i pei nai leu ne,” napi.

¹³Sa thai naira angym nai ARENG my, “Kai ly Nopha mary i mynchi hawi tameuh mynchi taphra pawn ai. Aikupta pri ai peang nai keung leaungrei py awm ai ny y. Kai ly khumi bawibawichi ai jei hyn hai ai.

¹⁴Aikupta pri tokalawi mang y ly khumi angso savai tlang nai lawm hai iy, tosyh mang y awm nai Zoan mary ai mai leng vui ai. Thebe mary pui ai ly pajeng ai.

¹⁵Aikupta pri i amtangra mary napi nai Pelusium mary ai kai i kado theu naira avum hai ai. Thebe mary i nang chawn nai taphra ai.

¹⁶Kai ly Aikupta pri ai mai angveaung hai ai i, Pelusium mary ai py khri pa-rei no patang hai ai. Huni mary i mary apaichi ly panawi pawn ai i, tui my um biu ai.

¹⁷Heliopoli mary hawi Bubasti marychira i thawndeang deaungdichi ly tavai keung y dei iy, khumi takhrachi ai ly langheng y hawi u ai.

¹⁸Aikupta pri i sa thai naira haiho jum hai nai khala, nichi i amlyh am-e nai sorai paleung tama hai ai. Taphan mary ly veng naimy awm ai. Aikupta pri y khupanym my khiu cheng i, mary bawibawichira i khumichi ly langheng y hawi pawn nai avum u ai.

¹⁹Hina nai kamta Aikupta pri ai pajeng nai khala, kai ly ARENG ne, nanai nichi pany u ai,” napi.

²⁰Achi pri pala naira avum nai saneng holai harei saneng angchei lo, lo si kani saryhrei kani y, ARENG i leu ly kai teng y tym bo.

²¹Mymy ly “Nang khumicho awi, Kai ly Aikupta samrang i kiuban tleu hai vui bo. Hiuchi amtawn teang iy, haisau pa bi pajau ai nai huni kiu ai ly ami my py bam nai, niprawn hawi awi hai pi y leang bo.

²²Huna nai y vai, sa thai naira angym nai kai, ARENG my leu pei nai ly kai ly Aikupta samrang i paleung ka-e ne. Ni i kiuban nyhrei khei vui ai. Tleu nai kiu hawi tleu y nai kiu ai py khei ai. Huna nai khala ni kiu i haisau ly tla vui ai.

²³Kai ly Aikupta pri i khumichi ai khumi cheng cheaungkhangchi hawi khaileaung pri meingtym tleirei y ahei hai ai.

²⁴Hunaibaly Babulon samrang ai atho len hai ai i, ni i kiu y kai i haisau au ai. Na i py Aikupta samrang i kiuban ai ly kakhei vui ai. Ni ly vo tangam naimy mymy i paleung ka-echi i mo y dei ai.

²⁵Kai ly ni ai jy hai angchi khyp ai i, Babulon samrang ai atho ham hai lawh ai. Kai i haisau ai Babulon samrang i kiu y au iy, ni ly Aikupta pri mang y haisau bo patheung nai khala, kai ly ARENG ne, nanai khumi luteng my pany u ai.

²⁶Kai ly Aikupta pri khumichi ai khumi cheng cheaungkhangchi hawi, khaileaung pri meingtym tleirei y ahei hai vui ai. Huna nai khala kai ly ARENG ne, nanai nichi my pany u ai,” napi.