Read Khumi Chin DANIELA 2 Bible Online

DANIELA 2 - Khumi Chin bible

DANIELA 2

¹Samrang Nebukhadnezar ly my i peang nai pa-nyh saneng y amang amang i, khri pa-rei paleung bi nai deaungkho y, i amhm y na.

²Hunai deaungkho y mymy ati amang theu nai mo, nanai thui pi ai nai leung kawp naichi, atam kakawpchi, vawinam pakun kawp naichi, uimiu khawn naichi ai palau hai bo. Nichi ly samrang i mo y tym u nai khala y,

³samrang my, “Kai ai paleung bi hai nai amang theu bo. Huni amang i awm nai sai kai pany ai nai ngai,” napi.

⁴Huni khumichi my Arami leu[1]hawi pathang nai ly “Samrang nang ly heng sau sy! Nang i amang thui pi cham; kaichi my thui pachai pi ai,” napi u.

⁵Samrang my, “Kai i niu nai amang py, huni amang i awm nai sai py, nangchi my thui pi sy, nanai leu pacheang yb veng bo. Nangchi thui pi thai y lawh ai na baly, nangchi ai kang tawp piupa iy, nangchi i yhm py maidym satlawi lawm hai ai.

⁶Na i py nangchi ly kai i amang py, awm nai sai py, thui thai lawh ai na baly, kai ly nangchi ai kawn vang langseaungchi pei iy, tahm kang pasang ai. Vai ly amang py, amang i awm nai sai py, thui pi u,” napi.

⁷Huni khumichi my, “Samrang nang i amang theu nai kaichi teng y thui pi baly, kaichi thui pachai pi ai,” nanai thui u taleang bi bo.

⁸Huna nai khala samrang my, “Nangchi ly kai athang khai nai kamta, neng kasau atheu u lawh ly!

⁹Nangchi ly kai i amang thui pi thai y lawh ai na baly, nangchi ai kang tawp piupa iy nangchi i yhmchi py maidym satlawi lawm hai ai nai, kai dawn yb veng bo. Nangchi ly mo mang i neng khala, awm nai sai amtlau lym ai, nanai athang khai iy kai ai tapawp ai nai paleung adyh u bo. Kai i amang thui pi u; huni amang thui pi thai baly, awm nai sai py thui pi pachai pajau ai,” napi.

¹⁰Samrang ai tau pei nai keungchi my, “Samrang nang i pany ai ngai nai sai thui pi thai nai keung ly hini khaileaung salo y leaungrei py by y leang. Sa thai naira awm nai mani samrang py, my i amo leu thui kawp naichi, vawinam patheu kawp naichi hawi atam kawp naichi ai, hina nai kamta palau iy thui hai nai awm vai y leang.

¹¹Samrang nang i deng nai ly khri pa-rei rai nai deaungkho y, tameuhchi ny y baly ami py pathang pajau ai ny y. Tameuhchi py khumichi hawi vanrei awm nai ny y leang,” napi u.

¹²Naibaly samrang ly khri pa-rei kado theu i, Babulon pri y awm nai khumi kacheng bawibawichi ai, padei pawn ai nai leu pei bo.

¹³Hunai deaungkho y Daniela hawi ni i ahawichi py, padei ai naira y abawi nai ne.

¹⁴Hunaibaly Daniela ly khumi padei naira y lu sa nai keung, samrang i tamcheaung typ nai tavailu Ario teng y chei i, Ario teng y, “Samrang ly ati mana nai y hina nai kamta, leu kaji pei lawh mo?” nanai tau awm naimy deng bo.

¹⁵Naibaly Ario my Daniela teng y satang angym pa-rei thui pi nai ne.

¹⁶Daniela ly vaimy samrang i mo y kun i, “Amang i awm nai sai thui pachai pi ai nai neng pei kyh ba,” nanai takeng.

¹⁷Naibaly Daniela ly yhm y vawi iy, my i ahawi ananiah, Misaela hawi Azariahchi teng y, satang angym pa-rei thui pi bo.

¹⁸“Achi ly Babulon pri y awm nai takhra tau kachengchi hawi vanrei, dei ai naira avum y ai nai, kani pri mang y awm nai Tameuh my ang pahen iy khri pa-rei rai parai nai amang thui pachai kawp ai nai mymy teng y chiu so u sina,” napi.

¹⁹Tameuh ly huni vum y my Daniela teng y, khri pa-rei rai nai amang thui pachai kawp ai nai pany hai bo. Naibaly Daniela ly kani pri mang y awm nai Tameuh ai, hina nai kamta palo nai ne.

²⁰“Tameuh ly sa thai naira hawi cheng naira angym nai ne! Mymy ai ly deungtasarei palo u.

²¹Mymy ly neng hawi kani lo kamtlehchi ai peang nai ne. Mymy ly samrangchi ai palyn py palyn, pala py pala. Khumichi teng y cheng naira hawi pany thai naira pei bo.

²²Mymy ly thiu parai nairachi pany hai; mymy ly kaveng theung y heu vui naichi pany se, mymy ai ly kangvang my taki teungtareung nai ne.

²³Kai i amsi pajochi my chiu nai Tameuh, Nang ly kai ai cheng naira hawi sa thai naira pei iy, kai i hnei nai kamta, samrang i amang pany hai pi nai y, kawn nai leu kang thui,” napi.

²⁴Hunai deaungkho y Daniela ly Babulon pri i, khumi kachengchi ai padei ai nai samrang teng i leu nga nai Ario teng y chei i ni teng y, “Huni khumichi ai padei moh kyh. Kai ai samrang teng y hawi ba. Kai ly samrang i amang thui pachai pi ai,” napi.

²⁵Naibaly Ario ly Daniela ai vaimy samrang Nebukhadnezar i mo y tym hai i, samrang teng y, “Kai ly Juda cheng langheng hawi naichi theung y, samrang i amang thui pachai thai nai khumi avum bo,” napi.

²⁶Samrang my (Beltesazar, nanai amyn pathi nai) Daniela teng y, “Nang ly kai i amang py, huni amang i awm nai sai py, thui pachai thai a?” nanai deng.

²⁷Daniela my, “Samrang awi, nang i deng nai leu pathang pajau nai leung sara, amo leu kawp sara, atam sara, vawinam patheu kawp sara by y leang.

²⁸Na i py thiu parai nai saichi ai pany hai nai Tameuh ly kani pri mang y awm. Huni Tameuh ly mo mang i neng y mana tym ai mo, nanai samrang nang pany ai nai pei bo. Samrang nang i nai thym khala y, niu nai amang ly vai, kaimy thui pi ai.

²⁹“Samrang nang ly i nai thym khala y, mo mang i neng y ati mana awm ai mo, nanai satang amang amang nai ne. Thiu parai nai saichi ai pany hai nai Tameuh ly mo mang y tym ai nai saichi nang ai pany hai bo.

³⁰Tameuh ly huni thiu parai nairachi ai kai teng y pany hai nai ly kai ly takhra khumichi tleaung y, tau cheng nai deaungkho y ny y leang. Samrang nang ai amang i awm nai sai pany ai nai hawi, paleung theung y adawn pasym nai saichi pany hai ai nai ne.

³¹“Samrang awi, nang ly amang mang y khri pa-rei len, angvang teaung iy ka-jei hawi parai nai khumi myn pui ai niu nai ne.

³²Huni myn pui i lu ly muku tangcheng ne; tang taang hawi kiu makeng nyhrei ly tangka hawi sa nai ne i, kajeu hawi phaichi ly kheupaja hawi sa nai ne.

³³Kheu pawm ly tamo hawi sa nai ne i, kheu pakhi hawi kheu padawichi ly tamo ka-hyhrei, laikan ka-hyhrei ne.

³⁴Samrang nang ly huni khumi myn pui ai khen nai thym khala y, lengseaung pui harei ly mawi i dengdairei, alyly naimy amli kathiu iy tamo hawi laikan sa nai myn pui i kheu y amli hai i, tleu piupa hai bo.

³⁵Naibaly tlenrei khyhmy tamo hawi laikan py, kheupaja py, tangka hawi mukuchi py, dei lawm vui bo. Hunichi ly kani pui y choh atyhra meingtym i spryh kamta, ali aho nai kamrawi y ahei pawn bo. Ati sai py lawi amny y na pa-rei, hm pawn nai ne. Na i py lengseaung pui ly khaileaung verei y kawi nanai mawi pui lawm bo.

³⁶“Hini ly samrang nang i amang ne. Vai ly huni amang i awm nai sai kang thui pi ai.

³⁷Samrang awi, nang ly samrang leilachi theung y len keh nai ne. Kani pri mang y awm nai Tameuh ly nang ai empara samrang lawm ai nai sa thai naira hawi phum-angchi kawi hai bo.

³⁸Mymy ly nang ai khumichi awm nai khaileaung pri verei ai py, amso tawnbawi hawi tavo bawibawichi ai py, peang ai nai ang pei bo. Samrang nang ly huni myn pui i muku lu ne.

³⁹Nang by y nai bo y, nang i empara tanrei len y nai empara pri harei awm ai. Huni bo y kheupaja pri napi nai, pa-thom empara pri awm ai. Huni empara pri ly khaileaung pri verei y peang ai.

⁴⁰Huni bo y tamo kamta tang parai nai palyh empara pri awm ai. Tamo ly ati cheaungkhangchi ai tleu piupa hai reng nai kamta, huni pri ly takhra prichi ai tamyh ai.

⁴¹Myn pui i kheu pakhi hawi kheu pajeungchi ly laikan ka-hyhrei, tamo ka-hyhrei ne, nanai samrang nangmy niu nai kamta, empara pri ly paleung aleng vui nai pri lawm ai. Tamo, laikan angtlen naimy awm nai deaungkho y, huni pri y tamo kamta khaw nai phyrei awm ai.

⁴²Kheu pajeungchi ly tamo ka-nyhrei, laikan phyrei ne nai y, huni pri ly atho awm i py, rai y naimy tamyh naira avum ai.

⁴³Tamo hawi laikan katlen piupa nai py, nang i niu nai kamta, huni empara pri ai peang nai samrangchi ly mychi yhm dengtheung tengtawi apom nai molam y, amkawm naira nga ai nai atho sa u ai. Na i py tamo hawi laikan katlen iy ngo y nai kamta, nichi ly amkawm ai nai nga u ai ny y.

⁴⁴Salo mang i samrangchi peang nai thym khala y my, Kani pri mang y awm nai Tameuh ly mana khala py phra pajau y nai pri harei palum ai. Huni pri ai mana khala py taphra pajau y ai. Huni pri ly takhra prichi ai taphra chum baly, khaw jojo ai.

⁴⁵Mawi i nai lengseaung pui harei ly alyly naimy amli iy tamo, kheupaja, laikan, muku, tangka hawi sa nai myn pui y amli hai nai ly nang niu nai ne. Nang parai nai Tameuh ly nang ai mo mang y tym ai nai saichi pany hai nai ne. Kai ly nang i niu nai kamta amang kang thui pi khyp iy, amang i awm nai sai py, nang ai pany hai pi chum bo,” napi.

⁴⁶Naibaly samrang Nebukhadnezar ly Daniela i mo y, khaileaung y tym pa-rei lu meung chum baly, Daniela teng y kapathypra hawi katalamrachi talam ai nai leu pei bo.

⁴⁷Samrang my, “Nang ly hini thiu parai nai saichi ai thui pachai pi pajau nai deaungkho y, nang i Tameuh ly tameuhchi bawibawi tleaung y len keh nai ne. Samrang bawibawichi ai peang nai keung, thiu parai nairachi ai pany hai pi nai keung ne,” napi.

⁴⁸Naibaly samrang ly Daniela ai tahm asang keh nai meingtym y palyn iy vang kateng kawn vang langseaung neangneang pei i, Babulon pri verei y tau pei nai miteaung kehchi i lu y hawi, Babulon pri khu ka-peang ai peang nai keung y py khai bo.

⁴⁹Daniela my hnei takeng nai kamta samrang ly Sadraka, Mesheka hawi Abedanekochi ai, Babulon pri khu ka-peangchi peang nai keung kalopchira y au bo. Daniela ai ly samrang i yhm theung y kalop sa hai nai ne.