Read Khumi Chin DANIELA 11 Bible Online

DANIELA 11 - Khumi Chin bible

DANIELA 11

¹Ni ly kai ai sabawm nai hawi ama hai nai keung ne.

²Nang teng y vai, kang thui pi ai naichi ly tym takengkei ai,” napi. Kani pri amtaw thau naimy, “Pasia pri y samrang leaung thomrei amthawn ai. Hunaibaly palyh samrang amthawn ai i, huni samrang ly takhra samrangchi tleaung y nang chawn ai. Ni ly mymy khri pa-rei sa thai naira awm nai hawi, khri pa-rei nang nai thym khala y, krik pri hawi atiu ai nai palau ai.

³“Naibaly sorai samrang leaungrei amthawn ai. Ni ly empara pri pui ai peang iy, my i ngai nai kamta sa ai.

⁴Na i py ni i sa thai naira khri pa-rei len nai thym khala y, empara pri ly phra iy phy palyhrei lawm vui ai. Ni i kangpreang ny y nai khumichi ly huni pri y peang u ai. Na i py nichi ly huni samrang tanrei, sa thai naira awm ai ny y.

⁵“Aikupta samrang ly sa thai naira awm i py, ni i tavailu leaungrei ly ni tleaung y sa thai naira awm keh iy, ni i pri tleaung y len keh nai pri y peang ai.

⁶Saneng neangneang kra nai khala y, Aikupta samrang i chaniu ai Suria samrang hawi apom hai iy, vuinai asa ai. Na i py huni vuinai asa nai ly khaw ai ny y. Samrangnu hawi ni teng y abang nai miseaungchi ai py, ni i juvo hawi chanauchi ai py, padei bebe ai.

⁷Huni bo y kra y naimy, samrangnu hawi amjo amnau ka-bichi theung i leaungrei ly Aikupta samrang y lyn ai. Ni ly Suria samrang i tavaimichi ai tiu ai. Nichi i amtangra theung y kun iy, nichi ai tamyh ai.

⁸Nichi i tameuh mynchi hawi, hunichi teng y talam nai muku khau, tangka khau bawibawichi ai py, Aikupta pri mang y syn pawn ai. Naibaly saneng neangneang tlamsa nai bo y,

⁹Suria samrang ly Aikupta pri theung y kun iy tiu ai. Na i py ni ly anaw ali teang ai.

¹⁰“Suria samrang i chapochi ly tavai atiu ai nai angveirym iy, tavaimi kamkawm pui harei kachu ai. Nichi theung i mangcho leaungrei ly tavo tui lem heu nai kamta amsa iy, paleung ka-e i amtangra ai tiu vui ai.

¹¹Aikupta samrang ly kado theu nai deaungkho y, Suria samrang ai tavai tiu ai i, ni i atho awm parai nai tavaimi kamkawm ai patiu vui ai.

¹²Ni ly tavai eaung nai molam y py, tavaimi neangneangchi ai padei pajau nai deaungkho y py, amlyh am-e ai. Na i py ni ly eaung naira nga bi ai ny y.

¹³“Suria samrang ly tavai athawn chum baly, vaichi khala i tleaung y atho awm nai tavaimi kamkawm pui harei kachu ai. Ni ly neng avo nai khala y, tavai ateaung kangym aeng yb nai tavaimi kamkawm pui hawi tavai thau ai.

¹⁴Naibaly Aikupta samrang ai khumi neangneangchi my ka-awi sa iy tiu u ai. Aw Daniela awi, nang i cheng theung i dengdairei, khrukhra hai naichi phyrei ly paleung mei y niu nai sai angym ai nai tavai tiu u ai. Na i py nichi ly sum ai.

¹⁵Hunai deaungkho y Suria samrang ly khaw parai nai mary ai katanmeuh iy tiu vui ai. Aikupta tavaimi risachi ly tavai tiu u bi ai ny y. Nichi theung i vawi patyp nai tavaimichi malawn py, amtang pajau ai nai atho by y.

¹⁶Tavai amsa nai Suria samrang ly amtang naira avum y naimy, nichi ai mymy ngaingai sa pajau ai. Ni ly adeu nai pri y kun iy, my i kiu theung y angym pa-rei tym hai ai.

¹⁷“Suria samrang ly my i atho awm nai tavaimi kamkawm pui hawi, tavai thau ai nai adawn pasym ai. Naibaly paleung ka-echi i pri phra vui ai nai, paleung ka-e pri i samrang hawi, vuinai asa iy mymy i chaniu[12]hawi apom hai ai. Na i py huni katau ly eaung ai ny y.

¹⁸Naibaly ni ly pangli sahawi i prichi ai tiu iy, pri neangneangchi ai tiu nai pajau ai. Na i py pri takhra mang i tavailu leaungrei ly ni ai tiu nai pajau vui ai. Ni i paleung len amlyh nai py, anawn hai vui ai. Suria samrang ai ni i paleung len amlyh nai molam y, kangji nga hai ai.

¹⁹Samrang ly my i pri y awm nai amtangra meingtym mang y vawi teang ai. Na i py ni ly sum ai i, tama vui ai.

²⁰“Ni bo y samrang leaungrei amthawn ai. Huni samrang ly pri i vui paisa tangka nawi ai nai molam, khumichi teng y kahm cheaung ai nai, miteaung keh leaungrei pato ai. Huni samrang ai ly neng kra y nai sala y my, tleh vui ai. Na i py ni ly khumi i mei ka-niu y py, tavai keung y py, dei ai ny y,” napi.

²¹Kani pri amtaw thau my thui bi nai ly “Huni bo y lyn bi nai Suria samrang ly samrang lawm ai nai ataing y, hawi y nai samrang lawm ai. Na i py ni ly athang khai y naimy, parawi hyp nai dengdairei athorei my peang vui ai.

²²Ni ai ka-awi sa nai khumi ly Tameuh i pathyp pi nai keung kalen py ne sy, taphra vui naira avum ai.

²³Huni samrang ly ka-dyh ka-dawi asa nai leu sumneang akhai iy, takhra prichi ai li-tapawp hyp ai. Ni ly pri katheang peang nai ne i py, sa thai naira len ryh ai.

²⁴Ni ly nang chawn nai pri ka-peang harei ai, athang khai y naimy kun iy my i amsi pajochi so vai y nai kalopchi sa ai. Naibaly tavai keung y nga nai yhmtheaung katuichi ai, my i nithun abang naichi hawi phy amji u ai. Ni ly amtangra marychi ai tiu ai nai dawn pasym ai. Na i py ni i deung ly kra y nai sala y tem vui ai.

²⁵“Ni ly Aikupta samrang ai tiu ai nai, tavaimi kamkawm pui harei vam parai naimy kalym ai. Aikupta samrang py khri pa-rei atho awm nai tavaimi luchi hawi, ni ai amtang ai nai angveirym ai. Na i py Aikupta samrang ly li-tapawp nai avum ai i, eaung ai ny y.

²⁶Ni i amrawi keh nai tau pei nai miteaung kehchi ly ni i vui phra ai naira lawm ai. Ni i tavaimi risa neangneangchi ai ly padei pawn ai i, tavaimi kamkawm verei malawn py, taphra naira avum ai.

²⁷Naibaly samrang leaung nyhrei ly sabawi hareira ateh hawi iy, cha nei hawi ai. Na i py nini i ka-dawn ly hawi y nai deaungkho y, leaungrei my leaungrei ai atapawp pateang ai. Na i py neng tym y rai nai deaungkho y, nini i ngai nai saichi nga hawi ai ny y.

²⁸Suria samrang ly Tameuh i khumichi ym nai reita taphra ai nai leu pacheang yb i, tavai keung y nga nai vawnsaichi la iy vawi u ai. Ni ly my i ngai nai kamta sa chum baly, my i pri y vawi teang ai.

²⁹“Naibaly neng kra kyh nai khala y ni ly Aikupta pri y kun bi iy tiu ai. Na i py hini tlenrei nai ly awm nai sai takhra vui ai.

³⁰Rom chengchi ly samphochi hawi jeu iy, ni ai tiu nai deaungkho y, ni ly jei hyn ai. “Naibaly ni ly khri pa-rei kado theu naimy nithun mang y anaw teang chum baly, Tameuh i khumichi ym nai reita taphra ai nai atho sa ai. Huni reita khai su nai khumichi i tau pei naichi py, tangai ai.

³¹Ni i risa phyreichi ly Achura yhm y chai hai y ai. Nichi ly kani tleirei talam nai kapathyprachi anawn hai iy, ka-jei awm nai amso ngai nai ai, Achura yhm khumi ka-niu kamtawi y khai ai.

³²Amy i ym nai reita khai su nai khumichi ai Suria samrang ly ka-kawi paleung ka-khum hawimy, mymy mang y abawi ai nai pahawi ai. Na i py Tameuh ai ka-ym awm nai khumichi my, ni ai tiu u ali teang ai.

³³Mipuichi ai lu sa nai khumi kachengchi ly mipuichi ai pahawi iy lam patei pi ai. Na i py neng kra kyh nai khala y, nichi theung i khumi phyreichi ly tavai keung y dei iy, phyrei ly mai tamang y veang nai avum u ai. Phyrei khumichi ly lawm nai hawi theaung y paeung nai avum u ai.

³⁴Atiu u nai thym khala, Tameuh i khumichi ly kasabawmra maidenreichy nga u ai. Hinichi mang y abawi nai khumichi theung y nawi keh naichi ly amy i vui hau naichi ne.

³⁵Lu sa nai khumi kachengchi theung i phyrei khumichi ly tleh naira avum ai. Na i py huna nai tleh naira avum u nai molam y, khumichi i paleung ly chai ai. Hunichi ly Tameuh my khai pi nai neng tym pa-rei awm jo ai.

³⁶“Suria samrang ly mymy i paleung y ngai nai kamta sa ai. Mymy ly tameuhchi bawibawi tleaung y len keh nanai py, tahm asang parai nai Tameuh tleaung y len nanai py, amlyh nai leu katheu ai. Ni ly mymy ai Tameuh my kamngo pajeng nai neng tym nai ryrei, hina nai amlyh pajau ai. Ati mana nai mo na baly Tameuh ly mymy i dawn nai kamta, sa ai nai deaungkho y ne.

³⁷Huni samrang ly my i amsi pajochi my ym nai tameuh ai py, neampachychi my ym nai tameuh ai py, tahm khai ai ny y. Amymy ai tameuhchi bawibawi tleaung y hawi nanai py, athang khai nai deaungkho y, huni tameuhchi ai khai su ai.

³⁸Huni tameuhchi i jeng y ni ly amtangra meingtymchi ai kry nai tameuh ai palo ai. My i amsi pajochi my, mana khala py chiu vai y nai tameuh teng y muku, tangka, lengseaung vang katengchi hawi, takhra vang kateng langseaung katalamrachi talam ai.

³⁹My i amtangra meingtymchi typ ai nai i vui y tamcheaung risachira y, pri takhra tameuh ai chiu nai khumichi ai teaung ai. My i peang nai anui y awm ai ngai nai khumichi ai naini, kalop kalenchi pei iy khaileaung meingtymchi py, kawn vang langseaung palawn iy pei ai.

⁴⁰“Suria samrang my peang nai deung tlum nai neng kasa nai khala y, Aikupta samrang ly huni samrang ai tavai tiu ai. Suria samrang my py keaungngo atang nai risachi hawi, keaungngochi, sampho neangneang teaung iy, atho sa naimy tiu teang ai. Ni ly lem heung nanai tavo tiu kamta, pri neangneangchira kun iy peang vui ai.

⁴¹Ni ly adeu yb nai pri theung y malawn py kun iy, khumi sang neangneangchi ai padei ai. Na i py Edom pri, Moba pri, Ammon prichi ly patang naira i tleaung u ai.

⁴²Huni samrang ly pri neang neangchira y kun iy tiu nai khala y, Aikupta pri malawn py, law tleaung ai ny y.

⁴³Ni ly Aikupta pri y heu vui nai muku tangkachi hawi, takhra vang kateng vawnsaichi la pi pawn ai. Libia pri hawi Ethiopia prichi ai py, tiu iy pajau vui ai.

⁴⁴Naibaly ni ly nisi mang hawi tosyh mang i tym nai satangchi molam y kaso theu i, athorei my atiu nai deaungkho y, khumi neangneangchi dei hai ai.

⁴⁵Ni ly Achura yhm awm nai mawi hawi, pangli sala y mymy i vui kanih yhm kalenchi sa ai. Na i py mymy ai sabawm ai nai keung by y nai deaungkho y dei ai,” napi.