Read Khumi Chin DANIELA 8 Bible Online

DANIELA 8 - Khumi Chin bible

DANIELA 8

¹Samrang Belshazar my peang nai pa-thom saneng y, kai Daniela ly tlen pa-nyh paleung mei y kaniu bo.[8]

²Huni paleung mei hawi niu nai theung y, kai ly Elam pri ka-peang theung i mary apai tapang nai Susa mary theung y, vaimy tym vui nai kapany bo. Kai ly Ulai tavo sahawi y angdo iy,

³angdeang cham i, tavo sahawi y angdo nai beram katai harei kaniu. Huni beram ly taki kasau nyhrei awm iy, harei nai ly takhra harei tleaung y sau i, kangkhym y sai nai taki ne.

⁴Huni beram katai ly taki hawi nidym, tosyh, tokalawi meingtym thomrei mang y deng nai kai ly khen nai ne. Ni ai mani amso tawnbawi py paka pajau y. Ni teng i nai ami py tleaung pajau y. Ni ly my i ngai nai kamta sa iy, amlyh am-era nai ne.

⁵Kai ly hinichi i awm nai sai adawn pasym nai khala y, nidym ngan mang i mi-i harei ly angpreng nai ang tym. Ni i angpreng nai ly khri pa-rei rang nai deaungkho y, kheu ly khaileaung y angteu y na. Ni i meichi sala y lyh ai hawi nai taki harei awm.

⁶Ni ly vaichi khala tavo sahawi y kai i niu nai beram katai sahawi y tym nai khala, athorei my ang preng iy deng bo.

⁷Kai ly mi-i my beram katai ai deng nai kakhen nai ne. Mi-i ly khri pa-rei kado theu iy, beram katai ai athorei my deng i, beram katai i taki nyhrei tleu vui bo. Beram katai ly amtang ali teang pajau y nai deaungkho y, khaileaung y atlym i, ni ai ly chiu piupa bo. Ami py ni ai atleu pajau y nai ne.

⁸Mi-i ly paleung len tleaung len ra bo. Na i py ni i sa thai naira len parai nai neng tym nai khala y, ni i taki ly tleu vui i huni taki meingtym y, khuteng taki palyhrei mang y lyh ai hawi nai taki palyhrei sai bo.

⁹Huni taki palyhrei theung i taki hareira y, taki kangti harei sai. Huni taki kangti ly tokalawi ngan, nisi ngan hawi adeu nai pri mang y khrairei, sa thai naira awm nai ne.

¹⁰Huni taki kangti ly kani mang i tavailuchi napi nai, ka-si taukichi ai tiu pajau ai nai atho awm ryh i, huni ka-si tauki phyreichi ai khaileaung y pala iy chiu piupa bo.

¹¹Kani mang tavailuchi i areng ai malawn py, amtang naimy mymy teng y apathyp reng nai katalamrachi anawn hai vui iy, Achura yhm py taphra hai vui bo.

¹²Khumichi ly kani tleirei apathyp reng nai katalamrachi apathyp ai nai jeng y, reita lam kateng ai khaileaung y tym pa-rei, tahm panem u bo. Huni taki ly sa naira tleirei y eaung nai ne.

¹³Naibaly kani pri amtaw thau nai leaungrei my takhra leaungrei teng y, “Paleung mei y niu nai leaungsaichi ly mana tanrei kra ai mo? Kani tleirei apathyp ai nai i jeng y, ka-jei hawi nai kamngo sa lawh nai py, kani mang tavailuchi hawi Achura yhm ai chiu piupa nai py, mana tanrei kra ai mo?” nanai deng nai ai kai, thai nai ne.

¹⁴Pa-nyh i kani pri amtaw thau my pathang nai ly “Kani 2,300 rei kra ai. Huna nai neng khala y, dym, khawn apathyp naichi sa u ai ny y. Naibaly Achura yhm ai ly palum pachai teang ai,” napi.

¹⁵Kai, Daniela ly paleung mei hawi niu nai i awm nai sai pany pajau ai nai atho sa nai thym y, khumi i mo-cha atawm nai ly kai i mo y angdo nai kaniu.

¹⁶Hunai thym khala y, “Kabriela awi, huni khumi i paleung mei hawi niu nai i awm nai sai thui pi pachai,” nanai Ulai tavo mang dengdairei, khumi i raawi hawi aeu nai kathai.

¹⁷Kabriela ly kai i sahawi y jeu iy angdo nai khala, kai ly khri pa-rei kaso theu nai deaungkho y, khaileaung y atlym vui bo. Kabriela my kai teng y, “Dei nai khumi amjy awi, amteng hai nai i awm nai sai ai pany ba. Huni amteng hai nai ly kani khaileaung tem ai nai patei pi nai ne,” napi.

¹⁸Ni my hina nai ang thui pi nai thym khala y, kai ly pany y vui na i, khaileaung y atlym bo. Na i py ni ly kai ai pathau praw i,

¹⁹ni my, “Tameuh i kado theu nai deaungkho y ati mana tym ai mo, nanai kang pany hai bo. Hini amteng hai nai ly tem ai nai neng patei pi nai ne.

²⁰“Nang i niu nai taki nyhrei awm nai beram katai ly Medi hawi Pasia prichi ai thui nai ne.

²¹Mi-i ly Krip pri ne. Ni i mei nyhrei sala i lyh ai hawi nai taki ly huni pri i angchei i samrang ne.

²²Huni taki tleu vui nai khala y sai nai taki palyhreichi ly huni pri i dengdairei amprei ai nai pri palyhreichi ne. Na i py huni prichi ly angchei i pri tanrei, sa thai naira awm u ai ny y.

²³“Huni prichi ly phra ai nai kasa iy, pajeng ai avo nai pa-rei kamngo sa u nai khala y, paleung tang naimy paleung akawi iy tapawp reng nai samrang leaungrei lyn ai.

²⁴Ni ly mymy i haiho by y pui naimy, sa thai naira awm ai. Ni ly ka-jei hawi nai tleh nai, taphra naichi sa iy ati mo sa i py eaung ai. Ni ly sa thai naira awm nai khumichi hawi Tameuh i khumichi ai taphra ai.

²⁵Ati mana nai mo na baly ni ly tau awm nai khumi ne nai deaungkho y, li-tapawp naichira y eaung ai. Ni ly amlyh am-e iy khumi neangneangchi ai athang khai y naimy padei ai. Ni ly samrang leilachi i samrang ai malawn py tiu ai. Na i py ni ly khumi i kiu y ny y naimy, phra naira avum ai.

²⁶Dym, khawn tleirei kapathyprachi molam y, nang teng y thui pi pachai nai hini paleung mei hawi niu hai nai ly ang tym takengkei ai. Na i py huna nai tym takengkei ai nai neng ly neangneang ngai rai nai deaungkho y, huni amteng hai nai ly heu vui ba,” napi.

²⁷Kai, Daniela ly kani neangneang paleung atho di naimy no bo. Naibaly kai ly ang thau iy, samrang my pei nai kalop kasa nai ne. Na i py huni paleung mei hawi niu nai molam y paleung adi-adiu nai deaungkho y, kai ly huni i awm nai sai ai pany thai y na bo.