Read Khumi Chin DANIELA 4 Bible Online

DANIELA 4 - Khumi Chin bible

DANIELA 4

¹Samrang Nebukhadnezar ly khaileaung pri verei y awm nai, leu cheaungkhang katheu nai khumi bawibawichi teng y, pany hai ai ngai nai cha harei ly hina nai kamta pa nai ne. “Nangchi ly paleung awmnem naimy awm u sy!

²“Tahm asang keh nai Tameuh my kai ai ang patei nai lyh ai hawi naichi hawi rengrang ka-ma-rachi tangai u.

³“Tameuh my achi teng y patei pi nai lyh ai nairachi ly khri pa-rei len parai na ly! Mymy i patei pi nai rengrang ka-ma-rachi ly khri pa-rei sa thai naira angym na ly! Tameuh ly deungtasarei samrang ne. Mymy ly khaileaung pri y neng tleirei peang jojo ai.

⁴Kai, samrang Nebukhadnezar ly yhm y paleung awmnem naimy awm nai thym khala y i ngym i,

⁵ka-jei awm nai amang amang iy kaso theu ai hawi naichi paleung mei y nui nai ne.

⁶Kai ly amang i awm nai sai thui pi pachai pi ai nai, tau pei nai miteaung keh bawibawichi ai kapalau bo.

⁷Hunaibaly awm nai ngierei, leung sarachi, mei amhyp sarachi, atam sarachi hawi ka-si lo kamtlau kane kawp naichi ly kai i mo y tym u nai ne. Kai ly nichi teng y kai i amang thui pi teu i py, nichi ly huni amang i awm nai sai, thui pi pachai thai y.

⁸Naibaly Daniela ly kai i mo y ang tym. (Ni ai ly kai i chiu nai tameuh i amyn Beltesazar, nanai amyn pathi) Chai parai nai tameuhchi i phailo ly ni teng y awm nai deaungkho y, kai ly ni teng y kai, ati amang theu mo, nanai thui pi bo.

⁹Kaimy ni teng y, “Leung sarachi i len keh nai Beltesazar awi, nang teng y chai parai nai tameuhchi[4]i phailo awm nanai py, thiu parai nai ati cheaungkhangchi ai nang ly pany thai nanai py, kai pany. Amang mang y kai i niu nai tangai iy, mo mang i satang kai teng y thui pi pachai ba.

¹⁰“Kai ly i ngym nai thym khala y, khaileaung salo i umtang y awm nai dengkeaung pui ka-sang harei kaniu bo.

¹¹Huni dengkeaung ly len ryh, asang ryh i, khaileaung salo y awm nai khumi bawibawichi niu ai nai pa-rei, kani y ang teu na.

¹²Huni dengkeaung i changpichi ly apu parai i, athai py pasu nai deaungkho y, khaileaung pri vereichi cha ai nai nga. Amso tawnbawichi ly huni dengkeaung ka-khui y anawn u. Tavochi ly changpichira y tabu sa u. Heng nai amjy bawibawichi ly huni keung i athaichi cha u nai ne.

¹³“Kai ly huni paleung mei y niu naichi ai adawn pasym nai thym khala y, ang khen ang kry nai kani pri amtaw thau nai leaungrei, satla kathiu nai kaniu.

¹⁴Kani pri amtaw thau my, “Hini dengkeaung keung ai paliu iy, changpichi katleng pawn. Ngamchi pahui pawn iy athaichi py hei pawn. Amso tawnbawichi ai huni dengkeaung ka-khui i nai py, tavochi ai changpichira i nai py, paryh pawn.

¹⁵Na i py khaileaung y awm nai dengkeaung miukhiu ai ly sengkry, kheupaja vuinawnchi hawi thang iy, adymra i acha theung y khai u su ba. “Ni ai kadam theung y amso tawnbawichi, acha keungchi hawi vanrei awm sy.

¹⁶Ni ly khumi paleung tama naimy saneng saryh tym pa-rei, amso tawnbawi paleung awm ai.

¹⁷Hini ly ang khen ang kry nai kani pri amtaw thauchi i sa nai saichi ne. Hunai deaungkho y tahm asang parai nai Tameuh ly khaileaung prichi tlang tleaung y sa thai naira kawi angym nanai py, mymy ly tahm anem keh nai khumi ai malawn py vawi iy samrang y palyn pajau nanai py, meingtym tleirei y awm nai khumi bawibawichi pany u sy,” nanai tao pajeng parai naimy aeu bo.

¹⁸Samrang Nebukhadnezar my, “Hini ly kai i niu nai amang ne. Nang Beltesazar awi, vai ly kai ai huni amang i awm nai sai thui pi pachai ba. Huni ai kai i tau pei nai miteaung keh leaungrei py, thui pi pachai thai y. Na i py chai parai nai tameuhchi i phailo ly nang teng y awm nai ne i, nang ly huni amang i awm nai sai thui pachai thai nai ne,” napi.

¹⁹Naibaly Beltesazar napi nai Daniela ly khri pa-rei kaso theu nai deaungkho y, leu py katheu thai y na bo. Samrang my, “Nang Beltesazar awi, amang hawi amang i awm nai sai molam y kaso theu moh,” napi baly, Beltesazar my, “Samrang awi, huni amang hawi awm nai sai ly nang i vui ny y naimy, nang i paleung ka-echi i vui ne sy.

²⁰Asang parai nai dengkeaung keung ly kani y angteu iy, khaileaung pri i khumi bawibawichi ly huni keung ai niu u bo.

²¹Huni keung i changpichi ly apu parai iy, athaichi py pasu nai deaungkho y, khaileaung pri vereichi, cha ai nai nga u bo. Huni keung i anui y daichi tawnbawichi anawn u. Champichira y tavochi tabu sa u nai ne.

²²“Samrang awi, nang ly huni dengkeaung keung pui ne. Nang ly kani y angteu na pa-rei asang iy, sa thai naira ly khaileaung pri verei y khiu nai ne.

²³Samrang nangmy khen nai thym khala y, kani pri amtaw thau nai leaungrei ly satla kathiu i, ‘huni dengkeaung keung paliu ly taphra. Na i py miukhiu ly khaileaung y awm jo sy. Huni miukhiu ai sengkry, kheupaja vuinawn hawi kawm cheng iy, adymra i acha theung y khai su. Ni ai kadamchi sui hai iy, saneng saryh ryrei amso tawnbawichi hawi vanrei awm hai sy,” napi.

²⁴“Samrang awi, tahm asang parai nai Tameuh my, samrang nang ly ati mana lawm ai mo, nanai pany hai bo. Amang i awm nai sai ly hina nai ne.

²⁵Nang ai ly khumichi theung i dengdairei patheu vui ai i, daichi mawichi hawi vanrei awm ai. Si kamta acha cha iy saneng saryh ryrei kadam sui ai i, abyhra by y nai meingtym y i ai. Naibaly tahm asang parai nai Tameuh ly khaileaung pri verei ai peang iy, mymy i ngai nai khumi ami ai py ne sy, samrang y palyn pajau, nanai nang adawn vau ai.

²⁶Kani pri amtaw thau my dengkeaung miukhiu ai, khaileaung y khai su ai nai leu pei nai kamta, nang ly hini khaileaung pri ai Tameuh my peang nai ne, nanai pany vau nai khala y, nang ly samrang lawm teang bi ai.

²⁷Hunaibaly samrang awi, kai i tau pei nai tangai ba. Kamngo so bi moh ly kahawi so ba. Khumi kamawnchi ai pahen ba. [5]Huna nai sa baly nang ly yhmtheaung katui peung ai,” napi.

²⁸Huna nai thui pi nai kamta ly samrang Nebukhadnezar i tlang tleaung y tym bo.

²⁹Lo holai nyhrei bo y samrang ly my i yhm kheupo mang aleaung nai thym khala y,

³⁰mymy ly angdeang i, “Babulon mary ly khri pa-rei len parai na ly! Hini mary y kaimy i sa thai naira, kaimy i nang parai naira patei ai nai, kaimy sa nai mary pui ne,” nanai thui bo.

³¹Huna nai thui nai leu tem y rai khala y my, kani mang i raawi ly “Aw samrang Nebukhadnezar awi, kai i thui nai leu tangai ba. Nang i pri ai nang teng i nai, kaimy la vui bo.

³²Nang ai ly khumi kamkawm i nai kang patheu vui ai i, daichi mawichi hawi awm ai nai tla ai. Saneng saryh ryrei si kamta, acha cha ai nai tla ai. Naibaly Tameuh ly khaileaung prichi ai peang iy, hunichi ai mymy i ngai nai khumi teng y pei pajau, nanai nang adawn vau ai,” napi.

³³Huni leu kamta ly vaimy tym ryp bo. Samrang Nebukhadnezar ly khumi kamkawm theung i dengdairei theu vui iy, si kamta acha cha nai tla bo. Ni i tlang tleaung y py kadamchi tla. Ni i sam ly ahmtlau pakhi mui kamta sau iy, ni i kiu pachyn, kheu pachynchi py, tavo kheu pachynchi kamta sau ryh nai ne.

³⁴Samrang my, “Kai ly saneng saryhrei neng khei nai khala y, kani mang y khen kalau i, khumi paleung nga ali teang nai deaungkho y, nang parai nai Tameuh ai palo bo. Deungtasarei heng nai Tameuh i nang parai nai hawi, sa thai naira ai palo bo. “Mymy ly khaileaung pri y deungtasarei peang ai. Mymy i pri ly deungtasa khrairei awm jo ai.

³⁵Mymy ly khaileaung pri i khumichi ai, ati sai py ny y nai niu; mymy ly kani pri amtaw thauchi ai py, khaileaung pri i khumichi ai py, peang nai ne. Ami py mymy i kangai ei vui pajau y, mymy ati mana sa mo nanai py, deng vam y nai ne.

³⁶“Kai ly khumi i paleung nga ali teang nai khala y, kaimy i pri phum-ang py, kaimy i nang parai nai hawi phum-ang py, nga ali teang nai ne. Kai i tau pei nai miteaung kehchi hawi bangtangchi py, kai ai kawn u ali teang bo. Vaichi khala i tleaung y tahm awm ai nai hawi samrang i sa thai naira py, ang pei ali teang nai ne.

³⁷“Hunaibaly kai, samrang Nebukhadnezar ly kani pri mang y awm nai samrang ai kapalo bo. Nang parai nai hawi phum-ang ai py kapalo bo. Mymy i sa nai ngiereichi ly teng parai. Mymy ly leu meitang ne i, paleung len amlyh nai khumichi ai anem hai bo,” nanai tajiu nai ne.