Read Khumi Chin Ezekiela 32 Bible Online

Ezekiela 32 - Khumi Chin bible

Ezekiela 32

¹Achi pri palara avum nai saneng holai nyhrei saneng, lo holai nyhrei, lo si kani harei kani y, ARENG i leu ly kai teng y tym.

²Mymy ly “Nang khumicho awi, Aikupta samrang teng y hawihai palai pany hai ai nai ly: nang ly khumi cheng cheaungkhangchi tlang tleaung y khrangsi kamta sa teu i py, tavo theung y tui taby iy panu hai nai satam hawi atawm keh. Nang i kheu hawi tavo tui panuta hai ai nai lilu piu bo.

³Khumi cheng cheaungkhangchi awm achu nai khala, kai ly nang ai paleupy hawi mym iy patiu nai kacheng y ryh hai ai.

⁴Naibaly kacheng y takhyh hai iy angdym mang y ryh ai. Khaileaung pri y awm nai tavochi hawi daichi mawichi i teicha lawm ai.

⁵Nang i veaung nai veu ly mawichi, leaunghawichira y kawi na ai.

⁶Khaileaung y nang i thi hawi suinie hai ai. Huni thi ly mawi saleung y khrairei sui ai. Tavo micheaungchi py nang i thi kawi na ai.

⁷ Nang ai kang tamyh nai neng khala, kai ly kani khusang khiu vui iy ka-si taukichi tama hai ai. Kanito py khupanym my deng hai vui ai. Lo py kangvang pei ai ny y.

⁸Kai ly kani mang i kangvang ngiereichi ai veng hai iy, nang i pri y kaveng tym hai ai. Hini ly sa thai naira angym nai kai, ARENG i pei nai leu ne.

⁹Nang ly mana khala py thai vai y nai prichi mang y, nang i phra nai satang kaimy ahei hai nai khala, khumi cheng cheaungkhangchi ly paleung phra naira tym u ai.

¹⁰Kaimy nang ai kang sa nai molam y khumi neangneangchi ly kaso theu nai mynkym u ai. Kai ly haisau lilei nai khala samrangchi ly jei nai kaso theu u ai. Nang atlym nai kani y nichi bawibawi py, mymychi i hengra molam y paleung mawn u ai i, kaso theu u ai,” napi.

¹¹Sa thai naira angym nai ARENG my Aikupta samrang teng y, “Nang ly Babulon samrang i haisau hawi avum ai.

¹²Kai ly pahyp y nai khumi chengchi i tavaimichi ai haisau pa hai iy, nang i khumi bawibawichi ai tleh hai ai. Nang i khumi bawibawichi hawi, nang i amlyh hai nai atitichi ly taphra naira avum ai.

¹³Kai ly nang i tawnbawichi ai, nichi i tui nei nai tui sampum tleirei y katleh ai. Tui panu hai ai nai khumi hawi tawnbawichi awm bi ai ny y.

¹⁴Kai ly nang i tuichi pachem hai iy nang i tavochi py olive asitui kamta amchyh y naimy leaung hai ai. Hini ly sa thai naira angym nai kai, ARENG i pei nai leu ne,” napi.

¹⁵Aikupta pri y khumi angso savai tlang nai meingtym lawm hai ai i, yhmtheaung katuichi hawi, huni pri y awm nai khumi bawibawichi ai tamyh pawn nai khala, kai ly ARENG ne, nanai nichi pany u ai.

¹⁶Hina nai kaimy hawihai palai thui pi kheng nai leuchi ly vo sai lawm ai. Neampachychi ly Aikupta pri hawi huni pri khumi bawibawichi i vui vo hai iy, huni vo sai hawi vo hai ai. Hini ly sa thai naira angym nai kai, ARENG i pei nai leu ne,” napi.

¹⁷Achi pri palara avum nai saneng holai nyhrei saneng, angchei i lo, lo si kani holai pangrei kani y, ARENG i leu ly kai teng y tym.

¹⁸Mymy ly “Nang khumicho awi, Aikupta pri khumi neangneangchi i vui y vo tangam hai ba. Nichi ai sa thai naira awm nai cheng takhra khumichi i chaniu anglochi hawi vanrei tavau pri y pato ba.

¹⁹Nichi teng y thui pi ai nai ly: nangchi ly khumi takhrachi tleaung y khri pa-rei apu, nanai adawn u nai sai a? Nangchi ly dei naichi i tavau pri y ang vum iy lengkhym takip y nai khumichi hawi vanrei aseaung u.

²⁰Aikupta khumichi ly tavai keung y dei nai khumichi hawi vanrei dei u ai. Aikupta khumi bawibawichi ai tamyh pawn ai nai haisau ly khai yb bo.

²¹Khrikhri pa-rei ham nai soraichi my, Aikupta pri i khumichi hawi nichi mang y asa hai nai khumichi ai tavau pri mang dengdairei lamchung ai. Nichi my, ‘Tavai keung y dei u nai lengkhym takip y nai khumichi ly hini meingtym y kathiu iy i u bo!,’ nanai aeu u.

²²“Asuria ly mymy i tavaimichi i tapreaungchi my katanmeuh nai, huni meingtym y awm. Nichi bawibawi ly tavai keung y dei naichi ne.

²³Nichi i tapreaungchi ly tavau pri i thiu keh naira y awm. Asuria i tavaimi bawibawichi ly tavai keung y dei u iy, nichi i tapreaungchi ly Asuria i lengseaung takeu nai angawm ai katanmeuh nai ne. Na i py vaichi khala y nichi ly heng nai khumichi ai kaso theu hai nai khumichi ne.

²⁴“Elam ly mymy i tavaimichi i tapreaung my katanmeuh nai, huni meingtym y awm. Nichi bawibawi ly tavai keung y dei naichi ne i, lengkhym takip y naimy tavau pri y ang vum kathiu nai khumichi ne. Heng nai thym khala nichi ly khumi takhrachi ai jei hyn na pa-rei sa u teu i py, vai ly tavau pri y ang vum kathiu naichi hawi vanrei, tahm by y naimy dei u bo.

²⁵Elam ly tavai keung y dei nai khumichi hawi vanrei aseaung naimy awm. Na i py tengpang sahawi y tavaimichi i tapreaung awm. Nichi bawibawi py lengkhym takip y nai khumichi hawi tavai keung y dei u naichi ne. Nichi ly heng nai thym khala khumi takhrachi ai jei hyn na pa-rei sa u teu i py, vai ly tavai keung y dei nai khumichi i khym taham avum naimy, tavau pri y ang vum kathiu naichi hawi vanrei tahm by y naimy dei u bo.

²⁶“Mesheka hawi Tubal nini ly myni i tavaimi tapreaungchi my katanmeuh nai, huni meingtym y awm. Nichi bawibawi ly lengkhym takip y naimy tavai keung y dei u iy, tavau pri y ang vum kathiu u nai ne. Na i py nichi ly vaichi khala heng nai khumichi ai jei hyn hai nai khumichi ne.

²⁷Nichi ai ly tavai ateaung kangym amthyp naimy tavau pri y ang vum kathiu nai, jangni i sorai kalenchi kamta mymychi i haisauchi ai luchi anui y py, khopuichi ai paleungchi tleaung y py khai iy, tahm khai naimy pavum ai nai ngo y. Nichi ly lengkhym takip y naimy dei chum nai tavaimichi hawi vanrei aseaung u bo. Hini tavaimichi ly vaichi khala, heng nai khumichi ai jei hyn na pa-rei sa thai naira awm nai khumichi ne.

²⁸Aikupta khumichi ly tavai keung y dei nai lengkhym takip y nai khumichi hawi vanrei, sum naira avum nai ly hina nai kamta ne.

²⁹“Edom py my i samrangchi, samrang i chapochi hawi vanrei huni meingtym y awm. Nichi ly sa thai naira awm nai tavaimichi ne teu i py, vai ly tavai keung y dei nai lengkhym takip y nai khumichi hawi vanrei tavau pri y aseaung u bo.

³⁰“Tosyh mang i samrang i chapochi hawi Sidon mary i khumichi py huni meingtym y awm; vaichi khala mymychi i sa thai naira hawi khumi takhrachi ai jei hyn na pa-rei sa u teu i py, vai ly tavai keung y dei nai khumichi hawi vanrei tahm by y naimy dei iy, lengkhym takip y nai khumichi hawi vanrei tavau pri y ang vum i, tahm by y bo.

³¹“Aikupta samrang hawi mymy i tavaimichi ly tavai keung y dei nai huni khumi bawibawichi ai niu nai khala, amymychi ai paleung apahawi pajau ai,” nanai sa thai naira angym nai ARENG my leu pei nai ne.

³²“Aikupta samrang ly heng nai khumichi ai jei hyn na pa-rei sa bo. Na i py ni hawi ni i tavaimi bawibawichi ly tamyh naira avum u bo. Tavai keung y dei nai lengkhym takip y nai khumi bawibawichi hawi vanrei a-up nai avum ai.” Hini ly sa thai naira angym nai ARENG i pei nai leu ne.