Read Khumi Chin Ezekiela 9 Bible Online

Ezekiela 9 - Khumi Chin bible

Ezekiela 9

¹Naibaly Tameuh my, “Jerusalem mary ai pajeng ai nai khumichi awi, jeu u; nangmychi hawi vanrei tavai ateaungchi py syn u,” nanai tao pajeng parai nai raawi hawi leu pei nai kai ly thai bo.

²Huna nai khala tavai ateaung syn u kryh nai khumi leaung tariureichi ly Achura yhm tosyh ngan mang i katheu pa-kho mang ang theu u nai ne. Nichi hawi vanrei kanih mai ka-syn amthyp iy cha tajiurachi syn nai khumi leaungrei py abawi; nichi bawibawi ly kheupaja maicham sahawi y angdo u.

³Huna nai khala y Israela chengchi my chiu nai Tameuh i nang parai nai kangvang ly mymy i awm nai kherubenchi mang my angteang kalau iy, Achura yhm y kun nai pa-kho mang y asyh vui bo. ARENG ly kanih mai ka-syn amthyp iy cha tajiura syn nai khumi ai palau i,

⁴ “Nang ly Jerusalem mary verei amki iy khumichi vai, sa u nai amso ngai nairachi molam y, vo tangam nai khumi ngiereichi i lu kati y ka-ma-ra so,” napi.

⁵Naibaly Tameuh my takhra khumichi teng y, “Huni khumi nithun abang iy mary verei y tleh u; ami ai py kangheng khai moh, ami ai py pahen moh.

⁶Miteaungchi, thawndeang anglochi, deaungdi amhmchi hawi deaungdichi ai padei u. Na i py lu kati y ka-ma-ra awm nai khumichi ai ly nam moh. Kai i Achura yhm dengdairei amteaung iy so ba,” nanai leu pei nai kathai. Hunai deaungkho y huni khumichi ly Achura yhm theung y angdo u nai Israela cheng luchi ai tleh manme nai ne.

⁷Tameuh my, “Achura yhm y amso ngai nai so u; apai ly-umchira y khumi kadeichi hawi kawi hai u; kalop so u amteaung jau!,” napi. Hunai deaungkho y huni khumichi ly mary theung y awm nai khumichi ai tleh amteaung bo.

⁸Huna nai nichi my tleh u nai thym khala kai ly kaimy tlairei kaawm jo nai ne. Kai ly khaileaung y tabiu iy ambeu naimy, “Aw sa thai naira awm nai ARENG, nang ly Israela pri y awm rai nai khumi ngiereichi ai padei hai ai nai pa-rei, Jerusalem mary y kado theu hai na bo a?,” nanai aeu naimy katakeng bo.

⁹Tameuh my, “Israela hawi Juda mipuichi i kamngochi ly khri pa-rei len parai na; nichi ly pri theung i meingtym tleirei y khumi ai padei naichi hawi Jerusalem mary verei y kamngo kawi hai nai y, ‘ARENG ly achi pri ai khai su bo, ARENG ly achi ai niu ngai y leang bo,’ nanai thui u nai ne.

¹⁰Na i py kai ly nichi ai kapahen ai ny y, kangheng patleaung ai ny y. Huni khumichi my khumi takhra ai sa nai kamta nichi ai kaimy kasa ai,” napi.

¹¹Naibaly kanih mai ka-syn amthyp iy cha tajiura syn nai khumi my, “Kai ly nang i leu pei nai kamta kasa chum bo,” nanai ARENG teng y amti pi nai ne.