Read Khumi Chin DANIELA 5 Bible Online

DANIELA 5 - Khumi Chin bible

DANIELA 5

¹Dymrei nai khala y samrang Belshazar ly my i cha nei pawi pui sa naira y bangtang leaung sangreichi ai thangkau kau iy, nichi hawi vanrei kreip hang nei u nai ne.

²Huna nai nei u nai thym khala y, ampo[6]samrang Nebukhadnezar my Jerusalem mary Achura yhm i syn vui nai muku khau hawi tangka khauchi mymy teng y jeu hai ai nai leu pei bo. Mymy hawi vanrei bangtangchi, samrang i ajuchi hawi samrangnu i aheaung apaichi kreip hang nei ai nai, huni khauchi la ai nai leu pei nai ne.

³Muku khauchi vaimy tym hai nai khala y, nichi ly huni khauchi hawi nei naimy,

⁴muku, tangka, kheupaja, tamo, dengkeaung, lengseaungchi hawi sa nai tameuhchi ai palo u bo.

⁵Huna nai khala y tlenrei khyhmy, kiu makengrei amteng i, mai kangvang angvang keh nai samrang i yhm dengpangra y, cha lam harei tajiu bo. Samrang ly huna nai tajiu nai niu baly,

⁶meimai takhuisui vui nai ne. Ni ly khri pa-rei jei hyn na i, meimai kadau vui nai kheukhu ahyn thlyhthlyh na bo.

⁷Naibaly atam sarachi, vawinam pakun kawp naichi hawi ka-si kamhi khen kawp nai keungchi ai jeu hai ai nai aeu iy, miseaung leaungrei ai pato. Huni khumichi tym u nai khala y samrang my, “Huni cha lam phain iy awm nai sai, kai teng y thui pi thai nai khumi ai samrang i ateaung kamsen jeaung amthyp hai ai. Tahm pateng nai muku leng py awi hai iy, kai i pri y pa-thom sa thai naira awm keh nai keung lawm ai nai, kaimy khai takhra ai,” napi.

⁸Samrang i tau pei nai miteaung kehchi tym u i py, huni cha ai ami py phain thai y. Huni cha i awm nai sai py, samrang teng y thui pi u thai y.

⁹Naibaly samrang Belshazar ly khri pa-rei paleung bi nai deaungkho y, meimai takhuisui ra nai ne. Bangtangchi py meimai hawi y na bo.

¹⁰Amhm samrangnu ly samrang hawi bangtangchi thui nai leu thai nai deaungkho y, cha nei pawi sa nai hall theung mang y kun i, “Samrang awi, nang ly heng sau sy! Hina tanrei paleung adi adiu nai hawi meimai takhuisui nai awm moh.

¹¹Nang i pri theung y chai parai nai tameuhchi i phailo kawi nai khumi leaungrei awm. Ngampo samrang deung khala y, huni khumi teng y cheng naira hawi lulip pany nai, tameuh kamta cheng nanai pa-rei amthang nai ne. Ngampo samrang Nebukhadnezar ly ni ai leung sara, atam sara, vawinam pakun kawp nai sara, vawinam patheu kawp nai sara hawi amo sarachi i, miteaung keh y palyn pi bo.

¹²Ni ly amangchi i awm nai sai thui pachai nai, thiu parai nai leu ka-nengchi py thui pachai thai nai, rai parai nai leuchi pany nai, hunichira y khri pa-rei cheng nai ne. Hunai deaungkho y ngampo my Beltesazar, nanai amyn pei nai Daniela ai palau u. Ni ly huni cha i awm nai sai ang thui pi ai,” napi.

¹³Nichi ly Daniela ai samrang i mo y tym hai praw i, samrang my Daniela teng y, “Nang ly Juda pri i dengdairei, kai i ampo samrang my hawi nai, Juda cheng langheng leaungrei Daniela napi nai khumi ne a?

¹⁴Tameuhchi[7]i phailo ly nang teng y awm nai ne i, nang ly pany thai naira, tau cheng nairachi kawi angym nai ne, nanai kai ly thai bo.

¹⁵Kai ly kaimy i tau pei nai miteaung kehchi hawi leung sarachi ai palau hai i py, nichi ly thui pi thai y.

¹⁶Nang ly leu ka-nengchi thui pachai thai iy, rai parai nai leu kathiuchi thui pachai thai, nanai kang thai. Nang ly hini cha lam phain iy, awm nai sai kai teng y thui pi thai baly, kai ly nang ai samrang ateaung kamsen jeaung amthyp hai iy, tahm pasang nai muku leng awi hai naimy, kai i pri y pa-thom i sa thai naira awm keh nai keung y kang khai ai,” napi.

¹⁷Daniela my, “Nang i kawn vang langseaungchi ly nangmy teng y phai khai ba; ti y baly takhra khumi leaung leaungrei teng y pei pi ba. Na i py kai ly huni cha lam ai phain iy, awm nai sai py nang teng y thui pi ai.

¹⁸“Tahm asang parai nai Tameuh ly ngampo samrang Nebukhadnezar teng y peang nai sa thai naira hawi tahm asang parai nai samrang leaungrei lawm hai iy, tahm awm nai hawi phum-ang angym hai bo.

¹⁹Ni ly khri pa-rei tahm asang nai deaungkho y, cheng leu cheaungkhang katheu nai khumi neangneangchi hawi, pri neangneangchi ra i khumi bawibawichi ly jei hyn u bo. Ni ly mymy padei ai ngai nai khumi ai padei iy, heng hai ai ngai nai khumi ai heng hai bo. Tahm pasang ai ngai nai khumi ai tahm pasang iy, tahm panem ai ngai nai khumi ai tahm panem nai ne.

²⁰Na i py ni ly paleung len amlyh naimy paleung tang i, pahyp y naimy ana nai khala y, sa thai naira tama i samrang i nai tla vui bo.

²¹Ni ly khumi kamkawm theung i nai patheu vui nai avum iy, amso tawnbawi paleung kun bo. Ni ly daichi keaungngo kano kasau karamchi hawi vanrei awm iy, si kamta acha cha nai ne. Abyhra by y naimy, kadam theung y i ai nai tla bo. Kangkhym y ly tahm asang parai nai Tameuh my khaileaung pri verei ai peang iy, mymy i ngai nai khumi ami ai py ne sy, huni prichi ai pei pajau, nanai samrang ly adawn vau nai ne.

²²“Na i py ni i chapo nang ly huni bawibawichi pany teu i py, amymy ai paleung apanem y lawh.

²³Nang ly kani pri mang i Areng ai ka-awi sa iy, Achura yhm theung i muku khauchi la hai lawh bo. Nang hawi vanrei, nang i bangtangchi, samrangnuchi, samrangnu i aheaung apaichi ly huni muku khauchira y kreip hangchi tleng iy nei chum baly, mei niu y, kano thai y, ati sai py pany y nai muku, tangka, kheupaja, tamo, dengkeaung, lengseaungchi hawi sa nai tameuhchi ai palo u bo. Na i py nang ly nangmy i tlang ai py, nangmy i sa nai bawibawichi ai py, peang nai keung Tameuh ai ly palo y lawh.

²⁴Hunai deaungkho y Tameuh ly kiu pato iy, hini cha lam tajiu hai nai ne.

²⁵“Tajiu nai cha ly ‘kati, kati, sie khyry neh, phy paji’ napi nai ne.

²⁶Kati, napi nai i awm nai sai ly Tameuh my nang i pri peang nai deung kati pi i, tem ai nai neng tym hai bo, nanai ne.

²⁷Sie khyry neh, nanai i awm nai sai ly nang ai neh naira y ang neh i, kaji by y veng bo, nanai ne.

²⁸Phy paji, nanai leu i awm nai sai ly nang i pri ai ly Medi chengchi hawi Pasia chengchi teng y phy paji pi veng bo, nanai sai ne.

²⁹Hunaibaly Belshazar ly vaimy Daniela ai, samrang i ateaung kamsen jeaung amthyp hai iy, kaneaung y tahm asang nai muku leng awi hai chum baly, Daniela ai pri verei y pa-thom i sa thai naira awm keh nai keung y palyn bo.

³⁰Huni vum y my Babulon samrang Belshazar ai ly tleh vui bo.

³¹Saneng 62 rei awm nai Medi cheng samrang Dari ly huni pri ai peang vui nai bo.