Read Khumi Chin Ezekiela 47 Bible Online

Ezekiela 47 - Khumi Chin bible

Ezekiela 47

¹ Huni khumi ly kai ai Achura yhm mang y kun nai katheu pa-khora y ang hawi ali teang bo. Tui ly katheu kheutang anui mang dengdairei maicham i tokalawi ngan mang y leaung prei i, Achura yhm mang y mo tha nai nisi ngan mang y leaung jo nai ne.

²Huni khumi ly kai ai tosyh katheu pa-kho mang dengdai Achura yhm meingtym i nai ang patheu iy, nisi katheu pa-kho mang y ang hawi bo. Huni katheu pa-kho tokalawi ngan mang y tavo micheaung harei leaung nai ne.

³Ni ly tavo micheaung anui mang dengdairei nisi ngan mang y, mymy i pata naira amto hawi miu sangrei pata chum baly, kai ai tavo micheaung angpeang iy tako hai bo. Huni tui ly kai i kheumei ryrei um khyh.

⁴Naibaly ni ly miu sangrei pata bi i, huni meingtym i tui ly kai i kheukhu ryrei tym. Huni bo i miu sangrei ka-khan i tui ly kai i akeng ryrei awm.

⁵Ni ly miu sangrei pata bi nai khala, kai angpeang pajau y nai tavo harei lawm bo. Huni tui ly thiu parai nai deaungkho y, kai ly kheu apho y i, jau ai nai tla bo.

⁶Huni khumi my, “Nang khumicho awi, hini atitichi ai hawihai palai dawn kheng ba,” ang napi. Naibaly ni ly kai ai tui peang y ang hawi ali teang bo.

⁷Kai ly tui peang y tym nai khala, tui peang makeng nyhreira y dengkeaung keungchi prau mang nai kaniu.

⁸Huni khumi my, “Hini tui ly khaileaung adymra leaung prei iy nisi ngan mang y leaung nai, Jordan tavo leaunghawi hawi, pangli kadei mang y leaung bo; huni pangli tui kalum ly tui kahawi lawm hai nai ne.

⁹Huni tavo micheaung leaung nai meingtym tleirei y, daichi mawi hawi ngo cheaungkhang avum ai. Huni tavo micheaung ly pangli kadei i tui y, tui kahawi lawm hai ai. Huni tui leaung nai meingtym tleirei y heng nai amjychi ai, heng nai hawi hai ai.

¹⁰Engkedi tuino dengdai Enelaim tuinora tym pa-rei, pangli peang jeungrei ngo sarachi awm iy, mymychi i paleupychi vau u ai. Mrethe panglira y awm nai ngo cheaungkhangchi kamta, hini meingtym y py neangneang awm ai.

¹¹Na i py pangli kadei tui peang y awm nai aneaung laikanchi hawi tui sampumchira y ly tui chai y ai i, palawi theu naira lawm ai.

¹² Huni tavo micheaung peang nyhreira y ly cha nei ai athai nai keung amjy cheaungkhangchi prau ai. Huni keungchi ly mana khala py ngam ajawi vai y, mana khala py athai avaw ai ny y. Huni keungchi ly Achura yhm dengdairei leaung nai tavo micheaung tui nga nai deaungkho y, lo tleirei athai kahawi athai ai. Huni keungchira i athaichi ly cha ai nai ne iy, huni i ngamchi ly khumichi no hawi ai nai teaung ai,” nanai ang napi.

¹³Sa thai naira angym nai ARENG my, “Israela cheng holai nyhreichi i vui, khaileaung meingtym khujyh patleh pi ai nai tla. Huni khaileaung meingtym khujyh ly hina nai kamta ne. Josepha nupaichi ly takhra nupaichi tleaung y phy nyhrei nga hai ai nai tla.

¹⁴Kai ly nangchi i amsi pajochi teng y hini pri amtym ai nai pei ai, nanai vaineng adeu nai kamta vai, nangchi ly huni pri ai kangngeng riri aphy u.

¹⁵Tosyh ngan mang khujyh ly Mrethe pangli i ka-so nisi ngan mang Hethalon mary, Hamath aleaung, Zedad mary,

¹⁶Berothah mary, Sibraim marychi ai jyh prei iy Tikon mary y khrairei ne. (Berothah mary hawi Sibraim mary ly Damaska pri hawi Hamath pri sala y awm i, Halahetikon mary ly Hauran khujyhra y awm nai ne.)

¹⁷Hunai deaungkho y tosyh ngan mang i khujyh ly Mrithe pangli i ka-so, nisi ngan mang Enon mary khrairei ne i, Damaska hawi Hamath ka-peang khujyh tosyh ngan mang y awm nai ne.

¹⁸Nisi ngan mang i khujyh ly Damaska pri hawi Hauran pri sala i ka-so, pangli kadei tui peang y awm nai Tamar mary khrairei ne iy, Jordan tavo nidym ngan mang y awm nai Israela pri hawi, nisi ngan mang y awm nai Kilead prichi i khujyh kamtleh ka-ma-ra ne.

¹⁹“Tokalawi ngan mang khujyh ly Tamar mary i ka-so nidym tokalawi taki y awm nai Kadesa Meriba tuikho mang py, hunaibaly tosyh nidym taki y awm nai Aikupta pri khujyh parui iy Mrithe pangli mang py tym nai ne.

²⁰“Nidym ngan mang khujyh ly Mrethe pangli ryrei ne iy, tosyh ngan mang y awm nai Hamath mawi aleaung lam nidym ngan mang y khrairei ne.

²¹“Huni khu ka-peang ly nangchi nupaichi aphy u.

²²Huni khu ka-peang ly nangchi amtym u jojo ai nai khaileaung meingtym ne. Hunira y nangchi hawi vanrei awm iy cho chanauchi awm nai cheng takhra khumichi py, nangchi khaileaung meingtym amji u nai khala phy nga u ai. Nichi ai Israela cheng kacheng kamta palawn iy Israela chengchi hawi vanrei, khaileaung meingtym phy nga hai ai nai tla.

²³Huna nai cheng takhra khumi bawibawichi ly mymychi i awm nai meingtym tleirei i, Israela nupaichi hawi vanrei, khaileaung meingtym phy nga hai ai nai tla. Hini ly sa thai naira angym nai kai, ARENG my pei nai leu ne,” napi.