Read Khumi Chin Ezekiela 34 Bible Online

Ezekiela 34 - Khumi Chin bible

Ezekiela 34

¹ARENG i leu ly kai teng y tym.

²Mymy ly “Nang khumicho awi, Israela chengchi i beram typ nai keungchi ai thui tamawn ba. Nichi teng y sa thai naira angym nai kai, ARENG i leu pei nai thui pi ai nai ly nangchi Israela chengchi i beram typ nai keungchi awi, nangchi ly taham si. Nangchi ly nangmychi ai apacho apanei teu i py, beramchi ai ly kry u y.

³Nangchi ly kanu nei, beram mui akhiu iy veung hawi nai beramchi tleh u, cha u nai ne. Na i py beramchi ai ly kry u y.

⁴Kreaung nai beramchi ai khen y, no nga nai beramchi ai py asi so pi y; tamo nga nai beramchi ai kanih hawi bam pi y, lam tamang nai beramchi ai pakym y; tama nai beramchi ai py hau y naimy, nangchi ly huni beramchi ai pahen ai nai pany u y.

⁵ Beramchi ly beram typ nai keung by y nai deaungkho y, ahei khrikhra iy mawi kasichi i teicha lawm u bo.

⁶Hunai deaungkho y mawichi hawi mawi aheungchira y ahi lengleang nai ne. Nichi ly khaileaung pri verei y ahei u bo. Nichi ai hau nai khumi hawi, hau ai nai atho sa nai khumi leaungrei py by y.

⁷“Nangchi beram typ nai keungchi awi, vai kai, ARENG i leu pei nai tangai u.

⁸Kai ly Tameuh kangheng ne nai deaungkho y nangchi ly kai i leu tangai u. Beram typ nai keung by y nai deaungkho y, kai i beramchi ai mawi kasichi my kei iy cha u bo. Kai i beram typ nai keungchi ly beramchi hau u y; nichi ly mymychi ai naini akry iy, beramchi ai ly kry u y.

⁹Hunai deaungkho y nangchi beram typ nai keungchi awi, kai i leu tangai u.

¹⁰Sa thai naira angym nai kai, ARENG ly nangchi i paleung ka-e ne iy, kai i beramchi ly nangmy kry ai nai kalop ne, nanai angchi khyp thai hai nai bo. Kai ly kaimy i beramchi ai nangchi teng i nai la vui ai. Nangchi ly mana khala py nichi ai kry ai nai hawi, nangmychi ai naini akry ai nai py kang pei ai ny y. Beramchi ly nangchi i teicha lawm y pa-rei, kai ly kaimy i beramchi ai nangchi kiu i nai atleu ai.

¹¹“Sa thai naira angym nai kai, ARENG my nangchi teng y leu pei nai ly ahei khrikhra nai bo y pakym ali teang nai beramchi ai beram typ nai keung my kry nai kamta, kai ly kaimy i beramchi ai hau iy kry ai. Kani khaileaung veng nai neng kani y nichi ahei khrikhra nai meingtym tleireira i nai, nichi ai kapalau ali teang ai.

¹³Pri takhra mang i nai pakym chum baly nichi ai mymychi awm nai pri y palau teang ai. Kai ly nichi ai Israela mawichi hawi tavo micheaungchi mang y hawi iy, sui tlai nai kahawichira y kapacho ai.

¹⁴Mawi saleungra i acha baichi hawi, Israela pri apu parai nai sui tlaira y chymme pa-rei tlai hai ai. Sui kahawichira y ambeu hai iy acha heng-a nai sui tlaira y tlai hai ai.

¹⁵Kaimy naimy kaimy i beramchi ai typ iy nichi i ai nai meingtymchi hau pi ai. Hini ly sa thai naira angym nai kai, ARENG i pei nai leu ne.

¹⁶“Kai ly tama nai beramchi ai hau iy, lam tamang nai beramchi ai palau teang ai. Tamo nga nai beramchi ai kanih hawi bam iy, no nai beramchi ai asi sa pi ai. Na i py veung hawi iy atho awm nai beramchi ai tleh ai. Ati mana nai mo na baly kai ly kateng sa reng nai beram typ keung ne nai deaungkho y ne.

¹⁷“Huna nai y kai i beram kanghuchi awi, sa thai naira angym nai kai, ARENG my leu pei nai ly Kai ly nangchi bawibawi ai tara chih ai. Hawi nai, hawi y nai beram hawi mi-i ai khai takhra ai.

¹⁸Nangchi phyrei ly hawi keh nai acha cha ai nai nga u i py paleung tuinem nai by y. Nangmychi cho y nai achachi ai kheu hawi chiu u lawh ly! Nangchi ly tui kamchyn nei iy, nangchi nei y nai tui ai ly panu pa-rei sa u lawh ly!

¹⁹Kai i takhra beramchi ly nangchi kheu hawi chiu iy khai su nai acha cha naimy, nangchi i panu hai nai tui nei u nai ne.

²⁰Hunai deaungkho y sa thai naira angym nai kai, ARENG my nangchi teng y leu kang pei nai ly kai ly nangchi beram veung kahawichi hawi veung kajeichi theung y tara kangchih ai.

²¹Nangchi ly no nai beramchi ai tengpang mang y ie vui iy, beram kanghu theung i nai, taki hawi deng u phro bo.

²²Na i py kai i beramchi ai mo mang y ana ai nai kang pei bi ai ny y. Kai ly kai i beram ha harei ai tara chih ai. Beram hawi nai, hawi y nai py patleh takhra ai.

²³ Nichi i vui beram typ nai keung leaungrei lawm ai nai, kai i miseaung Davida ka-tawm samrang khai pi ai. Ni my ly nichi ai kry ai.

²⁴ Kai, ARENG ly nichi i Tameuh lawm ai. Kai i miseaung Davida ka-tawm samrang py, nichi ai peang nai samrang lawm ai. Hini ly kai i pei nai leu ne.

²⁵Nichi i vui ka-ym awm ai nai kai ly nichi hawi aly nai Leu Maikawm asa ai. Ka-jei awm nai mawi kasi bawibawichi ai pri theung i nai patheu pawn ai. Huna khala naini kai i beramchi ly chymme naimy thengreung theung y awm u ai i, daichi theung y i u ai.

²⁶“Kai ly nichi ai amtheaungra pei iy kai i mawi kachai tengtang y awm hai ai. Aly aeang nai neng tym nai khala, amtheaung nai kani nai hai ai.

²⁷Dengkeaung keungchi ly athai iy khaileaung my amti amjang patheu pi ai. Khumi bawibawichi ly mymychi i pri y chymme naimy awm u ai. Kai ly kaimy i khumichi ai pakheng nai sengkrychi su pi iy, nichi ai miseaung i nai lawi hai nai khala, kai ly ARENG ne, nanai nichi pany u ai.

²⁸Khumi cheng cheaungkhangchi ly nichi ai mo mang y mana khala py tiu u bi ai ny y. Mawi kasichi my py kei bi ai ny y. Nichi ly chymme naimy awm u ai. Ami my py nichi ai pajei ai ny y.

²⁹Kai ly nichi ai paitiu khuta hawi nai meingtymchi pei iy, pri theung y tahum takang py tama hai ai. Cheng takhra khumichi my py nichi ai mana khala py panui hai bi ai ny y.

³⁰Nichi i Tameuh, sa thai naira angym nai kai, ARENG ly Israela chengchi ai ama hai naimy awm, nanai py, nichi ly kai i khumichi ne, nanai py khumi lutengchi my pany u ai. Hini ly sa thai naira angym nai kai, ARENG i pei nai leu ne.

³¹“Kai i beramchi, kai i pacho panei nai beram kanghuchi, nangchi ly kai i khumichi ne iy, kai ly nangchi i Tameuh ne,” nanai sa thai naira angym nai kai, ARENG my leu pei nai ne.