Read Khumi Chin Ezekiela 35 Bible Online

Ezekiela 35 - Khumi Chin bible

Ezekiela 35

¹ ARENG i leu ly kai teng y tym.

²Mymy ly “Nang khumicho awi, Edom mawi mang y amhi iy huni pri y thui tamawn ba.

³Khumichi teng y sa thai naira angym nai kai, ARENG my ati mana leu pei mo, nanai thui pi. “Edom mawichi awi, kai ly nang i paleung ka-e ne he! Kai i kiu pheu iy kai ly nang ai, khumi angso savai tlang nai daichi daireang lawm hai ai.

⁴Nang i marychi ai phra seaungkhrang hai iy nang ai khumi angso savai tlang nai meingtym lawm hai ai. Huna nai khala kai ly ARENG ne, nanai nangchi pany u ai.”

⁵“Nang ly Israela pri y paleung ka-e khai jojo. Huni pri ly mymy i hawi y sa nai deaungkho y, pajeng naira avum iy ka-jeira tym nai neng khala, nang ly huni pri i khumichi ai padei hai bo.

⁶Hunai deaungkho y sa thai naira angym nai kai, ARENG ly Tameuh kangheng ne i, nang ly dei ai nai tla ai; nang ly law tleaung ai ny y. Nang ly khumi ai padei nai keung ne nai deaungkho y, nangmy kypkyp ai py ang padei ai.

⁷Kai ly Edom mawi y khumi angso savai tlang nai meingtym lawm hai iy, hunira y aki aleaung nai khumi ngiereichi ai padei pawn ai.

⁸Mawichira y khumi veuchi hawimy kawi hai ai. Tavai keung y dei nai khumichi i veu ly mawi aheungchi, tavo micheaungchi, leaunghawichira y kawi cheng na ai.

⁹Kai ly nang ai khumi angso savai tlang nai meingtym lawm hai jojo ai. Nang i marychira y ami py awm ali bi ai ny y. Huna nai khala kai ly ARENG ne, nanai nang pany ai.

¹⁰“Kai ARENG ly Juda hawi Israela chengchi i vui Tameuh ne lawh teu i py, nang ly huni khumichi hawi, nichi i prichi ai peang iy nangmy i kiu y tym hai vui ai, nanai thui lawh bo.

¹¹Huna nai y sa thai naira angym nai kai, ARENG ly Tameuh kangheng ne nai deaungkho y, kai i khumichi ai nangmy kado theu nai, paleung ka-e khai nai, niu ngai y nai molam y, nang ai tara chih ai. Nang ly nichi i tlang tleaung y sa nai kahm y, pajeng naira avum nai ne, nanai nichi pany u ai.

¹²Huna nai khala Israela mawichi ly khumi angso savai tlang nai, huni meingtym ly kaichi my tiu lawm nai meingtymchi ne, nanai nangchi thui tamawn nai leuchi ai, kai ARENG ly thai bo, nanai nangchi pany u ai.

¹³Nang ly kai ai ka-awi sa iy atyhtyh naimy amlyh nai leu katheu nai py, kai ly thai nai ne,” napi.

¹⁴Sa thai naira angym nai ARENG my, “Kaimy peang nai Israela pri phra nai thym khala, nang ai amo theu hai nai kamta,

¹⁵nang phra nai thym khala py, khaileaung pri verei amo theu u ai nai, kai ly nang ai khumi angso savai tlang nai meingtym lawm hai ai. Seira mawi napi nai Edom pri verei ly khumi angso savai tlang nai meingtym lawm ai. Huna nai khala kai ly ARENG ne, nanai khumi lutengchi my pany ai,” napi.