Read Khumi Chin Ezekiela 48 Bible Online

Ezekiela 48 - Khumi Chin bible

Ezekiela 48

¹Huni khaileaung meingtym tosyh ngan mang khujyh ly Mrethe pangli dengdai nisi ngan mang Hethalon mary Hamath mawi aleaung lam hawi Enon mary, hu i dengdairei Damaska pri hawi Hamath pri khujyh ryrei ne. Cheng theaung ha harei y nisi khujyh dengdai nidym Mrethe pangli ryrei khu ka-peang ha harei, tosyh dengdai tokalawi khrairei anui mang i kamta nga akyhkyh ai nai tla. Dan Asha Naphtali Manaseh Ephraim Ruben Juda

⁸Juda pri khujyh ka-so nidym khujyh sala y, khai patyp nai khaileaung meingtym harei awm ai nai tla. Huni khaileaung meingtym kakau ly mail tajarei awm iy, jeng kasau ly Israela chengchi teng y vui pi nai khaileaung meingtym i jeang kasau tanrei awm ai nai tla. Achura yhm ly huni khaileaung meingtymra y awm ai nai tla.

⁹ARENG i vui khai takhra pi nai khaileaung meingtym ly jeng kasau mail tajarei, ka kakau mail tariurei awm ai nai tla.

¹⁰Huni meingtym kachaira y pathyp pi nai keungchi i vui meingtym phy pi ai nai tla. Huni phy pi nai meingtym ly nisi mang ka-so nidym mang y mail tajarei awm iy, tosyh mang ka-so tokalawi mang y mail thomrei awm ai nai tla. Hini khaileaung meingtym i umtang y ly ARENG i Achura yhm awm ai nai tla.

¹¹Hini meingtym kachai ly Zadok i kangpreang pathyp pi nai keungchi i vui lawm ai nai tla. Nichi ly kai i kalopra ka-ym awm parai naimy sa u nai ne. Takhra Israela chengchi lam tamang u nai khala nichi ly Levi khumichi kamta lam tamang u y.

¹²Hunai deaungkho y nichi ly Levi khumichi hawi ka-bira awm nai khai takhra nai meingtym nga u ai. Huni meingtym ly chai keh nai meingtym lawm ai.

¹³Levi khumichi py pathyp pi nai keungchi i khaileaung meingtym tokalawi mang y awm nai khai patyp nai khaileaung meingtym nga u ai. Nichi i meingtym py nisi mang ka-so nidym mang y jeang kasau mail tajarei, ka ly tosyh mang ka-so tokalawi mang y mail thomrei kau ai nai tla.

¹⁴ARENG teng y talam nai khaileaung meingtym ly bawibawi tleaung y hawi keh nai ne i, huni khaileaung seichyrei ai py jo ai nai, ti y baly katheung ai nai, khumi takhra leaungrei i amyn y angam hai ai nai avo y. Huni khaileaung ly kachai ne iy, ARENG my peang nai khaileaung ne.

¹⁵Jeng kasau mail tajarei, ka mail nyhrei vi kau nai takhra khaileaung ly khaileaung kachai ny y; khumi humchi teaung ai nai khaileaung ne. Nichi ly huni meingtymra awm iy huni khaileaung teaung u ai. Huni khaileaung umtang y mary sa ai nai tla.

¹⁶Huni mary ly jeng ka ka-meaung awm i, makengrei y miu sangpalyh pa-ngo chungvai pangrei awm ai nai tla.

¹⁷Mary i nidym nisi, tosyh tokalawi ka-ki ly ka kakau miu chungvai nyh pa-thom vui pangrei khaileaung kakau ha harei awm bawi ai nai tla.

¹⁸Mary sa chum baly meingtym kachai i tokalawi ngan mang y abi nai khaileaung meingtym ly nisi mang y jeng kasau mail thomrei, ka kakau mail nyhrei vi awm nai khaileaung hawi, nidym mang y jeng kasau mail thomrei, ka kakau mail nyhrei vi awm nai khaileaungchi ly mary theung y awm nai khumichi i vui lawm ai nai tla.

¹⁹Huni maryra awm nai ami py ne sy, mani cheng py ne sy, huni khaileaungra y li hlau sa u pajau nai ne.

²⁰Hunai deaungkho y khai patyp nai umtang i khaileaung verei ly jeng ka am-eaung iy, makengrei y mail tajarei awm ai. Huni khaileaungra y mary sa ai nai tla.

²¹Achura yhm, pathyp pi nai keungchi, Levi khumichi hawi mary i vui khai takhra nai khaileaung i nisi hawi nidym ngan mang y awm rai nai khaileaung ly peang thym nai samrang my amtym ai nai ne. Huni khaileaung ly nisi mang y nisi khujyh ryrei, nidym mang y Mrethe pangli ryrei tym iy, hini khaileaung tosyh mang y awm nai Judachi i khu hawi, tokalawi mang y awm nai Benjaminchi i khujyh sala y awm nai ne.

²³Hini khai patyp nai khaileaung i tokalawi mang y awm nai takhra nupaichi ly nisi khujyh ka-so nidym mang i Mrithe pangli ryrei, khaileaung meingtym ha harei y tosyh mang dengdai tokalawi mang khrairei, anui mang i kamta ka-thui nga u akyhkyh ai nai tla. Benjamin Simeon Isakhar Zebulon Kad

²⁸Kad nupai teng y pei nai khaileaung i nidym tokalawi taki mang i khujyh ly Tamar mary i ka-so Kadesa tuikho ryrei ne i, hu i dengdai nidym tosyh taki mang y awm nai Aikupta khujyh parui iy, Mrethe pangli ryrei ne.

²⁹Sa thai naira angym nai ARENG my, “Hina nai thui pi nai kamta Israela nupaichi amtym hai ai nai khaileaung meingtymchi phy pi nai leaungsai ne,” napi.

³⁰ Jerusalem mary theung y kun ai nai katheu pa-khochi ly holai nyhrei awm. Mary apai makeng makengrei ly miu sang palyh pa-ngo chungvai pangrei sau i, katheu pa-kho thomrei awm bawibawi. Huni katheu pa-khochi ai Israela nupaichi i amyn pathi bo. Tosyh mang i mary apai pa-khochi ai ly Ruben katheu pa-kho, Juda katheu pa-kho, Levi katheu pa-kho nanai py, nisi mang i mary apai pa-khochi ai ly Josepha katheu pa-kho. Benjamin katheu pa-kho, Dan katheu pa-kho nanai py, tokalawi mang i mary apai pa-khochi ai ly Simeon katheu pa-kho, Isakhar katheu pa-kho, Zebulon katheu pa-kho nanai py, nidym mang i mary apai katheu pa-khochi ai ly Kad katheu pa-kho, Asha katheu pa-kho, Naphtali katheu pa-kho nanai py amyn pathi nai ne.

³⁵Mary ai tapang meuh nai mary apai makeng palyhrei i jeng kasau bawibawi ly miu meaungkateaung atlo sang tajarei awm. Huni mary ai vai i dengdairei “ARENG ly hi y awm!” nanai thui u ai.