Read Khumi Chin Ezekiela 7 Bible Online

Ezekiela 7 - Khumi Chin bible

Ezekiela 7

¹ARENG i leu ly kai teng y tym.

²Mymy ly “Nang khumi cho awi, Israela pri mipuichi teng y kai, ARENG my leu pei nai ly pri verei phra ai nai neng tym bo!

³Aw Israela pri awi, nang i phra ai nai neng tym bo. Nang i sa naichi molam y kai ly nang ai tara kang chih bo i, nang ly kai i kado theu naira avum ai. Nangmy i sa nai amso ngai naichi vawilai ly nang ai vawitheung kang tha ai.

⁴Kai ly nang ai kangheng kang patleaung ai ny y. Mana mo i py kang pahen ai ny y. Nangmy i sa nai amso ngai nairachi molam y kai ly nang ai kang pajeng ai. Huna khala naini kai ly ARENG ne, nanai nang pany ai,” napi.

⁵Sa thai naira awm nai ARENG my leu pei nai ly “Patang naira harei bo y harei, nang i tlang tleaung y ang tym ai.

⁶Nang phra ai nai neng tym bo, myh kang ai nai neng tym bo. Nang ai ka-awi sa naimy ang tym bo.

⁷Khumi mipuichi myh kang nai neng ang tym ai bo. Mawi salo y pawi sa nai by y ai i, khru nganglang ai nai neng ly kasa iy ang tym ai bo.

⁸“Kra y naimy nang ly kai i khri pa-rei kado theu nai kawi angym na pa-rei nang i tlang tleaung y kang leih ai. Kai ly nangmy i sa naichi molam y nang ai tara chih ai. Nangmy i sa nai amso ngai naichi vawilai ly nang ai vawitheung kang tha ai.

⁹Kai ly nang ai kangheng kang patleaung ai ny y, mana mo i py kang pahen ai ny y. Nangmy i sa nai amso ngai nairachi molam y, kai ly nang ai kang pajeng ai. Huna khala naini kai ly ARENG ne, nanai py, nang ai pajeng nai keung ly kai ne, nanai py nang ly pany ai,” nanai ne.

¹⁰Israela chengchi i vui patang ai nai neng ly kasa bo. Khrukhra naira ly len ryh len ryh bo. Khri pa-rei amlyh am-e nai neng ne.

¹¹Khrukhra naira ly aso y nairachi peung hai ai. Nichi hawi amtawn abi nai ngierei ly awm ai ny y. Nichi i nang chawn nai haiho ly akan ai ny y.

¹²Neng tym bo. Ka-sum ka-pai sa nai chawn y nai neng kani ly kasa bo. Ati mana nai mo na baly Tameuh i kado theu naira ly khumi luteng i tlang tleaung y tym ai nai deaungkho y ne.

¹³Ka-jo ka-van sa nai khumi ly mymy i jo chum veng nai khaileaung nga ali teang ai nai pa-rei heng sau ai ny y. Ati mana nai mo na baly khumi luteng hawi amtawn abi nai Tameuh i leu pei nai ly palai ali teang ai ny y nai deaungkho y ne. Nichi i kamngolai y khumi hawi y naichi ly dei y naimy awm ai ny y.

¹⁴Tavai atiu amteaung ai nai baw eng bo i, khumi bawibawichi ly angvei u rym bo. Na i py leaungrei py tavai thau u y. Ati mana nai mo na baly Tameuh i kado theu naira ly khumi luteng i tlang tleaung y tym ai nai deaungkho y ne.

¹⁵Lamchira y atiu naichi awm; yhmchira y no naira hawi kajeu alam naichi py awm. Daichi avang y awm nai khumichi ly haisau tamo y dei u iy, mary theung y awm nai khumichi ly no kanghawi hawi, tahum takang y dei u ai.

¹⁶Heng rai nai khumichi ly apryn buhu kamta tangam naimy leaunghawi theung i dengdairei, mawi mang y preang u ai. Khumi bawibawichi ly mymychi i kamngo molam y vo u ai.

¹⁷Khumi bawibawichi i kiuchi ly atho di iy, nichi i kheukhuchi py ahyn thlyhthlyh ai.

¹⁸Nichi ly paisiu akhiu iy ngan tlang verei kaso tahyn theu u ai. Lu tabiuliu iy kangji kangai nga u ai.

¹⁹Nichi ly mychi i muku, tangkachi ai anyn angso kamta, lamchira y hei u pawn ai. Ati mana nai mo na baly ARENG i kado theu nai neng khala nichi i muku, tangkachi ly mymychi ai atleu pajau y nai deaungkho y ne. Nichi ly mymychi kajeu kanglam dam ai nai hawi mychi i kajeu apakawi ai nai molam py, muku tangkachi pasum thai y; muku tangkachi ly mymychi ai kamngo sa hai bo.

²⁰Vaichi khala huni khumichi ly mymychi i apu parai nai vang kateng lengseaungchi molam y, amlyh am-e u teu i py, hunichi ai amso ngai hawi nai mynchi sa naira y teaung be bo. Hunai deaungkho y ARENG ly nichi ai, huni vang katengchi ly nichi i vui chai y nairachi lawm hai bo.

²¹ARENG my, “Nichi ai tiu ai nai cheng takhrachi teng y kaimy pei ai. Tara leu reita taphra nai khumichi ly nichi i yhmtheaung katuichi la iy chai hai y ai.

²²Damrachi ly kai i Achura yhm y athorei my kun iy chai hai y nai khala, kai ly arum hai y ai.

²³Pri theung y khumi ai padei naichi hawi, marychira y khrukhra nairachi py kawi nanai deaungkho y, meingtym tleirei y khru nganglang naimy awm ai

²⁴Kai ly hawi y keh nai khumi chengchi ai hini meingtym y hawi iy, nangchi i yhmchi ly nichi teng y kapei vui ai. Huni khumichi ai nangchi i chiu nai meingtymchi chainem hai y ai nai kaimy kapei nai khala, nangchi atho len nai khumichi ly paleung phra u ai.

²⁵Nangchi jei hyn ai nai neng ly tym bo. Nangchi ly tlamsa naira hau i py avum u ai ny y.

²⁶Patang nairachi ly harei bo y harei ang tym ai i, nangchi ly satang hawi y nai avawrei thai u jojo ai. Nangchi ly amochi teng y nichi i paleung mei y niu naichi thui pi ai nai takeng u ai. Pathyp pi nai keungchi py khumichi ai thui parip ai nai ati sai py nga ai ny y. Miteaungchi py ati sai py tau pei u thai ai ny y.

²⁷Samrang ly vo tangam naimy awm ai; samrang i chapo py athang khai naira awm ai ny y; khumi mipuichi ly jei hyn naimy awm u ai. Kai ly nangchi ai nangmychi i sa naichi deaungkho y pajeng ai. Nangchi ly khumi takhra ai tara chih u nai kamta, nangchi ai kaimy tara kangchih ai. Hina nai hawi my kai ly ARENG ne, nanai nangchi pany u ai,” napi.