Read Khumi Chin Ezekiela 39 Bible Online

Ezekiela 39 - Khumi Chin bible

Ezekiela 39

¹Sa thai naira angym nai ARENG my, “Nang khumicho awi, Misheka hawi Tubal chengchi i len keh nai samrang Koka ai thui tamawn ba. Kai ly ni i paleung ka-e ne, nanai thui pi.

²Kai ly ni ai amhi hai iy ryh vui ai. Israela mawichira tym pa-rei tosyh ngan dengdairei kahawi ai.

³Naibaly ni i langvawi kiu i thailiho hawi, lamtang kiu i thailiho chynchi ai tabeang khei vui ai.

⁴Koka hawi tavaimi kanghuchi py, ni i amsawi amnaichi py, Israela mawichi saleung y dei u ai. Kai ly nichi i veu ai tavo kasichi hawi daichi mawichi i teicha lawm hai ai.

⁵Nangchi ly adym angdengra y dei ai. Hini ly sa thai nai angym nai kai, ARENG my leu pei nai ne.

⁶Kai ly Makoka pri hawi khumichi tlamsa naimy awm nai pangli peang jeungrei mai kang hai ai. Huna nai khala kai ly ARENG ne, nanai khumi lutengchi my pany u ai.

⁷Kai ly kaimy i amyn kachai ai kai i khumi Israela chengchi pany u ai nai kasa ai. Nichi ly huni amyn kachai ai thui tamawn ai nai tlo y. Huna nai khala kai, ARENG ly Israela chengchi i chai parai nai Tameuh ne, nanai khumi cheng cheaungkhangchi my pany u ai,” napi.

⁸Sa thai naira angym nai ARENG my, “Kaimy thui pi yb nai neng kani ly tym angchi khyp ai.

⁹Israela marychira y awm u nai khumichi ly mary angam mang y theu iy, paleung ka-echi i khai su nai tavai ateaungchi ai, theng palawn ai nai pakym achu ai. Nichi ly saneng saryh khrairei theng palawn ai nai khupui, thailiho, thailiho chyn, samtleang hawi tivichi nga u ai.

¹⁰Paleung ka-echi khai su nai tavai ateaungchi nga u ai i, nichi ly adym angdengra y theng ei ai nai hawi, daichi theung y dengkeaung paliu ai nai aly ngai ai ny y. Nichi ly mymychi ai tiu lawm nai khumichi ai tiu lawm u ali teang ai. Hini ly sa thai naira angym nai ARENG my pei nai leu ne.

¹¹ARENG my, “Hini atitichi tym nai khala, Koka teng y Israela pri pangli kadei nisi vai mang y awm nai lamdeu leaunghawira, tapreaung meingtym harei kapei ai. Hunira y Koka hawi ni i tavaimi bawibawichi ai up nai deaungkho y, khuleaung chei naira lam by y vui na ai. Huna nai y huni leaunghawi ly Koka tavaimi leaunghawi, nanai amyn loh ai.

¹²Israela chengchi ly avang saleaung chai ai nai khumi tlaiveuchi ai lo saryh ryrei veu pavum u ai.

¹³Mipui bawibawichi ly veu pavum naira y sabawm u ai. Hunai deaungkho y kai i phum haiho amteng nai kani y, nichi ly tahm pasang naira nga u ai. Hini ly sa thai naira angym nai kai, ARENG my pei nai leu ne.

¹⁴Lo saryhrei bo baly meingtym tleirei y amki iy, awm asai rai nai khumi veuchi hau i, up ai nai khumichi vawi takhra ai. Hina nai hawimy avang saleaung chai hai ai.

¹⁵Huni khumichi ly avang saleaungchira y chei kathiu chei kalau naimy, khumi hiuchi niu nai tleirei Koka tavaimi leaunghawira y veu up ai nai khumichi tym nai neng khrairei, angdang teangchi leng u ai.

¹⁶(Huni leaunghawi sahawi y tavaimi amyn la iy amyn pathi nai mary awm.) Hunai deaungkho y avang saleaung chai ali teang ai,” napi.

¹⁷ Sa thai naira angym nai ARENG my kai teng y, “Nang khumicho awi, tengpang sahawi meingtym tlei reita i tavochi hawi daichi mawichi ai, nichi i vui kaimy sa pi yb nai apathyp nai pawira jeu iy cha nei u ai nai palau ba. Israela mawi saleung i nang parai nai kapathyp pawi pui ne.

¹⁸Huni pawi ly len parai nai cha nei pawi ne i, nichi ly tavaimi risachi i ngan cha iy pri peang nai samrang i thi nei u ai. Huni tavaimi risachi hawi pri peang nai samrangchi ly Bashan pri i veung hawi nai tawnbawichi napi nai beram katai, beramcho, mi-ichi, sichi kamta dei u ai.

¹⁹Huni khumichi ly huna nai tawnbawichi kamta padei nai avum nai khala, tavo hawi daichi mawichi ly thau bym pa-rei cha iy, thi pavui pa-rei nei u ai.

²⁰Kaimy sa pi nai cha nei pawira y nichi ly keaungngochi hawi keaungngo atang nai risachi, tavaimichi hawi tavai keung y abawi naichi i ngan cha ai nai nga u ai. Hini ly sa thai naira angym nai kai, ARENG my pei nai leu ne,” napi.

²¹ARENG my, “Khumi cheng cheaungkhangchi ly kai i nang parai nai haiho niu u ai. Kai i ka-dyh ka-dawi tara chih naichi leu pacheang naira y, kai ly kaimy i sa thai naira ai ati mana teaung mo, nanai nichi teng y patei pi ai.

²²Huni neng khala i dengdairei Israela chengchi ly mymychi i ARENG Tameuh ly kai ne, nanai pany u ai.

²³Israela chengchi ly kai i tlang tleaung y sa tamang nai kamngo deaungkho y, pri pala naira avum bo, nanai py, khumi cheng cheaungkhangchi my pany u ai. Kai ly nichi ai nithun thun hai vui iy, paleung ka-echi i kiu y tym hai i, tavai keung y dei hai bo.

²⁴Kai ly nichi ai mymychi i amso ngai nai hawi, hawi y naichi hawi kamlau chih pi chum baly, nithun thun veng bo,” napi.

²⁵Sa thai naira angym nai ARENG my, “Na i py vai kai ly Jakob i katu chanau ne nai Israela chengchi ai pahen iy, nang chawn hai ali teang ai. Kai i amyn kachai ai ama hai ai.

²⁶Nichi ly mymychi i pri y pajei pahyn ai nai khumi by y i, tlamsa naimy awm u nai khala, kai i tlang tleaung y ka-ym by y nai deaungkho y tahm phra u nai bo, nanai tami pajau y ai.

²⁷Kai ly chai parai nai keung ne, nanai khumi cheng cheaungkhangchi pany u ali teang ai nai, kai i khumichi ai paleung ka-echi awm nai pri tleirei i nai kapahawi ali teang ai.

²⁸Huna nai khala kai i khumichi ly kai ai, mychi i ARENG Tameuh ne, nanai pany u ai. Ati mana nai mo na baly kai ly vaichi khala, nichi langheng hawi vui nai avum hai teu i py, vai ly leaungrei py takhawi y na pa-rei pangym iy, mymychi i pri y tha teang nai deaungkho y ne.

²⁹Kai ly kaimy i khumi Israela chengchi tlang tleaung y kai i phailo lei pi ai. Nichi ai mana khala py kai nithun thun bi ai ny y. Hini ly sa thai naira angym nai kai, ARENG my pei nai leu ne,” napi.