Read Khumi Chin DANIELA 10 Bible Online

DANIELA 10 - Khumi Chin bible

DANIELA 10

¹Pasia empara samrang Kuru my peang nai pa-thom saneng y, Beltesazar amyn nga nai Daniela teng y amteng hai bo. Huni amteng hai naira y abawi nai leu ly teng i py, pany ai nai khri pa-rei rai parai. [11]Daniela ly huni leu i awm nai sai ai, paleung mei hawi niu nai y pany thai nai ne.

²Naibaly kai, Daniela ly kani apom phai ha ryrei, paleung si vo tangam bo.

³Kani apom phai ha khei y ryrei ly teicha teinei kahawi, ti y baly mawi cho y, kreip hang nei y, sam py aseu y nai ne.

⁴Huni saneng angchei i lo, kani 24 rei kani y, kai ly Tikari tavo pui peang y angdo bo.

⁵Naibaly angdeang iy khen nai khala, ateaung kanem amthyp iy, muku khobai akawm nai khumi leaungrei ai kaniu.

⁶Ni i tlang ly lengseaung vang kateng kamta, angvang teaung na. Ni i meimai ly amlosadi kamta angvang na i, ni i meichi ly mai kamta sangso theu. Ni i kiu kheuchi ly kachi pyn nai kheupaja kamta angvang iy, ni i raawi ly khumi mipuichi i aeu nai katyn hawi atawm.

⁷Huni paleung mei hawi niu nai ai ly kai, Daniela leaungrei niu khyh nai ne. Kai hawi vanrei awm nai khumichi ly ati sai py niu u y. Na i py nichi ly jei hyn naimy, angpreng iy aheu u bo.

⁸Kaimy leaungrei naini, huni lyh ai hawi parai nai paleung mei y niu hai nai ai khen naimy kaawm jo nai ne. Kai ly atho khei iy ami my py ma y na pa-rei, kai i meimai ly takhra vui bo.

⁹Huni khumi i leu raawi thai nai khala, kai ly khaileaung y atlym mawp i, paleung pany y vui nai ne.

¹⁰Naibaly kiu makengrei ly kai ai amkhaw iy pathau i, kai ly kheukhu di nai hawi kiu anip naimy kaawm bo. Kai ly ahyn thlyhthlyh naimy awm jo rai.

¹¹Kani pri amtaw thau naimy, “Daniela awi, Tameuh ly nang ai tamen. Angthau iy kai i thui nai leu tangai hawihai ba. Mymy ly kai ai nang teng y ang pato bo,” napi. Hini leu thai nai khala y kai ly anghyn thlyhthlyh naimy angdo nai ne.

¹²Huni my, “Daniela awi, jei moh. Nang ly cheng naira nga pajau ai nai molam, paleung apanem ai nai paleung adawn manme nai kani dengdairei, Tameuh ly nang i chiu sa nai tangai pi bo. Nang i hnei takeng nai pathang pi ai nai, kai ai ang pato nai ne.

¹³Pasia pri ai typ nai kani pri amtaw thau nai ly kai ai kani 21 ryrei ang paka. Naibaly kani pri amtaw thau naichi theung y len keh nai Mikhaela ly Pasia pri y kaimy leaungrei kaawm jo khyh nai deaungkho y, jeu i kai ai sabawm nai ne.

¹⁴Vai, kai kang jeu nai aly ly mo mang i neng y nang i chengchi avum u ai nai leaungsaichi, nang teng y pany hai ai nai molam y ne. Hini paleung mei y niu nai ly mo mang i vui ne,” napi.

¹⁵Ni my hinai kamta thui nai khala y, kai ly leu katheu pajau y naimy khaileaung y meung iy khen ryry bo.

¹⁶Naibaly khumi i mo-cha awm nai kani pri amtaw thau nai ly kiu jaha iy, kai i labeaung y nam baly, kai ly kaimy i mo y angdo nai teng y, “Areng awi, hini paleung mei y niu nai ly kai ai khri pa-rei atho di hai nai deaungkho y, kai ly ahyn thlyhthlyh nai ne.

¹⁷Kai ly yhmkeung i mo y angdo nai miseaung hawi atawm. Ati mana nai y yhmkeung hawi leu arum vam ai mo? Kai ly atho by y, taho kathiu, taho kalau nai py by y leang bo,” napi.

¹⁸Hunai bo y khumi i mo-cha awm naimy ly kai ai amkhaw nai khala y, kai ly atho awm teang bo.

¹⁹Ni my, “Tameuh ly nang ai tamen nai ne. Hunai deaungkho y paleung mawn moh, jei moh,” ang napi. Hini leu thai nai khala kai ly atho awm teang chum baly ni teng y, “Areng awi, nang i thui ai awm nai ly thui ba. Nang ly kai ai awm hai nem ba,” napi.

²⁰Ni my, “Nang teng y kai kang jeu nai aly, nang pany a? Kai, kang jeu nai aly ly leu meitang cha-iura tajiu nai ai, nang teng y thui pi ai nai ne. Kai ly vai ali teang iy Pasia pri ai kry nai kani pri amtaw thau nai hawi tavai atiu ai. Naibaly krik pri y tym nai kani pri amtaw thau hawi atiu ai. Israela pri ai kry nai kani pri amtaw thau nai Mikhaela ny y baly, kai ai sabawm ai nai keung leaungrei py by y.