Read Khumi Chin Ezekiela 44 Bible Online

Ezekiela 44 - Khumi Chin bible

Ezekiela 44

¹Huni khumi ly kai ai Achura yhm meingtym nisi mang y awm nai angam mang i katheu pa-kho mang y ang hawi jo bo. Katheu pa-kho ly kho typ nai ne.

²ARENG my kai teng y, “Hini katheu ly kho typ ai nai tla; mana khala py paeaung ai ny y. Khumicho ngierei ly hini katheu teaung ai nai nga ai ny y. Ati mana nai mo na baly kai, Israela chengchi i ARENG Tameuh ly huni katheu pa-kho mang kun nai deaungkho y ne. Huni katheu ly akho typ jo ai nai tla.

³Na i py vai peang nai samrang ly huni mang y chei iy, kai i mo y teicha teinei kachai cha ai nai nga; ni ly kachawn keh i takun pui tako prei iy hini katheu mang kun theu ai,” napi.

⁴Naibaly huni khumi ly kai ai tosyh mang i katheu pa-kho tako prei iy Achura yhm mo y hawi i, kai khen nai khala, ARENG i Achura yhm ly mymy i nang parai nai kangvang kawi nai kaniu; kai ly khaileaung y ambeu vui na bo.

⁵ARENG my py kai teng y, “Nang khumicho awi, nang i niu nai thai nai ngiereichi ai adawn patyp ba. Kai ly Achura yhm molam reitachi kang thui pi ai. Mani khumi ly Achura yhm theung y kun pajau, theu pajau mo, nanai hawihai palai pany kheng ba.

⁶“Atiu reng nai Israela chengchi teng y, mymychi i sa reng nai amso ngai nairachi ai sa thai naira angym nai kai, ARENG ly paleung amnym pi jojo ai ny y, nanai thui pi.

⁷Thau hawi thi ai, kai teng y talam nai thym khala, nichi ly lengkhym takip y nai cheng takhrachi hawi, kai i leu tangai y nai khumichi ai Achura yhm theung y kun ai nai pei iy, kai i Achura yhm chai hai y bo. Hunai deaungkho y kai i khumichi ly mymychi i sa nai amso ngai nai cheaungkhangchi hawimy, kai i Leu Maikawm ai taphra u nai ne.

⁸Nichi ly kai i Achura yhm y reita kachaichi sa ai nai tleaung y ly cheng takhra khumichi ai sa hai lawh bo.

⁹“Lengkhym takip y nai cheng takhra khumichi, kai i leu tangai y nai khumichi, Israela chengchi hawi vanrei awm nai cheng takhra khumichi ne lawh teu i py, kai i Achura yhm theung y kun ai nai nga u ai ny y, nanai sa thai naira angym nai kai, ARENG my pei nai leu ne,” napi.

¹⁰ARENG my kai teng y, “Mynchi ai chiu nai Israela chengchi hawi vanrei, kai ai hi vui nai Levi khumichi ly kamngo pajeng naira avum u ai.

¹¹Nichi ly Achura yhm katheu pa-kho typ nai kalopchi, Achura yhm i atiti kalopchi napi nai, kai i kalopchi sa ai nai nga u nai ne. Nichi ly leng patlum nai katalamrachi hawi apathyp ai nai i vui y, khumichi my pei nai tawnbawichi tleh ai nai nga u; huni bo y py nichi ly atitichi sabawm ai nai Achura yhm y awm ai nai tla.

¹²Na i py nichi ly Israela chengchi ai myn chiu naira y lu sa iy kamngo sa hai nai deaungkho y, kamngo pajeng naira avum u ai, nanai sa thai naira angym nai kai, ARENG ly vaineng abeu bo.

¹³Nichi ly pathyp pi nai keungchi kamta, kai i kalop sa ai nai ngo u y ai. Chai parai nai ha harei sahawi y ahihawi ai nai py nga ai ny y; khri pa-rei chai parai nai meingtym mang y py kun ai nai nga ai ny y. Hini pajeng naira ly mychi i sa nai amso ngai nairachi molam y ne.

¹⁴Achura yhm y miseaungchi naini sa ai avo nai kalopchi sa ai nai kaimy pei ai,” napi.

¹⁵Sa thai naira angym nai ARENG my, “Na i py takhra Israela chengchi my kai ai nithun thun nai khala, Zadok i kangpreang Levi khumi pathyp pi nai keungchi ly Achura yhm y kai i kalop ai, ka-ym awm parai naimy sa u jojo nai ne. Hunai deaungkho y nichi ly vai, kai i kalop sa nai khumichi lawm u ai. Kai i mo y jeu iy tawnbawichi i thau hawi thi talam u ai.

¹⁶Nichi naini kai i Achura yhm theung y kun iy, kai i maichamra kalop sa nai Achura yhm y chiu naira y lu sa u ai.

¹⁷ Nichi ly apai katheu pa-kho dengdairei Achura yhm apai theung y kun nai khala, kanih mai ka-synchi amthyp ai nai tla. Apai theung y py, Achura yhm theung y py kalop sa nai khala, mani beram mui kanih mo py amthyp ai nai tlo y.

¹⁸Ka-ui theu y ai nai kanih mai ka-syn lupeu ajeng iy, kanih mai ka-syn phangphi na u ai nai tla. Na i py khobai akawm ai nai tlo y.

¹⁹ Nichi ly khumichi awm nai apai angam mang ly-um y theu y rai khala, nichi ly mymychi kalop sa thym khala i amthyp nai ateaungchi aleng iy chai parai nai takunchira khai ai nai tla. Khumichi teng y ka-jeira pei y ai nai, ateaung kachaichi ly takhra ateaungchi hawi atha ai nai tla.

²⁰ “Nichi ly mychi i sam vau ai nai tlo y; sam kasau py khai ai nai tlo y. Kasau hawi khyp ryrei khai ai nai tla khyh.

²¹ Pathyp pi nai keungchi ly Achura yhm apai theung i ly-um mang y theu y rai khala, kreip hang nei ai nai tlo y.

²² Pathyp pi nai keung ami py juvo akhai nai neampachy hawi apom ngau y. Israela anglo lengmyn, ti y baly pathyp pi nai keung i aju tavau hawi naini apom thai khyh.

²³ “Pathyp pi nai keungchi ly chai nai hawi, chai y nairachi takhra nai sai, reita y chai nai hawi chai y nairachi takhra nai py, khumichi teng y patiu pi ai nai tla.

²⁴Ka-jo ka-thui sai sairei awm lawh nai khala nichi ly kai i reita kamta chih pi ai nai tla. Reita pawichi ai kai i reita hawi leu pei nai kamta sa ai nai tla. Anawn kani ai kani kachai palawn iy teaung ai nai tla.

²⁵ “Pathyp pi nai keung ly khumi tlaiveu ai nam nai molam y amymy ai, reita leaungsai y chai y pa-rei sa ai nai tlo y. Na i py ni ly my i amhm ampo, cho chanau, amjo amnau, juvo nang y nai tuichochi i veu ly nam pajau nai ne.

²⁶Huna nai amymy ai kachai sa chum baly kani saryhrei kaja sa ai nai tla.

²⁷Naibaly Achura yhm apai theung i ly-um y kun iy, amy ai apachai ai nai i vui y apathyp ai nai tla. Huna khala naini ni ly Achura yhm theung y kalop sa ali teang ai nai nga ai. Hini ly sa thai naira angym nai kai, ARENG my pei nai leu ne.

²⁸ “Israela chengchi teng y kaimy pei naichi theung i pathyp pi nai keungchi amtym ai nai phy ly pathyp pi nai keung kalop ne. Nichi ly Israela pri y khaileaung meingtym amtym ai nai ngo y, nichi amtym ai nai ly kai ne.

²⁹ Pathyp pi nai keungchi ly teicha teinei katalamra, kamngo alaw nai kapathypra hawi sa tamang nai kapathyprachi cha ai nai nga u ai. Huni bo y py nichi ly Israela pri y kai i vui khai takhra nai ngiereichi nga u ai.

³⁰Pathyp pi nai keungchi ly amti amjang chalu hawi keh nai hawi, kai teng y talam nai takhra kapathypra ngireichi amtym u ai. Khumichi ly tako paawp nai tleirei pathyp pi nai keung ai, paawp angchei nai tako talam pi ai nai tla. Huna nai khala kai i amtheaung naira ly nichi i yhmchira y tym ai.

³¹ Pathyp pi nai keungchi ly alyly naimy mo, mawi kasi my kei i dei nai tavo mo, ti y baly daichi mawichi mo, cha ai nai tlo y,” napi.