Read Khumi Chin DANIELA 6 Bible Online

DANIELA 6 - Khumi Chin bible

DANIELA 6

¹Samrang Dari ly my i empara pri verei peang ai nai bangtang kalen leaung 120 reichi khai takhra ai nai dawn yb bo.

²Huni bo y mymy ly Daniela hawi takhra leaung nyhrei ai, bangtang kalenchi ai lu sa ai nai hawi, samrang ai kry ai nai vui y khai takhra bo.

³Naibaly kra y naimy Daniela ly takhra lu sa nai kamkawmchi, bangtang kalenchi tleaung y, sa nai sai hawi nai khumi ne, nanai pany. Ni ly khri pa-rei kawp katlen nai deaungkho y, samrang ly ni ai empara pri verei y, lu sa hai ai nai dawn bo.

⁴Naibaly takhra lu sa nai kamkawmchi hawi bangtang kalenchi ly Daniela i kalop sa naira y, tamang naira hau u. Na i py tamang nai ati sai py avum y. Ati mana nai mo na baly Daniela ly ka-ym awm nai khumi ne i, tamang naira, teng y naira so y nai deaungkho y ne.

⁵Nichi my, “Kaichi ly Daniela i ym nai reita molam y ny y baly, takhra thui tamawn ai nai niu y,” nanai arum u bo.

⁶Naibaly nichi ly samrang teng y tym u i, “Samrang Dari awi, nang ly heng sau sy!

⁷Samrang nang my leu pei nai harei thai hai ly huni leu pei nai ai khumichi my tangai iy sa khyp ai nai, lu sa nai kamkawmchi, bangtang kalenchi, pa-nyh bangtang kalenchi hawi tau pei nai miteaung kehchi napi nai, hini pri y lu sa nai keung kaichi bawibawi leu adyh nai ne. Kani phairei sala y ami py, samrang nang ai ny y baly takhra khumi teng py, tameuh teng py, chiu sa lawh baly, huni khumi ai khrangsi paeung nai angawm theung y aphi ai, nanai leu pei ba.

⁸Huni leu pei nai ai samrang nangmy, pajawp typ nai ka-ma-ra nip typ iy, kiu myn tajiu baly, huni leu pei nai ly palai vui ai ngo pajau y nai Medi hawi Pasia chengchi i reita lawm ai,” napi u.

⁹Hunaibaly samrang Dari ly huni leu pei nai ai pajawp typ nai ka-ma-ra hawi lamai nip typ nai ne.

¹⁰Samrang ly hina nai lamai nip typ chum veng bo, nanai thai nai khala y, Daniela ly yhm y vawi jo bo. Ni i yhm salo sambeura, Jerusalem mary mang mo tha nai thaibeng pa-khochi awm. Ni ly huni sambeura y mymy i sa reng nai kamta, thaibeng pa-kho sahawi y kheukhu di iy, kanirei y tlen thomrei, Tameuh teng y chiu sa nai ne.

¹¹Ni i paleung ka-echi ly Tameuh teng y Daniela chiu sa nai niu nai khala y,

¹²nichi bawibawi ly vanrei my, samrang teng y kun u i, Daniela ai thui tamawn u bo. Nichi my, “Samrang awi, nang ly kani phairei sala y samrang nang ai ny y naimy, takhra khumi teng py, tameuh teng py, chiu sa nai khumi ami py ne sy, khrangsi paeung nai angawm y aphi ai, nanai leu pei nai lamai nip typ nai ny y a?” nanai deng u bo. Samrang my, “Huni leu pei nai ly palai vui thai y nai, Medi hawi Pasia chengchi i reita ne khyp,” napi.

¹³Naibaly nichi ly samrang teng y, “Juda pri i langheng y hawi naichi theung i, khumi leaungrei Daniela ly samrang nang ai tahm khai y. Nang i patheu nai leu pei nai ai py tangai y. Ni ly kanirei y tlen thomrei, reita kamta chiu sa jojo nai ne,” napi u.

¹⁴Samrang ly nichi i amti pi nai leu thai baly paleung hawi y i, Daniela ai atleu ai nai lam hau nai ly kani dym pa-rei atho sa.

¹⁵Naibaly Daniela i paleung ka-echi ly samrang teng y chei bi i ni teng y, “Medi hawi Pasia chengchi i reita kamta, samrang i leu pei nai ly palai teang ai nai ngo y, nanai samrang nangmy pany nai ne,” napi u.

¹⁶Hunaibaly samrang i leu pei nai kamta, Daniela ai khrangsi paeung nai angawm y aphi u bo. Samrang my Daniela teng y, “Nang i ka-ym awm naimy chiu nai Tameuh ly nang ai atleu pi na sy,” napi.

¹⁷Angawm salo y lengseaung phei tleang hai tawp i, samrang ly ami py Daniela ai atleu pajau y pa-rei, my i pajawp typ nai ka-ma-ra hawi bangtangchi i pajawp typ nai ka-ma-rachi ai, lengseaung phei salo y nip typ iy khai hai bo.

¹⁸Samrang ly yhm mang y vawi i, vumtorei cho nei y. Mani mo paleung pahawi nai py ngai y, i py amhm y nai ne.

¹⁹Khutawi nai hawimy samrang ly ang thau iy, khrangsi angawm mang y chei kaliki bo.

²⁰Khrangsi angawm y tym nai khala, paleung mawn nai raawi hawimy, “Tameuh kangheng i miseaung Daniela awi! Nang i ka-ym awm naimy chiu nai Tameuh ly nang ai khrangsichi teng i nai atleu pi pajau a?” nanai deng.

²¹Daniela my, “Samrang awi, nang ly heng sau sy!

²²Khrangsichi ly kai ai kei y ai nai Tameuh ly mymy i kani pri amtaw thau nai ai pato iy, khrangsichi i labeaung tamym pi vui bo. Hina nai kamta ang sa pi nai ly kai ly kamngo by y, nanai hawi kai ly samrang nang i tlang tleaung y tamang vai y, nanai py, pany nai deaungkho y ne,” napi.

²³Samrang ly khrikhri pa-rei amo theu nai deaungkho y, Daniela ai khrangsi angawm i nai atheu kalau ai nai leu pei bo. Naibaly khumichi my atheu u i, Daniela ly Tameuh ai ym nai khumi ne nai deaungkho y, ati sai py phrumai by y nai niu u nai ne.

²⁴Naibaly samrang ly Daniela ai thui tamawn nai khumi bawibawichi ai patiu hai iy, nichi i aju chanauchi hawi vanrei, khrangsi angawm theung y aphi ai nai leu pei bo. Nichi ly khaileaung y tym y rai khala y my, khrangsichi ly achaw iy hiuchi py, taai piupa pawn nai ne.

²⁵Naibaly samrang Dari ly khaileaung pri i cheng leu cheaungkhang katheu nai, khumi neangneangchi hawi pri neangneangchira i, khumi bawibawichi teng y cha tajiu nai ne. Huni cha theung y ly “Paleung awmnem nai awm sy!

²⁶Kai i empara pri verei y awm nai khumi bawibawichi awi, nangchi ly Daniela i ym nai Tameuh ai tahm khai u ai nai tla, nanai leu kang pei. “Mymy ly Tameuh kangheng ne iy, deungtasarei peang jojo ai. Mymy i pri ly mana khala py phra ai ny y. Mymy i sa thai naira ly mana khala py, tem ai ny y.

²⁷Mymy ly sabawm nai hawi atleu naimy, kani mang y py, khaileaung pri y py, lyh ai nairachi hawi rengrang ka-ma-rachi patei pi bo. Mymy ly Daniela ai khrangsichi teng i nai atleu bo,” nanai ne.

²⁸Daniela ly samrang Dari peang nai neng hawi, Pasia cheng samrang Kuru peang nai neng khala y, hawi naira nga nai ne.