Read Khumi Chin Ezekiela 40 Bible Online

Ezekiela 40 - Khumi Chin bible

Ezekiela 40

¹Huni kani ly achi pri palara avum nai bo i, saneng apom phai pangrei, saneng kangtha kani horei kani, Jerusalem mary y peang vui nai saneng holai palyhrei neng alyp nai kani ne. Huni kani y kai ly ARENG i sa thai naira my khiu nai avum chum baly, mymy ly kai ai hawi jo nai ne.

² Paleung mei y niu nai y Tameuh ly kai ai Israela pri mang y anghawi i, mawi ka-sang salo y khai bo. Huni mawi i tokalawi ngan mang y mary harei hawi atawm nai yhmchi kaniu bo.

³ Mymy ly kai ai huni mary sahawi mang y hawi nai khala, kai ly kheupaja kamta angvang nanai khumi leaungrei ai kaniu. Ni ly suju vuinawn pata ai nai patara amto syn naimy, mary apai pa-khora y angdo bo.

⁴Mymy ly kai teng y, “Nang khumicho awi, khen kalingie; nang ai kang thui pi nai ly hawihai tangai ly kaimy patei nai ngierei hawihai palai dawn kheng ba. Ati mana nai mo na baly kai ly nang ai hunichi patei ai nai, hini meingtym y kanghawi nai ne. Nang ly Israela chengchi teng y nangmy i niu nai saichi thui pi ai nai tla ai,” napi.

⁵ Kai i niu nai ly Achura yhm ne; huni Achura yhm ai apai pahi meuh bo. Pata naira amto syn nai khumi ly miu tariurei sau nai pata naira amto hawi apai pata cham bo. Huni apai ly ka-sang miu tariurei, katho py miu tariurei awm.

⁶Naibaly ni ly nisi mang y mo amtheung nai apai katheu mang y chei i, khailei lyn iy salo keh i kheubyn dengdai katheu pa-kho y khrairei pata cham i, ka-sang miu tariurei awm nai avum.

⁷Katheu kamlem mang y lamchy harei awm; huni lam i langvawi lamtang mang y ly tamcheaungchi i vui amora takunchy thomrei awm akyhkyh. Huni amora takunchy bawibawi ly jengka ameaung i, miu tariurei awm. Amora takun harei hawi harei sala i angpang ly miu pangrei tho nai ne. Hini amora takunchi kamlem y, ka miu tariurei awm nai lamchy harei awm. Huni lamchy ly Achura yhm mang y mo tha nai takun pui harei mang y chei nai lam ne.

⁸Huni khumi ly huni takun pui ai pata cham i, ka miu tajarei awm nai avum; huni takun pui kachawn keh angpang ly katho miu nyhrei awm riri.

⁹

¹⁰(Apai pa-kho lam i langvawi lamtang y awm nai tamcheaungchi i amora takun thomreichi ly katheang kalen atawm riri bo. Hunichi ai patleh nai dengpangchi py, katho atawm riri nai ne.)

¹¹Naibaly ni ly lam sala i ka pata cham i, bawibawi ly miu holai thomrei awm nai avum. Pa-kho lam jeungrei ly ka miu horei awm.

¹²Tamcheaungchi i amora takun ha harei mo y ka-sang miurei, kangdai miurei awm nai amora apaichy awm. (Huni amora takunchi ly jeng miu tariurei, ka miu tariurei awm nai ne.)

¹³Naibaly huni khumi ly takunchy harei i nithun mang angpang dengdai pa-kho lam tako prei iy kachawn takunchy nithun angpang tym pa-rei pata cham i, miu apom phai pangrei awm nai avum nai ne.

¹⁴Kachawn keh y awm nai takunchy dengdai theu baly, apai theung i awm nai Achura yhm angam mang y tym bo. Huni takunchy ai pata cham i, miu apomrei kau nai avum.

¹⁵Apai pa-kho dengdai kachawn keh takunchy tym pa-rei, bawibawi ly miu vuipangrei awm nai ne.

¹⁶Takunchy bawibawi i angam mang angpang tleirei, angtheung mang angpang tleireichira y, thaibeng pa-khochychi awm. Lamchy mang y mo tha nai angtheung dengpangchira y chamleaung keung mynchi thiu nai ne.

¹⁷Huni khumi ly kai ai apai pa-kho tako prei i, Achura yhm angam mang y ang pahawi bo. Angam mang apai y tabi iy sa nai takunchy phairei awm.

¹⁸Huni takunchychi i mo y lengseaungchi padai nai ne. Huni lengseaung padai nai ly angam mang apai ly-um y tym na. Apai angam mang i khaileaung adym ly apai theung i khaileaung adym tleaung y anem.

¹⁹Achura yhm apai theung i ly-um khaileaung adym ka-sangra y katheu pa-kho harei awm. Huni khumi ly theung mang i pa-kho hawi angam mang i pa-kho sala pata cham i, miu chungvairei awm nai avum bo.

²⁰Naibaly ni ly apai angam mang i apai theung y chei nai tosyh pa-kho lam pata cham bo.

²¹Lam i langvawi lamtang y awm nai takunchy thomrei riri awm nai tamcheaungchi i takunchychi, huni takunchychi ai patleh nai dengpangchi hawi takunchychi ly nisi pa-kho i kamta suju amto vanrei atawm teang. Huni lam ly jeng miu vuipangrei, ka miu apom phai pangrei awm.

²²Kunra takun mang i thaibeng pa-khochi hawi, chamleaung keung myn thiu naichi py, nisi pa-khora i kamta ne teang. Hini pa-kho mang y khailei kheubyn saryhrei lyn ai nai tla. Kachawn keh i kunra takunchy ly apai angam mang y mo tha nai ne.

²³Nisi mang i kamta angam mang i apai tako prei iy, hini tosyh pa-kho katawti i apai theung y kun ai nai pa-kho harei awm. Huni khumi ly pa-kho nyhrei sala kakau pata cham i, miu chungvairei awm nai avum bo.

²⁴Naibaly huni khumi ly kai ai tokalawi ngan mang y hawi bi i, kaini ly hunira y takhra pa-kho harei niu. Ni ly huni pa-kho theung mang i angpang hawi, kunra i takunchy pata cham bo. Hunichi ly takhra pa-kho hawi takunchi kamta ne.

²⁵Hini pa-kho i takunchira y, takhra pa-khora i takunchychi kamta thaibengchi awm. Apai pa-kho ly jeng miu vuipangrei, ka miu apom phai pangrei awm nai ne.

²⁶Hunira y khailei kheubyn saryhrei lyn ai nai tla. Huni pa-kho kunra ly angam mang i apai y mo tha nai ne. Lamchy mang y mo tha nai theung mang i dengpangchira y chamleaung keung mynchi thiu.

²⁷Hini meingtymra py apai theung y kun ai nai pa-kho harei awm; huni khumi ly hini pa-kho hawi, angchei i pa-kho sala pata cham i, miu chungvairei awm nai ne.

²⁸Huni khumi ly tokalawi pa-kho tako prei iy, kai ai apai theung i ly-um y hawi bo. Ni ly apai pa-kho pata cham i, takhra apai pa-khochi hawi vanrei atawm teang nai ne.

²⁹Huni apai pa-khora y tamcheaung typ naichi i amora takunchi, kunra takunchy hawi theung mang i dengpangchi ly takhra katheu pa-khochi kamta ne. Hini kunra takunchira py thaibengchi awm. Bawibawi ly jeng miu vui pangrei, ka miu apom phai pangrei awm.

³⁰

³¹Hunira y apai angam mang y mo tha nai kunra takunchy awm. Pa-kho lam jeungreira i dengpangchira y, chamleaung keung mynchi thiu nai ne. Hini pa-kho mang y khailei kheubyn tajarei lyn ai nai tla.

³²Huni khumi ly nisi pa-kho tako prei iy kai ai apai theung i ly-um y hawi jo bo. Ni ly katheu pa-kho pata cham i, takhra katheu pa-khochi kamta avum nai ne.

³³Huni katheu pa-khora y tamcheaungchi i amora takunchi, kunra yhmchy hawi theung mang i dengpangchi ly takhra pa-khochi kamta, suju amto atawm nai ne. Pa-kho tengpang hawi kunra takunchy ra y thaibeng pa-kho awm; bawibawi ly jeng miu vui pangrei, ka miu apom phai pangrei awm.

³⁴Kunra takun ly apai angam mang y mo tha nai ne. Apai pa-kho lam jeungrei i dengpangchira y, chamleaung keung mynchi thiu nai ne. Pa-kho mang y khailei kheubyn tajarei lyn ai nai tla.

³⁵Hunaibaly huni khumi ly kai ai tosyh katheu pa-kho mang y hawi jo bo. Ni ly huni pa-kho ai pata cham i, takhra pa-khochi hawi atawm riri nai avum.

³⁶Hunira y takhra pa-khochi kamta tamcheaungchi i vui amora takunchi, khen ka-pu sa nai theung mang i dengpangchi, kunra takun hawi thaibeng pa-khochi awm. Bawibawi ly jeang miu chungvairei, ka miu apom phai pangrei awm nai ne.

³⁷Kunra takun ly apai angam mang y mo tha nai ne. Apai pa-kho lam jeungrei i dengpangchira y chamleaung keung mynchi thiu. Pa-kho mang khailei kheubyn tajarei lyn ai nai tla.

³⁸Apai angam mang i ly-um y tosyh ngan katheu pa-kho hawi abi iy pasawm bi nai yhm awm. Huni yhm dengdairei apai angam mang y mo tha nai kunra yhmchy mang y kun pajau. Hini yhmchy ly bom verei leng patlum ai nai tawnbawichi ai paju pachai nai meingtym ne.

³⁹Kunra yhmchy i angtheung himang py, humang py sabawi nyh nyhrei awm. Bom verei leng patlum ai nai hawi kamngo lawi nai kapathypra, sa tamang nai kapathyprachi i vui tawnbawichi ai, hini sabawichi salo y khai iy tleh u nai ne.

⁴⁰Takun i angam mang py, tosyh pa-kho i himang py, humang py sabawi nyh nyhrei awm; bawibawi ly palyhrei awm nai ne.

⁴¹Huna nai y tawnbawichi ai tleh ai nai takun theung y sabawi palyhrei, angam mang y sabawi palyhrei, bawibawi tajarei awm.

⁴²Pasawm nai yhm y bom verei leng patlum nai tawnbawichi khai rym ai nai sabawi palyhrei ly lengseaung phei si iy sa nai ne. Huni sabawichi ly jeng ka miurei bo ka-hyhrei ahyh riri iy ka-sang miurei awm. Hunichi salo y tawnbawichi ai tleh ai nai acho akeichi khai.

⁴³Huni sabawichi ly katho bi thomrei awm nai mawmrachi hawi mawm typ bo. Apathyp ai nai mawichi ai huni sabawi salo y khai bo.

⁴⁴Naibaly huni khumi ly theung mang i ly-um mang y kai ai pahawi bo. Tosyh pa-kho i sahawi apai theung i ly-um y takun harei awm; Huni takun ly tokalawi mang y mo tha nai ne. Tokalawi pa-kho sahawi y py hunai kamta takun harei awm. Huni takun ly tosyh ngan mang y mo tha nai ne.

⁴⁵Huni khumi my tokalawi mang y mo tha nai takun ly Achura yhm i vui kalop sa pi nai pathyp pi nai keungchi i vui ne.

⁴⁶Tosyh ngan mang y mo tha nai takun ly maicham i vui kalop sa nai pathyp pi nai keungchi i vui ne, nanai kai ai thui pi bo. Huni pathyp pi nai keung bawibawichi ly Zadok i kangpreang Levi khumichi ne. Nichi naini ARENG i mo y kun iy, kalop sa ai nga u nai ne.

⁴⁷Huni khumi ly apai theung i ly-um pata cham i, jeang miu chungvairei, ka miu chungvairei awm nai avum. Achura yhm ly nidym ngan mang y awm i, Achura yhm mo y ly maicham awm.

⁴⁸Naibaly ni ly kai ai Achura yhm katheu pa-kho takun theung mang y hawi jo bo. Ni ly kunra pa-kho pata cham i, katho miu thomrei, ka miu holai palyhrei awm nai avum; langvawi lamtang i dengpangchi ly katho miu thomrei awm bawibawi.

⁴⁹Kunra pa-kho takun ly ka miu apomrei, katho miu holai nyhrei awm i, hunira y khailei hawi lyn ai nai tla. Kunra pa-kho himang py, humang py yhmmawm ha harei awm nai ne.