Read Khumi Chin Ezekiela 31 Bible Online

Ezekiela 31 - Khumi Chin bible

Ezekiela 31

¹Achi pri palara avum nai saneng holai harei saneng, pa-thom lo, lo si kani harei kani y ARENG i leu ly kai teng y tym.

²Mymy ly “Nang khumicho awi, Aikupta pri samrang hawi ni i khumichi teng y thui pi ai nai ly: Nangchi ly khrikhri pa-rei sa thai naira awm u na ly! Nangchi ai ati hawi pata ai mo?

³Nangchi ly atho ham nai Asuria hawi atawm; huni pri ly Lebanon mawi i saitleang keung hawi atawm; huni keung ly khupanym y angteu vi na pa-rei asang i, changpichi angvai iy khen apu parai nai ne.

⁴Tui nga hawihai nai deaungkho y keung pui cheang na bo; khaileaung theung i tuinochira i py tui nga nai ne. Huni tavochi ly saitleang keung prau nai meingtymra y leaung i, thengreung theung i takhra dengkeaungchi mang py, tavo tui leaung pi.

⁵Saitleang keung ly tui bym pa-rei nga nai deaungkho y, takhra keungchi tleaung y py asang; changpichi py lo nai ne.

⁶Huni changpichira y tavo cheaungkhangchi tabu sa; daichi mawichi ly huni dengkeaung keung anui y chochi tapen; khaileaung pri i khumi cheng cheaungkhangchi py, huni keung ka-khui y anawn u nai ne.

⁷Huni saitleang keung ly khrikhri pa-rei apu parai; changpichi sau parai iy khri pa-rei asang nai ne. Huni keung ly khaileaung theung i tuinochira khrairei tangjynchi pala nai ne.

⁸ Tameuh i akho theung i saitleang keungchi malawn py huni keung hawi pata pajau y. Mani maicha keung malawn py hina nai changpichi by y. Mani kheaungtumchy py hina nai changpi len nai by y. Tameuh i akho theung y malawn py hina tanrei apu nai dengkeaung keung by y.

⁹Kai ly huni keung ai angvai nai changpichi hawi apu parai pa-rei palum nai deaungkho y, Eden meingtym, Tameuh i akho theung i dengkeaung leilachi my malawn py paleung angai y bo.

¹⁰“Huna nai y huni keung ly ati mana lawm ai mo, nanai sa thai naira angym nai kai, ARENG my kang thui pi ai. Saitleang keung ly changpichi salo mang y khupanym khrairei asang bo. Huni keung ly hina nai asangryh asangryh iy, amlyh am-e ra amlyh am-e ra bo.

¹¹Hunai deaungkho y kai ly huni keung ai nawi su iy, cheng takhra samrang leaungrei i kiu y au ai. Ni ly huni keung ai ni i hawi y nai ka-taing pajeng ai.

¹²Pahyp y naimy ana nai cheng takhra khumichi ly huni keung ai paliu iy khai u su ai. Huni i changpichi hawi tleu nai changpi kalenchi ly pri verei i mawichi, tavo micheaungchi, leaunghawichi salo y aheang na ai. Huni keung i ka-khui y abyh u nai khumi bawibawichi py theu u pawn ai.

¹³Tavochi ly jeu iy keung aheng naira y chym u ai. Daichi mawichi ly huni i changpichi ai chiu piupa ai.

¹⁴Hunai deaungkho y mana tanrei tui nga teu i py, vai i dengdairei mani keung py huni saitleang keung tanrei, changpichi salo mang y asang ai ny y. Huni keung salyh kamsuichi ly khupanym y tym pa-rei asang ai ny y. Huni dengkeaung keung bawibawichi py khumichi kamta, khaileaung y dei iy tavau pri y ang vum u ai,” napi.

¹⁵Sa thai naira angym nai ARENG my leu pei nai ly: “Tavau pri y saitleang keung ang vum nai kani y, kai ly khaileaung theung i tavo tuichi my huni ai um hai iy, vo tangam nai ka-ma-ra lawm hai ai. Kai ly tavochi ai anawn hai iy tavo micheaungchi ai tui leaung hai y ai. Huni saitleang keung ly dei nai deaungkho y, kai ly Lebanon mawichi ai kaveng tym hai iy, daichi theung i dengkeaung bawibawichi jeirawm hai ai.

¹⁶Huni saitleang keung ai kaimy tavau pri y ang vum hai nai khala, huna nai aheng nai katyn molam y, khumi cheng cheaungkhangchi ly kaso theu u ai. Huna nai khala khaileaung anui y tym nai Eden akho i dengkeaung keung ngiereichi hawi Lebanon mawi i tui bym pa-rei nga nai, hawi keh nai dengkeaung keungchi ly khri pa-rei paleung amo theu u ai.

¹⁷Hunichi ly vaichi khala aheang nai keungchi hawi avum ai nai saitleang keung hawi vanrei, tavau pri y ang vum ai. Huni saitleang keung i ka-khui y abyh u nai khumichi ly khumi cheng cheaungkhangchi theung y ahei seaungkhrang pawn ai,” napi.

¹⁸Sa thai naira angym nai ARENG my, “Saitleang keung ly Aikupta samrang hawi ni i khumi mipuichi ne. Eden akho theung i dengkeaung keungchi malawn py, huni keung tanrei asang y, apu py apu y. Na i py huni keung ly Eden akho theung i dengkeaung keungchi kamta, tavau pri y ang vum kathiu teang ai. Lengkhym takip y nai khumichi, tavai keung y dei nai khumichi hawi avum u ai. Hini ly kai i pei nai leu ne,” napi.