Read Khumi Chin Ezekiela 45 Bible Online

Ezekiela 45 - Khumi Chin bible

Ezekiela 45

¹Israela cheng theaung bawibawichi ai khaileaung meingtym phy paji pi chum baly, ARENG i vui khaileaung meingtym kachai harei khai takhra pi ai nai tla. Huni ly jeng mail tajarei, ka mail tariurei awm ai nai tla. Huni khaileaung meingtym verei ly chai ai.

²Achura yhm i vui jeng ka ka-meaung miu chungvai pangrei awm nai khaileaung meingtym lawm ai nai tla. Huni khaileaung kakaura y, ka miu vui pangrei awm nai khaileaung kakau awm ai nai tla.

³Huni khaileaung meingtym ka-hyhrei ly jeng mail tajarei, ka mail thomrei awm ai nai tla. Huni meingtymra y khri pa-rei chai nai Achura yhm awm ai.

⁴Huni ly ARENG teng y ahihawi iy kalop sa nai pathyp pi nai keungchi i vui khai takhra nai meingtym kachai ne i, nichi i awm nai yhm meingtym hawi Achura yhm meingtym py abawi ai.

⁵Huni bo i meingtym ka-hyhreira y ly Achura yhm i vui atitichi sa nai Levi khumichi i vui mary meingtymchi lawm ai.

⁶Mary harei sa ai nai i vui y jeng mail tajarei, ka mail nyhrei vi khai pi ai nai tla. Huni khaileaung meingtym ly meingtym kachai hawi abi iy, Israela khumichi i vui meingtym lawm ai nai tla.

⁷Samrang i vui khaileaung meingtym py khai pi takhra ai nai tla. Huni ly meingtym kachai nidym mang khujyh dengdai nidym mang mrethe pangli ryrei, nisi mang khujyh dengdai huni pri i nisi khujyh ryrei kau ai nai tla. Huni i jeng ly Israela cheng theaung harei i vui jyh pi nai khaileaung meingtym jeng kasau tanrei awm ai nai tla.

⁸Hini khaileaung meingtym ly peang thym nai samrang i vui phy pi nai meingtym ne. Huna khala naini, ni ly khumi mipuichi ai ano kalikachi y ai i, Israela cheng theaung bawibawichi ai huni bo i awm rai nai khaileaung meingtymchi amtym u ai nai pei ai.

⁹Sa thai naira angym nai ARENG my, “Israela samrangchi awi, nangchi i kamngo sa nai ly kra bo! Nangchi i khrukhra naira hawi kamjau kamteang sa nai ly anawn u. Kataw kateng hawi adyh adawi nairachi so u. Nangchi ly kai i khumichi ai mymychi pri i nai mana khala py patheu bi reng moh. Hini ly nangchi teng y sa thai naira angym nai kai, ARENG my pei nai leu ne.

¹⁰ Khumi luteng ly sie khyry, takhu teaung kateng teaung ai nai tla.

¹¹“Atiti neh nai epha ly hang neh nai bath hawi atawm ai nai tla. Homer ai sangum khai iy ne ai tla nai ne. Homer harei ly epha horei, ti y baly bath horei awm.

¹²“Nangchi i sie khyrychi ly anui mang i kamta awm ai nai tla: Kerah apomrei ly tangka tlaurei, tangka vui tariurei ly mina harei ne.

¹³Nangchi ly katalamra talam nai khala y, anui mang i kamta sangum khai iy teaung ai nai tla: chohpui chomaw, ti y baly chajai talam nai khala, nangchi i pakym achu nai chohpui chomaw theung i phy vui tariurei y phyrei, chajai theung i phy vui tariurei y phyrei, olive asitui ly nangmy i olive keungchira i nga nai theung i phy chungvairei y phyrei talam ai nai tla. (Huni ai bath hawi neh ai nai tla; bath horei y homer harei, ti y baly korah harei ne.) Israela pri sui kahawira i beram chungvai nyhrei y harei talam ai nai tla. “Nangchi i kamngo atleu naira nga ai nai teicha teinei katalamrachi, leng patlum nai kapathypra hawi leunghawi asa nai tawnbawichi syn ai nai tla. Huna nai sa baly nangchi i kamngo lawira nga ai. Hini ly sa thai naira angym nai kai ARENG my pei nai leu ne.

¹⁶“Khumi mipui bawibawichi ly hini katalamrachi ai, peang thym nai samrang teng y syn pi ai nai tla.

¹⁷Losi kani, Anawn kani hawi takhra pawi kani tleirei, Israela cheng vuijeungrei vui leng patlum ai nai tawnbawichi, teicha teinei katalamrachi hawi, kreip hang katalamrachi py, peang thym nai samrang ly talam ai nai tla. Ni ly Israela chengchi i kamngo lawira nga ai nai kamngo lawi nai kapathypra, teicha teinei katalamra, leng patlum nai kapathypra hawi, leunghawi asa nai kapathyprachi sa pi ai nai tla,” napi.

¹⁸Sa thai naira angym nai ARENG my kai teng y, “Nang ly angchei lo, lo si kani harei kani y Achura yhm pachai ai nai no-na by y nai si katai harei hawi apathyp ai nai tla.

¹⁹Pathyp pi nai keung ly kamngo alawra nga ai nai tawnbawi thi maidenreichy la iy Achura yhm chenghengchi, maicham taki palyhrei hawi apai theung i ly-um y kun nai katheuchira y kaleu ai nai tla.

²⁰Ami py ne sy, pany pacha y nai molam y py ne sy, cheng naira by y nai molam py ne sy, kamngo sa lawh baly, huni khumi kamngo lawi naira nga ai nai, huni lo si kani saryhrei kani y hina nai kamta sa ai nai tla. Nang ly hina nai kamta Achura yhm kachai khai ai nai tla.

²¹ Angchei lo, lo si kani holai palyhrei kani y Katlen Vui Nai Pawi sa amteaung ai nai tla. Khumi luteng angbo abawi y nai tako kani saryh ryrei cha ai nai tla.

²²Pawi sa nai angchei kani y peang thym nai samrang ly mymy i vui hawi khumi bawibawichi i vui py, kamngo alawra nga ai nai si katai harei talam ai nai tla.

²³Ni ly kani saryhrei, kani tleirei ARENG teng y no-na by y nai si katai saryhrei hawi, beram katai saryhrei leng patlum nai kapathypra py, mi-i katai harei ai kamngo alaw nai kapathypra py talam ai nai tla.

²⁴Apathyp nai si katai harei hawi beram katai harei ly tako dei teaungrei, olive hang palang palyhrei py talam ai nai tla.

²⁵ “Saryh lo, lo si kani holai pangrei kani y sa amteaung nai Taichy pawi i vui, samrang ly pawi sa nai kani saryh ryrei, kani tleirei kamngo alaw nai kapathypra, leng patlum nai kapathypra, tako dei hawi olive asitui katalamrachi ai, vaichi khala i kamta talam ai nai tla,” napi.